2 Avami 4 - KITABU KITAKATIFU

Elisha Akoonyaa mukali mukunzakali

¹ Mukunzakali mulala ku vu muganda gwa vaporofeti yazia ku Elisha namuvolera, “Mwami wange, musaza wange yakuza! Kuli ivi umanyi, yaali mundu watia Nyasaye, navuzwa kalunu, umuvazi weve yaazaa kuvugura avayaayi vange vaviri kuli avatugwa veve.”

² Elisha yamuteeva, “Nyara kokokolera ki? Mbolera, oveeye na ki munyumba yooyo?” Yativura navoora, “Simbeeye ni kindu munyumba nitali ijuba engekeeke ya maguta ga muzeituni.”

³ Elisha yamuvolera, “Zia ku vatende vovo vosi na usave viju iviere vitali mu ni kindu; sava vinyingi kuli unyala.

⁴ Maku ivi na vayaayi vovo muzie munyumba, muhaane kiliango, ma mutange litulula amaguta mu viju. Viika vuli kiju halovega lwa kiva ni chizuuyi.”

⁵ Kunangwa mukali yazia munyumba na vayaayi veve, nahana kiliango, navugura kajuba kadii ka maguta ga muzeituni, ma ni yitulura amaguta mu viju kuli avayaayi vamuletera.

⁶ Lwi viju zana viali ni viakiizula, yavolera muyaayi weve, “Ndetera kiju kindi.” Naye yamuvolera, “Sihaveeye ho ni kindi mba.” Na maguta galekela kwidoroka.

⁷ Mukali yirana ku Elisha, muporofeti, uwamanya namuvolera, “Zia ugulize amaguta ga muzeituni zana na utungi magovi googo goosi, na halava na mabese gaduukaa aga ivi na vayaayi vovo mutumikiraa.”

Elisha na mukali mutugi kutura Shunemu

⁸ Lidiku lilala, Elisha yazia Shunemu wu umukali mutugi yamenya. Mukali zana yamugenihiza azie kulia chukulia, na kutura ulwene yilwo kuzizagilira, vuli ing'inga lwa Elisha yazizaa Shunemu, yanyoora chukulia chiche munyumba yeeye.

⁹ Mukali zana yavolera musaza weve, “Henza, kalunu ndolaa ndi mundu uvitira hano kazozo uyu aveeye mundu mutakatifu wa Nyasaye.

¹⁰ Genda kwumbake akayumba kadi igulu wi inyumba yitu yiyi, kumuvikiri mu kidali, emesa, endeve kandi itaya, kunangwa ave unyala komenya mu lwa ava nakuluutaa.”

¹¹ Lidiku lilala Elisha yirana Shunemu ma nazia mu kayumba keeke kosoosa.

¹² Yavolera Gehazi mutumikiri weve azie kulanga mukali mwene nyumba. Lwu mukali oyo yaza,

¹³ Elisha yavolera Gehazi, “Teeva mukali uyu icha nyara kumukolera kumwiranyira uvulahi kigira lididikana lia yaveeye nalio mu likuhaanira viosi via kwenya. Hawundi anyala kuyaanza nzie ku mwami anoho ku munene wi liihi kumuteevera likuva.” Mukali yativura, “Mbeeye navio viosi ivia nyenya hagati ha vandu vange.”

¹⁴ Elisha yateeva Gehazi, “Kunangwa nyara kumukolera ki?” Gehazi yativura, “Vulahi, siaveeye ku nu mwana muyaayi mba, na musaza weve aveeye musakulu.”

¹⁵ Elisha yativura navoora, “Muvoolere, yaze hano.” Mukali zana yaza nasingira mu kiliango,

¹⁶ na Elisha yamuvolera; “Ku ing'inga yiyi muhiga guzaa, ulava nu gumiyi mwana muyaayi mu makono googo.” “Mukali oyo yahuga, Oh! Mwaza, mwami, utambehera mba. Ivi oveeye mundu wa Nyasaye!”

¹⁷ Navuzwa kuli Elisha yaali navooye, ahimbi ku ing'inga yeyo muhiga gwalonda ku, mukali oyo yivula mwana muyaayi.

¹⁸ Lidiku lilala lwo muyaayi uyu yaali ni yakaviruka, yazia ku baba weve uwaali mu mulimi hagati ha avagesi.

¹⁹ Na yavolera baba weve “O, mutwi gwange, mutwi gwange gunduyaa!” Baba weve yavolera mutumikiri weve, “Mugiingi mumuhili ku mama weve.”

²⁰ Mutumikiri yaginga muyaayi zana nu kumwilanyia ku mama weve, uwamulela ku magulu geege kuduuka mbasu hagati, ma nakuza ing'inga yeyo.

²¹ Mama weve yamuginga nu ku muhiraa mu keng'oze cha Elisha namwalihiza ku kidali ma natura, nahana kiliango inyima weve.

²² Maku yalanga musaza weve namuvolera, “Tuma mutumikiri hano ni bunda. Nyenya nzie ku muporofeti Elisha. Ndirana vwangu kuli nyaliza.”

²³ Musaza weve yateeva “Kigira ki uzie kalunu? Siliveeye lisabato kinga lisavo liu Mweli Muhia.” Yativura, “Utahenda mwoyo mba.”

