2 Avami 9 - KITABU KITAKATIFU

Jehu yagwa mwami wa Isiraeli

¹ Lidiku lilala, muporofeti Elisha yalanga mulala ku vaporofeti vayaayi namuvolera, “Wetegeke na uvuguli keseve cha maguta ga muzeituni yaga mu makono googo na uzie Ramozi mu Gileadi.

² Lwa uduuka yo, wenye Jehu muyaayi wa Jehoshafati, mwisukulu wa Nimishi. Muhile mu keng'oze cha hambisu ihale kutura ku avalina veve.

³ Mwituliri amaguta ga muzeituni yaga ku mutwi gwigwe, na ovoole, ‘Yahova alandizaa ndi akuvakaa maguta kuva mwami wa Isiraeli.’ Maku utuli ha vundu yaho vwangu kuli unyaliza.”

⁴ Kunangwa muporofeti muyaayi oyo yazia Ramozi,

⁵ uwa yanyoora avanene vi liihi ni vaveeye mu livugana. Yavoola, “Munene wange, mbeeye ni likuva liilio.” Jehu yateeva, “Ni uliha ku kunyi wa omoloma ku?” Muporofeti yativura, “Ku ivi O, munene wange.”

⁶ Vingira vombi munyumba, na umuporofeti musoleri oyo yitulura maguta ga muzeituni ku mutwi gwa Jehu, namuvolera, “Yahova, Nyasaye wa Isiraeli alandizaa ku ivi ndi: ‘Nguvakaa maguta uve mwami wa vandu vange Isiraeli.

⁷ Gakuduukiraa witi munene woovo mwami; muyaayi wa Ahabu ula, kunangwa nduuki kuhaana mageri ku Jezebeli kigira yita avaporofeti vange kandi na vatumikiri vange vandi.

⁸ Vinyumba ya Ahabu vosi ni ivisukulurwi vivie kuduuka vakuze; ndatuliza ho vuli musaza woosi mu avinyumba yeeye, muyaayi nu musakulu vosi.

⁹ Ndakolera avinyumba yiyi kuli ndakora ku vinyumba ya Jeroboamu muyaayi wa Nebati wa Isiraeli kandi yu mwami Baasha muyaayi wa Ahija.

¹⁰ Jezebeli sialayavilwa mu kilindwa mba muviri gwigwe gulaliivwa ni Zimbwa mu kivala cha Jezireeli.’ ” Inyima wo kovora yaga, muporofeti musoleri oyo yatura mu keng'oze ni yiruka zimbiru.

¹¹ Jehu yirana ku vanene vache veve, avamuteeva, “Vindu viosi vikaveeye vilahi noho? Mulalu ula yenyangi ki ku ivi?” Yavativulira, “Munyi mumanyi icha yenyangi.”

¹² Vativura, “Awa! Sikumanyi mba! Kovolere icha avooye!” Jehu yavavolera, “Amboleeye ndi Yahova umali kondovola mbe mwami wa Isiraeli!”

¹³ Nonoho, avanene vache vaala zinguvu zindambi ziu kwigulu ziavo ku vika, Jehu aduuki kusingira ku, ni vakuba visiliva kandi nivahanzuka, “Jehu aveeye mwami!”

Mwami Joramu wa Isiraeli yitiywi

¹⁴ Maku Jehu muyaayi Jehoshafati, mwisukulu wa Nimushi yaazira Joramu haasi. Kunangwa Joramu na vandu va Isiraeli vosi vaali nivalinda lidaala lia Ramozi mu kivala cha Gibadi, kigira Hazaeli mwami wa Siria.

¹⁵ Navuzwa mwami Joramu yaali ni yirani Jezireeli aduuki kulwalizwa ahone kutura ku zing'oma zia Vasiria va mwaata, lwa yalwana na mwami Hazaeli wa Siria. Kunangwa Jehu yavoola, “Niiva yizi ziveeye zing'anagani zienyu, mundu atanyenyeka kutura mu lidaala linene azie kovora amakuva yaga mu Jezireeli mba.”

¹⁶ Maku yingira mu ligare liu vulwani lilie nazia Jezireeli. Joramu yaali nakikiri kohona, na mwami Ahazia wi Ivuyuda yaali naziiyi yo kumulora.

¹⁷ Lwu musikari mulindi uwaali nasingiyi ku kitarazi cho kohenzera ku mu Jezireeli yalora Jehu na vandu veve ni vazaa, yalangiriza, navoora, “Ndolaa muganda gwa avandu ni guuzaa.” Joramu yavoola, “Vugula mundu wu kunina ku ibarasi. Mutumi azie kuvaaganira na avateeve, ‘Mukazaa mu mirembe noho mu vusigu?’ ”

¹⁸ Kunangwa mundu wu kunina ku ibarasi yatura vwangu kuzia kwaganira Jehu nateeva, “Mwami ateevaa niiva, ‘Munyi muzaa mu mirembe naho?’ ” Jehu yamutivulira, “Ivi oveeye naki kokora ni mirembe? Girung'ana na ononde inyima!” Na musikari wokohenza yahaana mativuli, “Mutumwa uduuki kuvo, navuzwa siyirana yinu kandi mba.”

