2 Kyetsinyinga 1 - KITABU KITAKATIFU

Mwami Solomoni yateeva ahevwe ovogeri

¹ Mwami Solomoni, muyaayi wa Daudi yavugula uvwamihi vwu vwami vwa Isiraeli ni zinguru, na Yahova Nyasaye weve yamugasiza kandi naamukora kuva mwami wi zinguru ligali.

² Mwami Solomoni yahaana malago ku vimiliri vosi avimilila miganda ja vandu 1,000 kandi vimilira miganda ja vandu 100, vanene vu vwamihi vosi, aviimiliri vi zinyumba vosi kandi vandu vandi vosi.

³ Solomoni harara ni livugana liosi, vazia ha Gibeoni ahi Lihema lia Yahova ilia Musa Mutumikiri wa Yahova, yalomba mwigendanyama

⁴ Navuzwa Lisandugu lie lilagana liali mu Jerusalemi, na liavikwa mu Lihema liu Mwami Daudi yaali yasingiriza lwa yalileeta kutura mu kivala cha Kiriazi-Jearimu.

⁵ Uvwali vwu mugasa uvwa Bezaleli, muyaayi wa Uri na umwisukulu wa Huri yalomba, vwali kandi mu Gibeoni imbiri wi Lihema lia Yahova. Mwami Solomoni harara na vandu vosi vaasigamira Yahova ahene yaho.

⁶ Imbiri wi Lihema, mwami Solomoni yasigamira Yahova ku limuhaanira visiuviliru ku vwali vwu mugasa; zinyama 1,000 ziitwa nukusambwa zing'ima.

⁷ Nyasaye yaloleka ku Solomoni uvudiku vwene yivwo ma namuteeva, “Wakayaanzi ngoheki?”

⁸ Solomoni yativura, “Ivi wamanyia uvuyanzi vonene ku baba wange, mwami Daudi; na kalunu umali koleka mbuguli ovogono vwivwe kuli mwami wa Isiraeli.

⁹ O, Yahova Nyasaye dukiza lisuuviriza lia walomba ku baba wange. Ivi umali kongola mbe mwami ku vandu avanyingi ligali kali sivanyala kuvalizwa mba.

¹⁰ Kunangwa, mbe ovogeri ni limanya lia nyenya mbe nalio nduuki kwamihaa kuvo. Nigatali ndio, inzi ndakanyali ndi ukwaamiiha avandu vanene vovo yava?”

¹¹ Nyasaye yativulira Solomoni, “Kigira makuva yaga gaali mu mwoyo gugwo na sioteevi miandu, uvutugi, uluyali, anoho livamwoyo lia yavo avakudunyiraa, na sioteevi livamwoyo litambi, navuzwa oteevi oheevwe ovogeri nilimanya uduuki kwamiiha ku vandu vange ava mali kukokola ove mwami wavo.

¹² Kulwayaga, ndakuha ovogeri ni limanya, kandi ndakuha uvuhinda, uvutugi nu luyali; avula ho nu mwami uwaali imbiri woovo yaali navwo kandi siaveeye ho na mulala inyima woovo uliva navwo.”

¹³ Kunangwa Solomoni yatura havundu hukusigamira ha Gibeoni ahi Lihema lia Yahova liali, kandi ni yirana Jerusalemi. Yamiha Isiraeli wene yeyo.

Zinguru kandi uvutugi vwa Solomoni

¹⁴ Mwami Solomoni yaali ni liihi lia magare gu vulwani 1,400 na vasikari vukunina ku zibarasi 12,000. Yavika valala kuvo mu Jerusalemi na vandi vaviikwa mu madaala manene gandi.

¹⁵ Mu ing'inga yu vwamihi vwivwe, ifeza ni zahabu yanyoolekaa mu vwingi havundu hoosi mu Jerusalemi kuli magina, kandi misaala ji midaragwa minyingi ligali kuli mukuyu gwa kazozo.

¹⁶ Avasingiliri vi likiranyia liu mwami vamiiha ku liguliza ichova zibarasi kutura Egebeti na Kilikia.

¹⁷ Vaagura magare gu vulwani kutura Egebeti ku vidonye 600 viefeza ku vuli ligare na Ibarasi ku vidonye 150 vuli Ibarasi. Vaaguliza ziosi ku vami vi kivala cha, vandu va iti, ni va Asiria.