2 Avami 22 - KITABU KITAKATIFU

Josia Mwami wi Ivuyuda

¹ Josia yaali ni mihiga 8 (munane) lwa yagwa mwami wi Ivuyuda, na yamiha mu Jerusalemi ku mihiga salasini na moja (31). Lieta lia mama weve liali Jedida, mukaana wa Adaya, kutura mu lidaala lia Bozikazi.

² Josia yakola agaali malungi mu zimoni zia Yahova, kandi yagenda mu zinzira ziosi zia guuga weve mwami Daudi, vugira kugirung'ana halovega ku mukono mulungi kinga mumosi.

Kitabu chi Lilaga kenyooleki

³ Mu muhiga gwa komi na nane gwi liamiiha lilie, mwami Josia yatuma mung'odi wu mwami Shafani, muyaayi wa Azaria kandi mwisukulu wa Meshulami, kuzia mu Litembeli lia Yahova, na malago:

⁴ “Zia uduuki ku Musaalisi munene Hilicha na oleete amakuva gi livaliza lia mabese aga vasaalisi vaveeye ku miyinzi ha vwingiliru vwi Litembeli vamali kosolola kutura ku vandu.

⁵ Mumuvolere ahaane mabese yago ku vasaza avaheevwa vulindi vwu kusingilira uvwumbaki vwa hasasuguka mu Litembeli. Kuduuka vatungi

⁶ avasiza avavaazi, avumbaki na vatigiki va magina; kandi vaguli zimbaho na magina gavaazwa agatumikirwa kolomba ahasasuguka hi Litembeli lia Yahova.

⁷ Navuzwa sivenyekaa vahane livaliza lia mabese goosi ga vahevwa kulindira ku vandu mba, kigira vaveeye avasuuvirifu ligali.”

⁸ Shafani yahaana malago gu mwami ku Hilicha, na Hilicha yamuvolera ndi unyooye kitabu chi Lilaga mu Litembeli. Hilicha yamuha kitabu, na Shafani yakesoma.

⁹ Maku yirana ku mwami kandi nahaana mativuli gayanyoola: Avatumikiri vovo vamali kuvugura amabese gaali mu Litembeli lia Yahova na vamali kugahaana ku vasaza vasingilira ovolombi vwa hasasuguka mu Litembeli.

¹⁰ Na Shafani mung'odi yavolera mwami, “Musaalisi Hilicha mbeeye kitabu.” Na Shafani yakesoma vudinyu imbiri wu mwami.

¹¹ Lwu mwami yahulira amakuva gi kitabu chi Lilaga yicho, yatandula ziganza zizie nu vuveleri,

¹² yahaana amalago yaga ku Hilicha musaalisi, Ahikamu muyaayi wa Shafani, Akibori muyaayi wa Mikaya, Shafani mung'odi wu mwami, kandi ku Asaya mutumikiri wu mwami,

¹³ “Muzie mundeevere Yahova kandi mutevere avandu vosi vi Ivuyuda kigira miigizu gi kitabu yiki kimali konyooleka. Yahova aveeye nu vutima vonene na kunyi kigira avaguuga viitu sivakora amakuva gi kitabu yiki kevoolaa vakole mba. Sivakora kulondekana na makuva goosi agang'odwa mu kitabu yiki ku kunyi mba.”

¹⁴ Hilicha musaalisi, Ahikamu, Akibori, Shafani na Asaya vazia koteeva mukali walangwa Hilida, umuporofeti, wamenyaa mu losoma luhia lwa Jerusalemi. Musaza weve yaali Shalumu, muyaayi wa Tikiva na mwisukulu wa Harihasi, yaali mulindi wi zinguvu ziu mu Litembeli. Vamwivaalira goosi agaali ni gekoleki,

¹⁵ na yavavolera viirane ku mwami na vamuhe

¹⁶ amakuva ago kutura ku Yahova: “Nziza kuhaana umageri ku Jerusalemi harara na vandu vamenyi mu vosi, kuli gang'odwa mu kitabu chu mwami amali kosoma.

¹⁷ Vamali kondeka kandi vamali kuhaana visiuviliru ku vanyasaye vandi, nandio vamali kuvukiza uvutima vwange ku miyinzi ja vamali kokora. Uvutima vwange vwakiziywi ku Jerusalemi, navwo sivulasiminywa mba.

¹⁸ Navuzwa kigira mwami mwene, yiki nicho cha inzi, Yahova Nyasaye wa Isiraeli, mboraa: Ivi wahuliriza ku makuva gang'odwa mu kitabu,

¹⁹ nu wiganira kandi nu wegehiza umwene imbiri wange, nutandula zinguvu zizio nu kulira, lwa wahulira kuli ndatihiza kuhaana mageri ku Jerusalemi kandi ku vandu valio. Ndakalikole live lio kutihiza mu zimoni ziavo, havundu ha vandu valitumikira lieta liaho kuli kilaamo. Navuzwa mali kuhulira lisaala nukwidoloka maliga (kukwo), lwa wahulira kuli ndatihiza kuhaana mageri ku Jerusalemi kandi ku vandu valio. Ndalikola live liokodegeriza kandi chukuhuga ligali ku yavo avehenza kuli havundu ha vandu vatumikira lieta lialio kuli kilaamo. Navuzwa inzi mali kuhulira lisaala liilio

²⁰ na amaduywa ga nzizaa koleta ku Jerusalemi galaduukizwa vuzwa inyima wi likuza liilio. Ndaleka ivi ukuzi mu mirembe.” Avasaza yavo virana ku mwami Josia na makuva yago.