2 Avami 24 - KITABU KITAKATIFU

¹ Lwa Jehoyakimu yaali mwami wi Ivuyuda, mwami Nebukadineza wa Babiloni yingilira kivala chi Ivuyuda, ku mihiga givaga, Jehoyakimu yanigwa kuva haasi hu vwamihi vwa Nebukadineza, maku, ni yibaala.

² Yahova yatuma miganda ji liihi lia vandu va Babiloni, Vasiria, Vamoabu, Vamoni kuzia kulwaana Jehoyakimu nu kudiviza kivala chi Ivuyuda, kuli Yahova yaali navooye kuvitira mu vatumikiri veve avaporofeti, gayenyaa kokora.

³ Yaga gekoleka kuli Yahova yaali nalagi, aduuki kutuliza avandu vi Ivuyuda imbiri weve kigira uvwoni vwosi vwu mwami Manase yaali ni yakola,

⁴ na kuvita ligali kigira avandu va yaali ni yita avatali ni kisaalia kuvo. Yahova siyaali unyala kusamiha Manase ku yaga mba.

⁵ Vindu vindi viosi viu mwami Jehoyakimu yakola viang'odwa mu vitabu via makuva ga kale ga vami vi Ivuyuda.

⁶ Jehoyakimu yakuza, na muyaayi weve Jehoyakini yavugula ovogono vwivwe kuli mwami wi Ivuyuda.

⁷ Mwami wa Egebeti harara na vandu vi liihi lilie sivatura mu Egebeti kandi mba, kigira mwami wa Babiloni kalunu yaali nu vunyali ku zinzako ziosi ziali zia Egebeti, kutura ku mugera gwa Efurate kuduuka ivaale wu lwako lwa Egebeti.

Mwami Jehoyakini wi Ivuyuda

⁸ Jehoyakini yaali ni mihiga komi na nane lwa yagwa mwami wi Ivuyuda, na yamiha mu Jerusalemi ku mieli givaga. Mama weve yaali Nehushita, mukaana wa Elinazani kutura Jerusalemi.

⁹ Jehoyakini yakola uvwoni imbiri wa Yahova, nalondaa liiva lia baba weve.

¹⁰ Yaali mu ing'inga yi liamiiha lia Jehoyakini lwa vanene vu mwami Nebukadineza valaga liihi lia Babiloni kwingilira nu kukumbiriza Jerusalemi.

¹¹ Ing'inga ye likumbiriza, Nebukadineza mwene yaza Jerusalemi,

¹² na mwami Jehoyakini, harara na mama weve, avayaayi veve, avanene veve, na vanene vi inyumba yu vwami, vihaana aveene ku vandu va Babiloni. Mu muhiga gwa munane gwi liamiiha lia Nebukadineza yaahira Jehoyakini mu vuhambe

¹³ navugura vindu viu vuguli kutura mu Litembeli nu munyumba yu vwami navihira Babiloni. Kuli Yahova yaali navooye, Nebukadineza yatanyia iviju vie zahabu viosi viu mwami Solomoni yaali nalombi vitumiki mu Litembeli.

¹⁴ Nebukadineza yaahira avandu va Jerusalemi mu vuhambe, avayaayi vosi vi inyumba yu vwami, na vasaza aviimiliri vosi, avandu zielefu likomi. Kandi yavugula avayinziri vi limanya linene harara na vasiza na vatuli, navuzwa natigaliza inyima avandu vaali vadaka ligali mu kivala chi Ivuyuda.

¹⁵ Nebukadineza yaahira Jehoyakini mu Babiloni kuli umuhambe, harara na mama weve, vakali veve, vanene veve na vasaza vimiliri vosi vi Ivuyuda.

¹⁶ Nebukadineza yaavugula kuzinguru avandu vanene vosi avaari ni limanya linene, navahira mu Babiloni. Avandu kutura Ivuyuda vosi vaali zielefu saba, na avayinziri elefu indala avaari ni limanya linene, harara na vasiza na vatuli. Avandu yava vosi, vaali avasaza vaduukana kuzia mu vulwani.

¹⁷ Nebukadineza yakola Matania, koza wa Jehoyakini, kuva mwami wi Ivuyuda, ma yamanya nagirung'anyia lieta lilie kuva Zedekia.

Mwami Zedekia wi Ivuyuda

¹⁸ Zedekia yaali ni mihiga sirini na moja lwa yagwa mwami wi Ivuyuda, na yamiha mu Jerusalemi ku mihiga kumi na moja. Mama weve yaali Hamutali, mukaana wa Jeremia kutura mu lidaala linene lia Libuna.

¹⁹ Mwami Zedekia yakola uvwoni imbiri wa Yahova, kuli mwami Jehoyakimu yakola.

²⁰ Yahova yavihilirwa ligali na vandu va Jerusalemi ni Ivuyuda, na yavatuliza imbiri weve. Zedekia yibaala ku mwami Nebukadineza wa Babiloni.