²⁴ Maku yetegekiza ibunda, ma navolera mutumikiri weve, “Nyaguliza ibunda vwangu kuli inyala utagigendiza galaha ni ndakovooleye mba.”

²⁵ Kunangwa, yazia ku kiguru cha Karimeli uwa Elisha yaali naziiyi. Elisha yamulola nakikiri ihale, kandi navolera mutumikiri weve Gehazi, “Henza, nguyio mukali kutura Shunemu yaazaa!

²⁶ Nyagura kuye vwangu kumwaganira, na umuteeve, gikaveeye mirembe nu musaza weve naho? Gikaveeye mirembe nu muyaayi weve naho?” Mukali oyo yavolera Gehazi ndi vindu viosi viveeye vulahi,

²⁷ navuzwa lwa yaza ku Elisha, yinama imbiri weve nagumira ku virenge vivie. Gehazi yaali ahimbi kumusuunda ihale, navuzwa Elisha yavoola, “Leka ave. Siunyala kolola aveeye no vovereri vonene ligali? Na Yahova uvuli kombolera kindu choosi.”

²⁸ Mukali yamuvolera “Mwami wange, ndakusava mwana muyaayi? Sindakovolera, ‘Utangada mba?’ ”

²⁹ Elisha yagirung'ana ku Gehazi, navoora, “Kola vwangu! Vugula imbimbu yange na uzie. Utasingira kucheliza mundu woosi wa wagaana naye mba. Na niiva mundu alakucheliza, utavugula ing'inga kutivula mba. Zia vulungi munyumba na uviiki imbimbu yange ku muyaayi zana.”

³⁰ Mukali zana yavolera Elisha, “Nzisuha ku lieta lia Yahova oveeye mwoyo kandi ku ivi ndi sindakoleka mba!” Maku vombi vaviri vatanga kwirana.

³¹ Gehazi yimilira kuzia imbiri wavo kandi naviika imbimbu ya Elisha ku mwana oyo, navuzwa sihaaliho nu mwoyo kinga kelolero kindi chi livamwoyo muye mba. Kunangwa yirana kuzia kwagana Elisha navoora, “Mwana muyaayi siavuuki mba.”

³² Lwa Elisha yaduuka, yazia yeng'ine mu keng'oze kandi nalora musoleri naagoni mukuzu ku kidali.

³³ Yahaana kiliango nasaara ku Yahova.

³⁴ Maku yagona vulungi ku muyaayi, naviika munwa gwigwe, zimoni, na makono ku muviri gwu muyaayi. Kuli yagona vulungi ku mwana oyo, muviri gwu muyaayi gwatanga konyoora uluuya.

³⁵ Elisha yavuka, nagendagenda munyumba, ma kandi ni yirana kuzia kogona vulungi ku muyaayi oyo. Muyaayi zana yitiamula haali saba, ma kandi nakunura zimoni zizie.

³⁶ Elisha yalanga Gehazi namuvolera alange mama wu mwana oyo. Lwa yingira, Elisha yamuvolera, “Muyaayi woovo nguyu.”

³⁷ Mama wu mwana yagwa ha virenge via Elisha, vweni vwivwe ni vudira haasi; maku yavugula mwana weve nazia.

Vilolekizu vindi viviri

³⁸ Ing'inga indala, lwe etozo yaali ho mu kivala choosi, Elisha yirana Giligali. Lwa yaali ni yigizaa muganda gwa avaporofeti, yavolera mutumikiri weve atengeke isika ku mahiga na avadekere umunyu gwi zinguza ninyama.

³⁹ Mulala kuvo yazia mu mulimi ukwaaha zinguza. Yanyoora iliungu liu mbulimu ma nanoga vimuga vinyingi kuli yaali anyala kugingira kunguvu yeeye. Yavileeta navidonyanyira mu isika yi zinguza, natamanyi icha gaveeye.

⁴⁰ Yinulira avasaza yavo zinguza valie, navuzwa nonoho lwa vazazama ku, vahanzukira Elisha, “Elisha, isumu iviikiywi mu.” Na sivali vanyara kuzilia mba.

⁴¹ Elisha yavoola, “Ndeteri uvusie.” Na yaavuviika mu isika zana, navoora, “Yinulira avasaza yava vaduuki kulia.” Na sihaali ni kindu kidamanu nazio mba.

⁴² Ing'inga yindi, mundu musaza yaza kutura Baali Shalisha naletera Elisha milaango sirini ji migadi ijalombwa kutura ku ligesa liu kutanga lie ingano muhiga yigwo; ni viangala viivisi vie ingano mu ligunia lilie. Elisha yavolera mutumikiri weve, alihize muganda gwa vaporofeti ni viukulia yivio.

⁴³ Navuzwa mutumikiri zana yativura navoora, “Uganaganaa yiki kiladuuka avasaza imia ndala?” Elisha yativura, “Vahe valie, kigira Yahova avoora ndi valalia kandi kilatigala ku.”

⁴⁴ Kunangwa mutumikiri oyo yavasundira chukulia, kandi, kuli Yahova yaali navooye, vosi valia na sihaali ho ni kindi ichatigala.