2 Kyetsinyinga 10 - KITABU KITAKATIFU

Liebaala lie zihiiri zia Ivaale

¹ Rehoboamu yazia Shekemu wa vandu vosi va Ivaale vaali nivavungi kumukola Mwami.

² Lwa Jeroboamu muyaayi wa Nebati, uwaali niyaazia Egebeti kwiruka kutura ku mwami Solomoni, yahulira makuva yaga, yirana yengo.

³ Avandu vi zihiiri zia Ivaale vaatumana yaaze, na vosi vazia harara naye ku Rehoboamu ma nivamuvoolera,

⁴ “Baba woovo yavika misigo miliduhu ligali ku kunyi. Niiva ulakola misigo yiji janguhi, kandi okole livamwoyo lietu live lilahi hake, kunyi kulava avatumikiri vovo vasuuvirifu.”

⁵ Rehoboamu yativura, “Yaanzi mumbe madiku 3 ng'anagane ku makuva yaga ma mwirane.” Kunangwa avandu vatura ho ni vazia.

⁶ Mwami Rehoboamu yateeva zing'anagani zia vakulundu avaari nivatumikaa kuli avahaani vi zing'anagani vababa weve Solomoni. Yateeva, “Ni litivuli ki lia mumbezaa ilia inzi mbana ku vandu yava?”

⁷ Vaamutivulira, “Niiva ulava mulahi ku vandu yava na ogerize kuvayaanziza nu kuhaana litivuli lilahi, valakutumikira kazozo nu vusuuvirifu vwosi.”

⁸ Navuzwa yachaya zing'anagani zia vakulundu vamuha, na muvogono yivwo, yazia ku vasoleri avayaviruka navo avaari nivaveeye avahaani vi zing'anagani veve.

⁹ Yateeva, “Mumbezaa iganagani ki ya inzi ngola? Nambolere ki avandu vatevaa mbanguhiziri misigo jaavo?”

¹⁰ Vamutivulira, “Yaga ni go gakuduukiraa uvavoolere! ‘Kedete change chiinyasi keveeye kenene kuvita kekenge cha baba wange.’

¹¹ Uvavoolere ndi, ‘Baba wange yavika misigo miliduhu ku munyi; inzi ndajikola miliduhu kali kuvita. Yaamukuyira zingova, navuzwa ndamukuyira olokova oveeye kuli aminu gi zing'e’ ”

¹² Inyima wa madiku 3 Jeroboamu harara na avandu vosi viirana ku mwami Rehoboamu, kuli yaali naavalagi.

¹³ Mwami yachaya zing'anagani zia avakulundu kandi namoloma ku vandu nuvululu,

¹⁴ kuli vayaayi vi likula lilie vaali nivamuheeye zing'anagani. Yavoola, “Baba wange yamudwika misigo miliduhu; Inzi ndajikola miliduhu kali kuvita. Yaamukuyira olokova; na inzi ndamukuyira alokova loveeye kuli amiinu gi zing'e.”

¹⁵ Vwali uvulariri vwa Yahova Nyasaye adukize aga yaali niyamoloma ku Jeroboamu muyaayi wa Nebati kuvitira mu muporofeti Ahija kutura Shilo. Yiki nicho chagira mwami navula kuhulira makuva ga vandu.

¹⁶ Lwa vandu vosi va Isiraeli valora ndi Mwami uvuli kuvahulira, vahanzukira mwami, “Kunyi koveeye ni kidieli ki mu Daudi? Sikoveeye ni miandu nu muyaayi wa Jese mba. Sa mulala ku munyi azie yengo weve; O, Isiraeli. Daudi ulindi inyumba yooyo yivi mwene.” Kunangwa avandu vosi va Isiraeli vazia yengo wavo.

¹⁷ Navuzwa Rehoboamu yamiha ku vandu vamenya mu kivala chi Ivuyuda.

¹⁸ Maku Mwami Rehoboamu yatuma Adoniramu, uwaali musingiliri wi miyinzi jukunigwa, azie ku vandu va Isiraeli, navuzwa vamulasa na magina nakuza. Lwa yalora yaga, mwami Rehoboamu yakola vwangu, naniina mu ligare lilie liuvulwani niyirukira Jerusalemi.

¹⁹ Kutura lwene yilwo, avandu vuvwami vwa Ivaale vwa Isiraeli vazizagilira kwibaala ku vwamihi vwa Daudi kuduuka kalunu ndi.