2 Avami 25 - KITABU KITAKATIFU

Liigwa lia Jerusalemi

¹ Mu muhiga gwa tisa gwi liamiiha liu mwami Zedekia, mu mweli gwi likomi, ku lidiku lie likomi; Nebukadineza mwami wa Babiloni yaza harara na vasaza vi liihi lilie vosi kwingilira Jerusalemi, ni valikumbiriza, ni vumbaka amahema gu vulwani ku zinduru zia Jerusalemi.

² Lidaala linene yili liakumberizwa kuduuka mu muhiga gwa kumi na moja gwi liamiiha liu mwami Zedekia.

³ Ku lidiku lia tisa, mu mweli gwa kane, inzara yaali inyingi mu lidaala linene lia Jerusalemi, na sihali ho ni chukulia ku avandu mu kivala.

⁴ Madigi gi lidaala linene gafudulwa umuluhu kali niiva avandu va Babiloni vaali ni vakumberizi lidaala linene, avasikari vosi viruka ing'inga ya vudiku kuvitira kunzira yu mmulimi gwu vwami, ni vavitira mu kirivwa chahambanyia madiji, ni vazia ha livona lio mugera gwa Jorodani.

⁵ Navuzwa iliihe lia vandu va Babiloni lialonda mwami Zedekia, ni limugumilira mu kereremo ahimbi na Jeriko, na vasikari veve vosi viruka ni vamuleka.

⁶ Ma vavugura mwami Zedekia ni vamuhira ku mwami Nebukadineza, uwaali mu lidaala linene lia Ribula. Na hene yaho, mwami Nebukadineza yavitiza likalaga ku Zedekia.

⁷ Hene yaho, avana vayaayi va Zedekia viitwa Zedekia nalora. Nebukadineza yaatuliza zimoni zia Zedekia, naamuvoha ni minyororo, ma naamuhira Babiloni.

Liononywa lie Litembeli

⁸ Ku lidiku lia saba, mweli gwa katano, mu muhiga gwa kumi na tisa gwi liamiiha liu mwami Nebukadineza wa Babiloni; Nebuzaradani waali muhaani wiziganagani wu mwami kandi uwaali mwimiliri wi liihi, yaza mu Jerusalemi.

⁹ Yasamba Litembeli lia Yahova, inyumba yu vwami, harara ni zinyumba zia avandu vanene mu Jerusalemi,

¹⁰ na vasikari veve vaduya nu kuvasambula madiji gi Lidaala linene lia Jerusalemi.

¹¹ Hene yaho, munyabara waali mwimiri wi liihi lia Nebukadineza yavugula avandu vaali ni vatigaye mu lidaala linene vosi naavahira Babiloni mu kivala cha vahambe; vaali harara na vasaza avaari ne limanya linene, avasiza na avatuli.

¹² Navuzwa yaleka Ivuyuda avandu valala avaari vadaka ligali, avataali ni miandu, navavika kuyinzira mu milimi je mizabibu.

¹³ Vababilonia vatanyia zitiru zie migasa mu vidonye, na magare gu kuginga vindu agaali mu Litembeli, harara ni lidangi, linene liu mugasa, kandi vahiraa Babiloni mugasa gwosi.

¹⁴ Kandi vavugura mijiko jiosi, kandi iviju viukuviika mu ligoke liatumikaa kunihiza vwali, iviju viatumikaa kukinga zitaya, iviju viatumikaa kukingiliza amasahi kutura ku visiuviliru, iviju viatumika kusaamba vimuli viu mwayu, harara ne viju vindi viumugasa viosi iviatumika mu vuyinziri mu Litembeli.

¹⁵ Vavugura kandi vindu viosi vialombwa kutura ku izahabu anoho ifeza, harara ni zibakuli zinguzuzu ni vifuria viatumikaa kuginga amanda gu muliru.

¹⁶ Vindu viu mugasa viu mwami Solomoni yaali nalombi mu Litembeli, zitiru ziviri, magare gu kuginga vindu, harara ni lidangi linene viali vilitu ligali kogerwa.

