2 Kyetsinyinga 13 - KITABU KITAKATIFU

Uvulwani hagati ha Abija na Jeroboamu

¹ Mu muhiga gwa 18 gwi liamiiha liu mwami Jeroboamu wa Isiraeli, Abija yagwa mwami wi Ivuyuda.

² Yamiha ku mihiga 3 mu Jerusalemi. Mama weve yaali Maaka, mukaana wa Urieli kutura mu lidaala linene lia Gibea. Uvulwani vwatulira hagati ha Abija na Jeroboamu.

³ Abija yavungiza liihi lia vasikari valuviliri 400,000, na Jeroboamu yaamuhingira ni liihi lia vasikari vatovole vizingulu 800,000.

⁴ Amahi zana yaga gaaganira mu kivala chi vigulu cha Efuraimu. Mwami Abija yanina ku kiguru cha Zemaraimu kandi naalangiriza Mwami Jeroboamu na Isiraeli navoora: “Mumbulirize!

⁵ Si mumanyi ndi Yahova, Nyasaye wa Isiraeli yalomba lilagana na Daudi litavunikaa, naamuhezaa oyo ni visukululwi veve uvwami ku Isiraeli ku mihiga ni mihiga?”

⁶ Jeroboamu muyaayi wa Nebati yibaala ku Solomoni, mwami weve.

⁷ Lwinyima yavungiza harara muganda gwa vavunagi va malago avatakonya kindu, na vanigaa valeke uvulariri vwavo ku Rehoboamu muyaayi wa Solomoni, uwaali umwana muyaayi vuzwa kandi utaali nilimanya linyingi kuvahingiira.

⁸ Kalunu muganaganaa kulwaana nu vwami vwu vunyali uvwa Yahova yahaana ku visukululwi va Daudi. Munyi muveeye ni liihi linene ligali kandi muveeye ni vifananyi vie zigiriki zie zahabu via Jeroboamu yalomba muvisigamiri.

⁹ Munyi mwakunga avasaalisi va Yahova, kisukururwi cha Haruni, kandi ni mukungaa vandu va Levi. Mu vogono vwavo, mutovooye avasaalisi munzira ndala nzere yi zihiiri zindi zitovoleraa mu. Ku vosi oleeta igiriki anoho magondi makore 7 ku vwali anyala kugwa musaalisi wa mulala wa yavo avalangwa avanyasaye vinyu.

¹⁰ “Navuzwa kunyi kukitumikira Yahova Nyasaye wiitu na kukiri kumuleka kali hakuzu. Avasaalisi avaveeye kisukururwi cha Haruni vakora miyinzi jaavo, kandi vandu va Levi vavakonyeleraa.

¹¹ Vuli mugambazuri na mugolova vamuhaaniraa visiuviliru viukusambwa vigima kandi vamuvuuyizira vimuli vifunya mwayu. Vamuhaaniraa vihaanwa viu mugadi mutakatifu komesa yi zahabu iyatakaswa ku miruka, na vuli mugolova vahambizaa zitaya ku vinara vie izahabu. Kunyi kokoraa aga Yahova Nyasaye wiitu amali kulaga, navuzwa munyi mwamuleka.

¹² Nyasaye mwene aveeye harara ni kunyi na aveeye mwimiliri wiitu. Avasaalisi veve vaveeye hano nivisiriva viu vulwani, vetegeki kuvikuba kulanga kunyi kumulwaane. O, munyi avandu va Isiraeli, mutalwaani Yahova, Nyasaye wa vaguuga vinyu mba! Si munyala kuguuta mba!”

¹³ Navuzwa lwa Abija yaali namolomaa, Jeroboamu yatuma valala ku vasikari vi liihi veve koseeta liihi lia Avayuda kutura inyima, lwi liihi lindi liosi liavingiliria kutura imbiri.

¹⁴ Avayuda viikivuka nivalora ndi vaakumbiriziywi. Vanira ku Yahova avakoonye, na vasaalisi vaakuba visiliva.

¹⁵ Avandu vi Ivuyuda vaakuba ulukwiri lwu vulwani vudinyu, na nivimiliywi nu mwami Abija, vaatulira Avaisiraeli. Nyasaye yaguuta Jeroboamu harara ni liihi linene lia Avaisiraeli.

¹⁶ Avandu viiruka kutura ku vandu vi Ivuyuda, na Nyasaye yaleka Avayuda kuvaguuta.

¹⁷ Abija harara ni liihi lilie vaaguuta vandu va Isiraeli. Avasikari valahi vi liihi lia Isiraeli 500,000 viitwa.

¹⁸ Nandio avandu vi Ivuyuda vaali avaguuti ku avandu va Isiraeli, kigira vaasedema ku Yahova, Nyasaye wa vaguuga vaavo.

¹⁹ Abija yalondelera liihi lia Jeroboamu kandi nagumira malala ku madaala manene geege: Bezeli Jeshana na Efuroni, kandi nu tudaala twaali ahimbi na sa lilala ku madaala manene yaga.

²⁰ Jeroboamu siyanyoola kandi zinguru zizie mu madiku ga Abija yamiha mba. Mu limaliriza Yahova yaamukuya ma nakuza.

²¹ Navuzwa Abija yamedeka mu zinguru ligali. Yaali na vakali 14 na yivula vayaayi 22 na vakana 16.

²² Amakuva ga kale ga Abija, aga yavoola, zinzira zizie kandi aga yakola, gang'odwa mu vitabu via makuva ga kale gu Muporofeti Ido.