2 Avami 5 - KITABU KITAKATIFU

Naamani ahonywaa ovogere

¹ Naamani, munene wi liihi liu mwami wa Siria yaali mundu munene wayanzwa kandi wahevwa luyali ligali nu mwami wa Siria, kigira kuvitira ku Naamani, Yahova yaali ni yahaana liguuta ku amahi ga Siria. Yaali musikari munene ligali, navuzwa yalwala ovogere.

² Lwa vingilira Isiraeli, avandu va Asiria vavugura mwana mukaana mulala wagwa mutumikiri wu mukali wa Naamani.

³ Lidiku lilala, yavolera mukali wa Naamani “Ndakayanzi munene wange azie ku muporofeti umenyaa mu Samaria. Anyala kumuhonyia uvulwaye vwivwe.”

⁴ Lwa Naamani yahulira amakuva yaga, yazia ku mwami namuvolera agu mukaana oyo yaali namuvooleye.

⁵ Mwami wa Siria yavoola, “Zia ku mwami wa Isiraeli na umuhiliri ibarwa yiyi.” Kunangwa Naamani yazia, navugura zielefu salasini zie vidonye viefeza, zielefu sita zie izahabu kandi zinguvu likomi zinzesereru zie lisavo.

⁶ Ibarwa ya yaahira yasoma kuli ndi; “Ibarwa yiyi ilamanyia mutumikiri wange Naamani. Nyenya ivi umuhonyie kutura ku vulwaye vwo vogere vwivwe.”

⁷ Lwu mwami wa Isiraeli yasoma ibarwa zana, yatandula zinguvu zizie mu vovereri vonene, “Mwami wa Siria anyala kuganagana ndi inzi nyara kohonyia mundu uyu? Aganagana ndi inzi mbeeye Nyasaye, kandi wi zinguru zie livamwoyo Ni likuza? Gaveeye havulavu ndi atangizaa uvutindi ninzi!”

⁸ Lwu muporofeti Elisha yahulira ichaali ni chekoleki, yatuma likuva ku mwami navoora “Kigira ki ivi nutandula zinguvu zizio? Tuma musaza oyo ku inzi ku aduuki kumanya ndi haveeye nu muporofeti mu Isiraeli!”

⁹ Kunangwa Naamani yazia ni zibarasi zizie kandi na magare gu vulwani kandi na singira ha kiliango chi inyumba ya Elisha.

¹⁰ Elisha yatuma mutumikiri mulala ichova kuvolera Naamani azie kwisaava mu mugera gwa Jorodani haali saba, naye alahona vogere vwivwe ligali.

¹¹ Navuzwa Naamani yatura ho nu vutima ovonene navoora, “Nganaganangi ndi alatula ichova kuuza ku inzi, asaale ku Yahova Nyasaye weve, kuhavatiza mukono gwigwe ahe liguli liveeye no kombonyia ovogere vwange!

¹² Komeeda ku gene yago, migera ja Abana na Farapari, migera ja Damasiko, sigiveeye milahi kuvita mugera ku gwosi mu Isiraeli? Ngano ndaali ndakisaavi mujo ma ndahonywa!”

¹³ Mutumikiri weve yazia kuye namuvolera, “Mwami wange, niiva muporofeti yaali akovolere ukole kindu keveeye kidinyu, ngano siwaali okekole. Navuzwa kalunu, kigira ki utisaava mwene kuli avooye ma ohone?”

¹⁴ Kunangwa Naamani yasulunguta kuzia mu mugera gwa Jorodani, ni yiyinamu umwene haali saba kuli muporofeti yavoola, na yahonywa ligali. Inyama yu muviri gwigwe yagwa indinyu kandi yu vulamu, kuli gwu mwana mudoto.

¹⁵ Naamani na vandu veve vosi virana ku muporofeti Elisha. Yavoola, “Kalunu ndakamanya ndi sihali ho na nyasaye wundi navuzwa Nyasaye wa Isiraeli yeng'ine. Kunangwa, mwaza, yaanza vugilira kihanwa chu kuyanziza kutura ku inzi mutumikiri woovo.”

¹⁶ Elisha yativura navoora, “Nzisuha ku lieta lia Yahova oveeye mwoyo, uwa inzi ndumikiraa, sindavugilira kihanwa kutura ku ivi mba!” Naamani yaanigiriza ndi avugiliri kihanwa yiki navuzwa Elisha yasura.

¹⁷ Kunangwa Naamani yavoola, “Niiva siulavugilira kihanwa change, leka mbuguli misigo ja marova agaduuka zisukiri ziviri kigira kutura lero kuzizagilira imbiri, inzi mutumikiri woovo sindahaana kandi kisiuviriru nu kusigamira munyasaye wundi natali Nyasaye wa Isiraeli.

¹⁸ Suuviraa Yahova alasamiiha lwanzia harara nu mwami wange mu litembeli lia Rimoni munyasaye wa Siria nu kumusigamira. Ligali Yahova alasamiiha mutumikiri woovo ku makuva yaga!”

¹⁹ Elisha yavoola, “Zia mu mirembe!” Ma lwa Naamani yatura kuzia, ni yakazia vuzwa ihale hake.

²⁰ Gehazi mutumikiri wa Elisha yevolera umwene, “Munene uleki Naamani azie vugira kutunga kindu. Ngano yaali avugiliri chu Musiria ula ahaani kuye. Ku Yahova Oveeye mwoyo, inzi ndamulondelera ma nduuki konyoora kindu kutura kuye.”

²¹ Kunangwa yaatanga kolondelera Naamani. Lwa Naamani yalora mundu naamulondelera, yika haasi kutura ku ligare lilie liu vulwani, navoora, “Koveeye ni kindu kidamanu noho?”

²² Gehazi yativura navoora, “Awa! Navuzwa munene wange undumi ngovolere ndi ulwene yilu vaviri ku avaporofeti, vaduuki kutura mu vigulu via Efuraimu, na yakenyi ivi umuhe vidonye viefeza 3,000 kandi zinguvu zinzesereru ziviri ziu kwigirunganyia.”

²³ Naamani yavoola, “Mwaza yaanza; vugula vidonye viefeza zielefu sita.” Yamuniga ku gene yaga, kandi navoha vidonye viefeza zana mu misigo giviri, ni zinguvu zie lisavo zinzesereru ziviri, nadwiika avatumikiri veve vaviri kuviginga nu kuvihira imbiri wa Gehazi.

²⁴ Lwa vaduuka ku kiguru aha Elisha yamenya, Gehazi yavugula misigo giviri yijo nagihira munyumba yeeye. Maku yavolera avatumikiri va Naamani viirane.

²⁵ Gehazi yirana munyumba zana na Elisha yamuteeva, “Utura hayi?” Gehazi yativura, Oh, “Havundu mba munene wange.”

²⁶ Navuzwa Elisha yavoola, “Sindaali yo mu Roho lwa musaza oyo yatura mu ligare lie liihi lilie kukwaganira? Yiyi sieveeye ing'inga yu kuvugilira mabese ku zinguvu, milimi ji mizeituni ni vizabibu, magondi ni zing'ombe anoho avatumikiri!

²⁷ Na kalunu, ovogere vwa Naamani vulaza ku ivi, na ivi harara ni visukululwi vovo mulava navwo mihiga ni mihiga!” Lwa Gehazi yatura, yaali novogere, ligodo lilie liali lilavu kuli likonza.