2 Kyetsinyinga 12 - KITABU KITAKATIFU

Vandu va Egebeti vingilira Ivuyuda

¹ Nonoho, lwa Rehoboamu yaali niyakasingiriza uvwamihi vwivwe kuli mwami, avandu vosi harara naye vasuura kuhulira Lilaga lia Yahova.

² Mu muhiga gwa 5 gwi liamiiha lia Rehoboamu, avandu vahevwa amageri kigira si vasuuvira Yahova mba. Kigira yaga Mwami Shishaka wa Egebeti yingilira Jerusalemi

³ ni liihi lia magare gu vulwani 1,200, Avasikari vukunina ku zibarasi 60,000, kandi na vasikari vi liihi avaari sivanyala kuvalizwa, harara na vandu va libia, vandu va Suki, kandi vandu va Ezopia.

⁴ Yagumira madaala manene gizimbinga gi Ivuyuda ni vazia imbiri kali kuduuka Jerusalemi.

⁵ Muporofeti Shemaya yazia ku mwami Rehoboamu kandi na viimiliri vi Ivuyuda avaari nivavungi mu Jerusalemi ukwiruka kutura ku Shishaka. Yavavolera, “Yili nilio likuva lia Yahova ku munyi: ‘Munyi mumali kondeka, kunangwa kalunu inzi mali kumuleka mu makono gi zinguru zia Shishaka.’ ”

⁶ Mwami harara na viimiliri va Isiraeli vavugilira ndi, vamala kwona, ma nivavoora, “Icha Yahova akolaa keveeye kilungi.”

⁷ Lwa Yahova yalora ndi vamali kwegehiza aveene, yamoloma ku Shemaya kandi: “Kigira avandu vi Ivuyuda vamali kwegehiza aveene ligali imbiri wange, si ndavadiviza ligali mba. Ndavaha ovohonyi, na si ndavika vutima vwange ku Jerusalemi kuvitira mu zinguru zia Shishaka.

⁸ Navuzwa Shishaka alavaguuta kandi valava vatumikiri veve; kunangwa vaduuki kwiga iliavukana hagati hukutumikira inzi nukutumikira avami vageni vi vivala.”

⁹ Mwami Shishaka wa Egebeti yazia Jerusalemi, navugura mavikiru kutura mu Litembeli kandi kutura munyumba yu vwami. Yavugula vindu viosi komeeda ku zinguva zie izahabu ziu mwami Solomoni yaali niyalomba.

¹⁰ Mwami Rehoboamu yalomba zinguva ziu mugasa muvogono vwazio naziviika mu vulindi vwa vanene vasingiliraa virivwa vie inyumba yu vwami.

¹¹ Vuli ing'inga lwu mwami yaazizaa mu Litembeli, avasikari valindi vazivugulaa vaziginga kuzia nazio, ma kandi vazilanyia munyumba yu vulindi.

¹² Na kigira yegehiza ku Yahova, uvutima vwa Yahova si vwamudiviza ligali mba, na kali ndio, ivindu ni liiva liazizagilira vulahi mu Ivuyuda.

Liamiiha lia Rehoboamu mu vwimbi

¹³ Rehoboamu yamiha mu Jerusalemi kandi zinguru zizie ziamedeka kuli mwami. Yaali ni mihiga 41 lwa yagwa mwami na yamiha ku mihiga 17 mu Jerusalemi, lidaala linene ilia Yahova yaali niyaatovora mu kivala choosi cha Isiraeli kuli havundu aha asigamirwa. Mama wa Rehoboamu yaali Naama kutura mu kivala cha Amoni.

¹⁴ Yakola agaali madamanu imbiri wa Yahova, kigira si yageriza kwenyeleriza uvulariri vwa Yahova mba.

¹⁵ Vikolwa via Rehoboamu kutura mu litanga kuduuka ku keheri, kandi amakuva gang'odwa ga vinyumba yeeye ganyolekanga mu vitabu via makuva ga kale gu muporofeti Shemaya kandi vitabu via makuva ga kale gu Muporofeti Ido. Rehoboamu na Jeroboamu vamenya mu vulwani vuli ing'inga.

¹⁶ Rehoboamu yakuza ma nateevwa mu vilindwa vwu vwami, mu Lidaala linene lia Daudi, Muyaayi weve Abija yavugula ovogono vwivwe kuli mwami.