¹⁹ Kunangwa mwami yatuma mutumwa wundi wa kaviri wu kunina ku ibarasi. Lwa yaduuka kuvo, yavoola, “Yaga nigo gu mwami avoora, ‘Munyi mukazaa mu mirembe naho?’ ” Jehu yamutivulira, “Ivi oveeye naki kokora ni mirembe? Girung'ana ononde!”

²⁰ Mulindi yahaana makuva kandi navoora, “Mutumwa uduuki kuvo, navuzwa siyirana yinu kandi mba.” Kandi yameda kovora, “Mwimiliri wu muganda ahilaa ligare lie liihi lilie kuli mulalu, kandi kuli Jehu!”

²¹ Mwami Joramu yavoola, “Nzetegekizira ligare lie liihi liange.” Gaakolwa ndio, na oyo harara nu mwami Ahazia wi Ivuyuda vatura, sa mulala mu ligare lilie mwene, ukwaganira Jehu. Vaagana naye ha mulimi gwaali gwa Nabozi Mu Jezireeli.

²² Lwa Joramu yalora Jehu, yamuteeva, “Jehu, uzi mu mirembe?” Jehu yativura, “Mirembe ginyala ndi kuva ho lwu vusigitiri ni lisigamira misambwa ja mama woovo Jezebeli yatangiza liveeye linyingi?”

²³ Maku Joramu yagirung'ana niyiruka navolera Ahazia, “Gaveeye vwibaali, Ahazia! Gaveeye vwibaali.”

²⁴ Jehu yanyira uvuta, ni zinguru ziosi, nalasa Joramu mu kivirigani. Losere lwatoza mu mwoyo gwigwe naye yagwa mu ligare lilie lie liihi ma nakuza.

²⁵ Jehu yavolera mukonyeleri weve - Bidikari, “Muvuguli umbiri gwigwe na mugusiuvi mu mulimi gwaali gwa Nabozi Mu Jezireeli. Wizulizi ndi lwa ivi ninzi kwaali ni kunini ku zibarasi inyima wa Ahabu, baba wa Joramu, Yahova yamoloma makuva yaga ku Ahabu.

²⁶ ‘Ndoli liitwa lia Nabozi na vayaayi veve mugolova, na ligali ngusuuvirizaa ndi ndakoheera amageri hano mu mulimi mulala mwere yigu.’ Kunangwa vugula muviri gwa Joramu, na ugusiuvi mu mulimi gwaali gwa Nabozi, kunangwa lisuuviriza lia Yahova liduuki kuduukizwa.”

Mwami Ahazia wi Ivuyuda yitwa

²⁷ Lwa Ahazia, mwami wi Ivuyuda yalora ichaali ni chekoleki, yirukira kunzira izizaa mu lidaala lia Bezi Hagani. Jehu yamulondelera, nahanzuka, “Mwiti kandi.” Vamulasira losere mu ligare lilie kunzira yanigiraa kuzia Guri ahimbi ni lidaala lia Ibuleamu, navuzwa yirukira Megido ma nakuzira yo.

²⁸ Vanene veve vagingira muviri gwigwe mu ligare lilie lie liihi nivaguhila Jerusalemi, ma ni vamuyavira mu vilindwa vio vwami mu lidaala lia Daudi.

²⁹ Mu muhiga gwa komi na moja gwi liamiiha lia Joramu muyaayi wa Ahabu, Ahazia yaatanga kwamiiha Ivuyuda.

Mwami wi kikali Jezebeli yitwa

³⁰ Jehu yaduuka mu Jezireeli. Lwa Jezebeli yahulira ichaali nichekoleki, yavaka kibaala ku zimoni zizie kandi nalomba liisu lilie vulahi ligali ma nasingira nahenza kunzira kuvitira mwidirisha kunzira.

³¹ Lwa Jehu yingira mu kirivwa Jezebeli yamuteeva, “Ivi oveeye kuli Zimuri, ivi mwiti wu munene woovo, kigira ki ni uzaa hano?”

³² Jehu ya henza igulu nahanzuka, “Nivwaha oveeye ku lovega lwange?” Vanene vaviri anoho vavaga vu munyumba yu vwami vamuhenzera mu lidirisha.

³³ Jehu yavavolera, “Musiuvi haasi!” Vamusiuva hasi kutura igulu na masahi geege guhuka ku lidigi nu ku zibarasi, kandi zibarasi ziamuduvaga.

³⁴ Jehu yingira munyumba yu vwami nalia chukulia kandi naanwa. Yavoola, “Vuguli mukali walaamwa oyo na mumute; kali ndio, aveeye mukaana wu mwami.”

³⁵ Navuzwa avasaza vatura kuzia kumuta sivanyoola kindu kuye mba, ni kitali kihanga chiche, vigumba vie virenge, ni vigalo vivie.

³⁶ Lwa vaavoolera Jehu amakuva yaga, yavoola, “Yaga nigo ga Yahova yavoola kuvitira ku tumikiri weve Elija; ‘Zimbwa zilakalie muviri gwa Jezebeli mu kivala cha Jezireeli.

³⁷ Zinyama ziu muviri gwigwe zilakasalanywe uwene yeyo kuli isingu, kunangwa mundu kali mulala sialakanyalize kugumanyiriza.’ ”