2 Avami 21 - KITABU KITAKATIFU

Mwami Manase wi Ivuyuda

¹ Manase yaali ni mihiga kumi na mbiri lwa yagwa mwami wi Ivuyuda, na yamiha mu Jerusalemi ku mihiga amusini na tano. Mama weve yalangwa Hefiziba.

² Manase yakola agaali madamanu imbiri wa Yahova, kuli likora lie kivihiri chi zihiiri zia Yahova yakunga kutura mu kivala cha vandu va Isiraeli.

³ Yumbaka kandi havundu hu kusigamira misambwa, aha baba weve Hezekia yaali ni yononyia. Yumbaka uvwali vwi lisigamira lia Baali kandi nalomba ivifananyi viu umunyasaye wi kikali, Ashera, kuli mwami Ahabu wa Isiraeli yaali naakori. Manase yasigamira zing'ereng'ani kandi.

⁴ Yumbaka uvwali vwu kusigamira misambwa mu Litembeli, havundu ha Yahova yaali navooye halava ahasigamirwaa.

⁵ Mu migizi giviri je Litembeli, yumbaka uvwali vwu kusigamira zing'ereng'ani.

⁶ Yahaana muyaayi weve kuli kihanwa chu kusambwa, kandi nakora uvulaguli nu vukumu, kandi nahaambana na vasigitiri kandi vavuuli. Yaakolera Yahova vwoni vonene ligali kandi yavuukiza vutima vwivwe.

⁷ Yavika kifananyi chu munyasaye wi kikali Ashera mu Litembeli, ahimbi na ha vundu ha Yahova yaali navoleeye Daudi kandi muyaayi weve, Solomoni: “Hano mu Jerusalemi, mu Litembeli yili, halava havundu hamali kotovola kutura mu kivala choosi chi zihiiri komi na mbiri zia Isiraeli kuli havundu hanyala kusigamirwa.

⁸ Na niiva avandu va Isiraeli valahulira amalago gange goosi nu kugumira lilaga liosi liu mutumikiri wange Musa yavaha, ahene yaho, sindavugilira vatulizwe mu kivala cha ndaha vaguuga vaavo mba.”

⁹ Navuzwa avandu vi Ivuyuda sivahulira Yahova, kandi mwami Manase yaavimilira kokora kali vwoni vwali vonene ligali kuvita uvwoni vwakolwaa ni zihiiri zindi zia Yahova yaali nakungi kutura mu kivala yicho lwa vandu veve viingira mu.

¹⁰ Kuvitira kuvatumikiri veve avaporofeti, Yahova yavoola,

¹¹ “Mwami wi Ivuyuda umali kokora uvwoni vwu kuvihiliriza yivu. Umali kokora kifavwi kinene kali kuvita vwa Vakanani vakora; kandi harara ni ivifananyi vivie, yimiliyi avandu vi Ivuyuda mu likora vwoni.

¹² Na kigira yaga, Inzi, Yahova Nyasaye wa Isiraeli, ndaleta ikivi ku Jerusalemi kandi Ivuyuda, na mundu woosi uhulira amakuva gi kivi yiki alahuga.

¹³ Ndahaana amageri ku Jerusalemi kuli ndakora ku Samaria, kandi ku mwami Ahabu wa Isiraeli na visukululwi vivie. Ndatuliza vandu vosi mu Jerusalemi kuli mulala yogizaa isahani kandi kuyo amazi kandi agikunaminya.

¹⁴ Ndakaleke vandu valahononoke, kandi ndakavahaane ku vasigu vaavo, avalivaguuta nu kulanya kivala chavo.

¹⁵ Ndakora yaga ku vandu vange kigira vamali konzonela, kandi vamali kuvukiza vutima vwange kutura ing'inga ya vaguuga vaavo vatura lwa vaatura Egebeti kuduuka lero.”

¹⁶ Mwami Manase yita avandu vanyingi ligali avaari vugira kisaalia, kuduuka kali zinzira zia Jerusalemi zidorokaa amasahi; yakola yaga komeeda ku limilira avandu vi Ivuyuda mu lisigamira vifananyi navakola kokora uvwoni imbiri wa yahova.

¹⁷ Vindu vindi viosi via Manase yakola, komeeda ku vwoni vwa yakola, viang'odwa mu vitabu via makuva ga kale ga vami vi Ivuyuda.

¹⁸ Manase yakuza kandi nayavirwa mu mulimi gwu vwami, mulimi gwa Uza, na muyaayi weve Amoni yavugula vogono vwivwe kuli mwami.

Mwami Amoni wi Ivuyuda

¹⁹ Amoni yaali ni mihiga sirini na mbiri lwa yagwa mwami wi Ivuyuda. Yamiha mu Jerusalemi ku mihiga giviri. Mama weve yaali Meshulemezi, mukaana wa Haruzi, kutura mu lidaala lia Jotiba.

²⁰ Kuli baba weve Manase, Amoni yakola uvwoni imbiri wa Yahova.

²¹ Yavugula liiva lia baba weve kandi nasigamira vifananyi via baba weve yasigamira, kandi navinamira.

²² Yasura Yahova, Nyasaye wa vaguuga veve, kandi natinguha lilaga lia Yahova.

²³ Avanene va Amoni vamuziila haasi kandi ni vamwitira munyumba yeeye yu vwami.

²⁴ Navuzwa avandu vi Ivuyuda vita avanene vita Amoni, kandi ni vakora muyaayi weve Josia kuva mwami.

Mwami Josia wa Ivuyuda

²⁵ Vindu vindi viosi via Amoni yakola, viang'odwa mu vitabu via makuva ga kale ga vami vi Ivuyuda.

²⁶ Amoni yayavirwa mu kirindwa mu mulimi gwa Uza, na muyaayi weve Josia yavugula vogono vwivwe kuli mwami.