2 Avami 7 - KITABU KITAKATIFU

¹ Elisha yativura navoora, “Hulira ku aga Yahova avoora! Kuduuka ku ing'inga yiyi mugamba, mulava avanyala kugura mu Samaria zikilo zivaga zie ingano indahi ligali anoho zikilo sita zia ishairi ku kedonye kilala chi ifeza.”

² Munene wu mwami wa himbi ligali yavolera muporofeti Elisha, “Yago siganyala kwekoleka ku mba kali niiva Yahova mwene yakatumi uvuswage kuli imbura ku ing'inga ndala!” Navuzwa Elisha yamuvolera, “Ivi ulagalola nigekolekaa, navuzwa si ulalia ku chukulia yicho kali hakuzu mba.”

Liihi lia Siria Liruka

³ Vasaza vane avaari ni valwaala vulwaye vwo vogere vaali ichova wi virivwa via Samaria. Vavolerana aveene na vene, “Kigira ki kulindi hano kuduuka lwa kukuza?

⁴ Sigali no vokonyi ukuzia mu lidaala linene mba, kigira kulava ni inzara kuduuka lwa kukuza; navuzwa niiva kulava hano, kulakuza kandi. Kunangwa, ng'endi kuzie hokososa ha vandu va Siria; kindu kidamanu ligali cha vanyara kokora ku kunyi ni kukwiita. Navuzwa hawundi valaleka kove mwoyo.”

⁵ Kunangwa lwa isi ni kikiri imwamu, vazia kuduuka hokososa ha Vasiria, navuzwa lwa vaduuka yo, sihali ho nu mundu kali mulala mba.

⁶ Yahova yaali naakori Vasiria vahuliri ichahulilika kuli muliviti gwi lingilira lie liihi linene ligali, ni zibarasi kandi na magare gu vulwani. Vasiria vaganagana ndi mwami wa Isiraeli yaali kulaga kutunga avami va Egebeti na Vahiti harara na amahi gaavo ukuuza kwingilira nu kulwaana navo.

⁷ Kunangwa, uvudiku yivwo Vasiria vaali ni viiruki kohonyia livamwoyo liavo, ni vaang'araa ahokososa haavo ni haveeye vuzwa kuli haali valeka zibunda, zibarasi na mahema.

⁸ Lwa vasaza vane yavo vaduuka kundulu kwo hokososa, vingira mu lihema, ni valia no kunwa ichaali mu ni vavugura izahabu ni feza ya vanyoola, ma ni vazia ihale kuvivisa. Maku virana, ni vingira mu lihema lindi ni vakora malala mere.

⁹ Navuzwa ahene yaho vavolerana, “Sigakuduukiraa kove ni kokoraa yaga mba! Koveeye na makuva malahi na sigenyekaa kukiring'ane nago mba. Niiva kulinda kuduuka ni vwakacha ku kugavoole, koveeye na giligali ndi kulahevwa amageri. Genda kuzie vwangu na kovolere vanene vu mwami!”

¹⁰ Kunangwa vatura hokososa ha Vasiria, nivirana Samaria ha kirivwa; nivalanga avalindi, “Kunyi kuziiyi kuduuka mu hokososa ha Avasiria na sikololi anoho kuhulira mundu mba; zibarasi ni zibunda zikiri kovoholorwa, na amahema gaveeye vuzwa kuli vandu Vasiria vagaleki.”

¹¹ Avalindi vi virivwa valandiza makuva malahi yaga, kandi gavolerwa munyumba yu vwami.

¹² Vwali ni vukikiri vudiku, navuzwa mwami yatura mu kidali, kandi navolera avanene veve, “Ndamuvolera icha Vasiria valohiza kokora. Vamanyi makuva ge etozo eveeye hano! Kunangwa vamali koleka hokososa haavo kuzia kwivisa mu milimi. Vaganagana ndi kulatula mu lidaala linene kuzia kwenya chukulia, maku vaze kukugimira ni koveeye mwoyo kandi ukugumira lidaala linene linu.”

¹³ Mulala ku vanene veve yavoola, “Avandu hano mu lidaala linene vadiviziywi, kuli yavo avamali kukuza. Kunangwa leka kutumi avasaza valala kuduuki kumanyiriza ichekoleki.”

¹⁴ Vatovora vasaza valala na umwami yavatuma mu magare gaviri gu vulwani. Kolola ichekoleki ku liihi lia vandu Vasiria.

¹⁵ Vasaza vazia kali kuduuka ku mugera gwa Jorodani. Valora zinguvu ni vindu via vandu va Siria vaang'araa lwa virukaa. Viraana nivavolera mwami.

¹⁶ Avandu va Samaria vazia vwangu ni valanya ahokososa ha vandu va Siria. Kandi, kuli Yahova yaali navooye, zikilo zivaga zie ingano indahi anoho zikilo sita zie ishairi ziagulizwa ku kedonye kilala chifeza.

¹⁷ Gekoleka ndi umwami wa Isiraeli yavika kirivwa chi lidaala linene haasi hu vunyali vwa uwaali munene weve wa himbi. Munene oyo yaduvagirwa ahene yaho na vandu ma nakuza kuli Elisha yaali naporofeti.

¹⁸ Elisha yaali navoleeye mwami ndi kuduuka ku ing'inga yeyo lidiku lilondaku, zikilo zie ingano indahi anoho zikilo sita zie shairi, zilakagulizirwi kedonye kilala chi ifeza mu Samaria.

¹⁹ Munene oyo yaali nativuyi nu kovora, “Yago siganyala kwekoleka ku mba, kali niiva Yahova mwene yakatumi vuswage kuli imbura ku ing'inga ndala!” Kandi Elisha yaali nativuyi namuvooleye, “Ivi ulagalola ni gekolekaa, navuzwa siulalia ku chukulia yicho mba.”

²⁰ Na nindio gekoleka kuye, yakuza, naduvagwa kuduuka ku likuza na vandu vaali ha kirivwa chi lidaala linene.