¹⁷ Zitiru ziviri ziafanana; na vuli indala yaali uvutambi zimita munane, na kondongozi kwa vuli itiru kwaali nu mugasa, vutambi imiita 1.3 Vuli kondongozi yi itiru kwali nu mugasa gwalombwa na mangirinya kuli amakuyu gu musaala gwu mukomamanga.

Vandu vi Ivuyuda vaahirwa mu Babiloni

¹⁸ Komeeda ku vandu vo munyabara, munene wi liihe lia Nebukadineza yaahira mu kivala chu vuhambe; yaahira kandi Seraya musaalisi munene, Zefania musaalisi olondela musaalisi munene, na vanene vaduukiru vandi vavaga vu mu Litembeli.

¹⁹ Kutura mu lidaala linene yaahira munene mulala waali munene wa mahi, avahaani vi zing'anagani vatano vu mwami avaari ni vatigara mu lidaala linene, mulondeliri wo munene wavika mang'oda gu kwizuliza vulwani, harara na vasaza vandi avadukiru sitini.

²⁰ Nebuzaradani yavahila ku mwami wa Babiloni, waali mu lidaala linene lia Ribula

²¹ mu zinzako zia Hamazi. Hene yaho, mwami yavoola vakuywi kali kuduuka ku likuza. Na vandu vi Ivuyuda vaahirwa ihale mu vuhambe kutura mu kivala chavo.

Gedalia, munene wi Ivuyuda

²² Mwami Nebukadineza wa Babiloni yakola Gedalia, muyaayi wa Ahikamu, mwisukulu wa Shafani, ave mwamihi wi Ivuyuda, kandi namuviika yamihi yavo vosi avavura kuhilwa Babiloni.

²³ Lwa vanene vi Ivuyuda na avasikari va mahi, avavura kwihana aveene ku Vababilonia vahulira amakuva yaga, viiyunga na Gedalia ha Mizipa. Avanene yava vaali Ishimaeli muyaayi wa Nezania, Johanani muyaayi wa Karea, Seraya muyaayi wa Tanihumezi, kutura mu lidaala lia Netofa, na Jezania kutura Maaka.

²⁴ Gedalia yavavolera, “Muheezaa likuva liange ndi mutatia avanene va Babiloni mba. Mumenye mu kivala yiki, mutumikiri mwami wa Babiloni, na goosi galava malahi ku munyi.”

²⁵ Navuzwa mu mweli gwa saba gwu muhiga yigwo, Ishimaeli muyaayi wa Nezania, mwisukulu wa Elishama, waali mulala ku vinyumba yu vwami, yazia Mizipa na vasaza likomi, niyingilira Gedalia nu kumwiita. Yita kandi Visiraeli na Vababilonia avaari yo harara na Gedalia.

²⁶ Hene yaho Visiraeli vosi, avatugi na vadaka vaali kindu kilala, harara na avanene vi liihi, vatura ni vazia Egebeti, kigira vaali ni vatiiyi Vababilonia.

Jehoyakini avohololwa kutura mu jera

²⁷ Mu muhiga gwa Evili-Merodaki yagwa mwami wa Babiloni, yamanyia zimbavasi ku mwami Jehoyakini wi Ivuyuda ku limuvoholola kutura mu jera. Yaga gekoleka ku lidiku lia Sirini na saba liu mweli gwa komi na mbiri gwu muhiga wa salasini na saba inyima wa Jehoyakini yaali navuguliywi kuli muhambe.

²⁸ Evili-Merodaki yamulinda vulahi, kandi naamuha vwimiliri vwu luyali lunene ligali, kuvita vwa yaaha avami vandi avaari mu vuhambe harara naye mu Babiloni.

²⁹ Kunangwa Jehoyakini yahevwa munwa kugirung'ana kutura mu zinguvu zizie ziu vuhambe kandi kuzia kulia harara nu mwami kazozo mu livamwoyo lilie liatigala liosi.

³⁰ Vuli lidiku ku lohono lwa yaali mwoyo, yahevwaa amabese gu vutumiki vwa kazozo vwi lienya lilie.