2 Avami 8 - KITABU KITAKATIFU

Mukali kutura Shunemu yirana

¹ Elisha yaali navoleeye mukali kutura Shunemu, wumuyaayi weve yaali nasimugukiziywi, Yahova azizaa kutuma inzara mu kivala ku mihiga saba. Kunangwa kuduuka ivi na avinyumba yooyo muzie komenya havundu handi.

² Mukali yaali nalondi malago ga Elisha, kandi yaali naziiyi na avinyumba yeeye komenya mu kivala cha Filisitia komenya yo ku mihiga saba.

³ Mu limalirika lie mihiga saba, yirana mu Isiraeli ma nazia ku mwami koteeva amakuva gi inyumba yeeye nu mulimi gwigwe, vamwilanyiri.

⁴ Yanyoora mwami namolomaa na Gehazi, mutumikiri wa Elisha; mwami yenya kumanya vilala ku vilolekizu via Elisha.

⁵ Lwa Gehazi yaali navolera mwami kuli Elisha yaali nasimugukizi mukuzu, mukali yateeva mateeva geege ku mwami. Gehazi yamuvolera, “Mwami wange, mukali zana nguyu kandi muyaayi weve wa Elisha yasimugukiza aveeye hano!”

⁶ Mu litivula ku liteeva liu mwami, mukali yadinyiriza aga Gehazi yaali navooye, nandio mwami yalanga munene mulala namuvolera yiranyiri mukali oyo ivindu viosi viali vivie, komeeda ku vuguli vwi vitagwa vie milimi jaali ni jaleeta ku mihiga saba ja yavula kuva ho.

Elisha nu mwami Benihadadi wa Siria

⁷ Elisha yazia Damasiko ing'inga yu mwami Benihadadi wa Siria yaali mulwaye. Lwu mwami yavolerwa ndi Elisha aveeye yo,

⁸ yavolera Hazaeli uwaali mulala ku vanene veve, “Vugula kihanwa uhiliri umuporofeti, umuvolere ateeve Yahova kumanya niiva ndahona anoho mba.”

⁹ Kunangwa Hazaeli yadwiika zing'amia arubaini misigo ji zing'ano ziosi zie vindu vilahi ligali ivialombwa kutura Damasiko ma Lwa Hazaeli yagana naye, yavoola, “Mutumikiri woovo, mwami Benihadadi umali kutuma inzi ngoteeve niiva alahona kutura mu vulwaye vwivwe anoho mba.”

¹⁰ Elisha yativura navoora, “Yahova umali kumbuulira ndi mwami Benihadadi alakuza; navuzwa zia kuye umuvolere ndi alahona.”

¹¹ Hene yaho, Elisha yamwumika vululu ni lihenza liu kutihiza mumoni mwimwe, kuduuka Hazaeli natanga kwigugunyia mu zisoni. Nonoho Elisha yaatanga kulira.

¹² Hazaeli yateeva “Kigira ki uliraa, munene wange?” Elisha yativura navoora, “Kigira manya vindu vidamanu via waza okole ku vandu va Isiraeli. Ulasaamba zimbinga ziavo nu muliru. Uliita avayaayi vaavo avalahi; ulasionolanyia avana vaavo kuduuka ku likuza, na ulaatanyia avakali vaavo avaveeye ni zinda.”

¹³ Hazaeli yateeva, “Nyara kuva ndi wi zinguru kuli ndio? Inzi simbeeye kindu mba.” Elisha yativura, “Yahova umali kumanyia ndi ivi ulakave mwami wa Siria.”

¹⁴ Hazaeli yirana ku Benihadadi, uwamuteeva, “Elisha avooye ki?” Hazaeli yativura, “Amboleeye ndi ivi ulahona ligali.”

¹⁵ Navuzwa ku lidiku lialonda ku, Hazaeli yavugula mulingedi, nagwiina mu mazi kandi nafuma mwami mumoni nagwo, ma mwami yakuza. Na Hazaeli yavugula vogono vwivwe kuli mwami wa Siria.

Mwami Jehoramu wi Ivuyuda

¹⁶ Mu muhiga gwa katano gwu vwamihi vwa Joramu muyaayi wa Ahabu kuli mwami wa Isiraeli, Jehoramu, muyaayi wa Jehoshafati yagwa mwami wi Ivuyuda,

¹⁷ naveeye ni mihiga salasini na mbiri, na yamiha mu Jerusalemi ku mihiga munane.

¹⁸ Mukali wa Jehoramu yaali mukaana wu Mwami Ahabu, kandi kuli avinyumba ya Ahabu, yalonda miima nindamanu jia va Isiraeli. Yakola uvwoni mu zimoni zia Yahova.

¹⁹ Navuzwa Yahova siyavugilira kudiviza Ivuyuda mba, kigira yaali ni yasuuviriza mutumikiri weve Daudi ndi visukululwi veve valazizagilira kwamiiha mihiga ni mihiga.

²⁰ Mu ing'inga yu vwamihi vwa Jehoramu, avandu va Edomu vibaara ku vandu vi Ivuyuda, ma ni viyamiiha aveene.

²¹ Maku Jehoramu yazia na magere gu vulwani geege goosi ha Zairu, uwi liihi lia Vaedomu liavakumbiriza. Mu ing'inga yu vudiku, oyo harara na vanene va magare gu vulwani veve vanyaliza kutura ichova nu kwiruka na avasikari vu vulwani veve ni vasalana ni vazia mu zingo ziavo.

²² Kutura lwene yilwo, kivala cha, Edomu chiyamiihaa ichene kutura ku Ivuyuda. Mu ing'inga ndala nzere, lidaala linene lia Libuna nalio liebaala kandi.

²³ Vindu vindi viosi via Jehoramu yakola viang'odwa mu kitabu cha makuva ga kale ga vami vi Ivuyuda.

²⁴ Jehoramu yakuza kandi yayavirwa mu vilindwa viu vwami mu lidaala linene lia Daudi, na muyaayi weve Ahazia yavugula ovogono vwivwe kuli mwami.

Mwami Ahazia wi Ivuyuda

²⁵ Mu muhiga gwa komi na mbili gwi liamiiha lia Joramu muyaayi wa Ahabu kuli mwami wa Isiraeli, Ahazia muyaayi wa Jehoramu yagwa mwami wi Ivuyuda

²⁶ naveeye ni mihiga sirini na mbili, na yamiha mu Jerusalemi ku muhiga mulala. Mama weve yaali Azalia mukaana wu Mwami Ahabu mwisukulu wa Omuri.

²⁷ Kigira Ahazia yaali mwiko wu mwami Ahabu ku lileeta mukaana weve, yoona imbiri, wa Yahova kuli avinyumba ya Ahabu vakora.

²⁸ Mwami Ahazia yahambana nu mwami Joramu wa Isiraeli kulwaana mwami Hazaeli wa Siria. Mahi galwaanira ha Ramozi mu Gileadi, na Joramu yatwa zing'oma mu liihi.

²⁹ Mwami Jehoramu yirana mu lidaala linene lia Jezireeli kulwalizwa mbula ahone zing'oma zia Vasiria vamwaatira ha Rama, lwa yalwana na Hazaeli mwami wa Siria. Ahazia muyaayi wa Jehoramu mwami wi Ivuyuda yasulunguta yo kuzia ku muloraa kigira yaali mulwaye.