2 Avami 20 - KITABU KITAKATIFU

Vulwaye vwo mwami ni lihona lia Hezekia

¹ Mu madiku yago mwami Hezekia yalwala kandi navuyika ligali. Muporofeti Isaya muyaayi wa Amozi yazia kuye namuvolera, “Yahova akovoleraa; ulungikize makuva gi inyumba yooyo vulahi, kigira uzizaa kukuza; siulahona mba.”

² Hezekia yagirungana nahenza mwidigi nasaara:

³ “Wizulizi, O, Yahova, inzi ndakutumikira nu vusuuvirifu vwu mwoyo gwange gwosi kandi nu luyali lwosi, kandi vuli kazozo, ndageriza kokora vulahi choosi ichawenyaa ngole.” Ma yaatanga kulira ligali.

⁴ Isaya yaleka mwami zana, navuzwa nakikiri kuvita mu mugizi gwa hagati, gwi inyumba yu vwami, Yahova yamuvolera

⁵ yirane ku Hezekia mwami wa vandu va Yahova, na muvolere; “Inzi Yahova, Nyasaye wa guuga woovo Daudi, mali kuhulira lisaala liilio kandi ndoli maliga googo. Inzi ndakohonyia vulwaye vuvwo, na mumadiku gavaga ulazia mu Litembeli.

⁶ Ndakuleka ove mwoyo ku mihiga 15. Ndakosoora harara ni lidaala linene yili lia Jerusalemi kutura kuzinguru ziu mwami wa Asiria. Ndakinga lidaala linene yili kigira lieta liange kandi kigira mutumikiri wange Daudi.”

⁷ Maku Isaya yavolera avatumikiri vadendaa mwami vavuguli lunyasi lwu kuvaka ulwaduuvwa kuli ovosera kutura ku makuyu na vavake ku kivimbira chiche, naye alahona.

⁸ Mwami Hezekia yateeva, “Ni kelolero ki kimanyia ndi Yahova alambonyia, kandi inyima wa madiku gavaga, ndanyaliza kuzia mu Litembeli?”

⁹ Isaya yativura navoora, “Yahova alakuha kelolero chu kumanyia ndi alalinda lilagana lilie. Kalunu, wakayanziliriyi ichiriri chi ingasi yi inyumba kizie imbiri vika likomi anoho chirane inyima vika likomi?”

¹⁰ Hezekia yativura navoora, “Liveeye liangu kokora ichiriri kuzia imbiri vika likomi! Lomba ni ichiriri chirane inyima vika likomi.”

¹¹ Isaya yasaala ku Yahova, na Yahova yalomba ichiriri chi ingasi yalombwa nu mwami Ahazi, ni chirana inyima ivika likomi.

Avatumwa kutura Babiloni

¹² Ahimbi ku ing'inga ndala nzere, Melodaki Baladani, mwami wa Babiloni, muyaayi wa Baladani, yahulira ndi mwami Hezekia yaveyange mulwaye, kunangwa yamutumira ibarwa nikihaanwa.

¹³ Hezekia yingiriza avatumwa yavo, kandi navamanyia uvutugi vwivwe, ifeza ni zahabu yeye, viafunya mwayu kuli mudarasini, kandi maguta gafunyaa mwayu, kandi ni viuma vivie viu vulwani. Sichali ho ni kindu mu zinyumba zizie ziosi mwa yavikaa vindu vivie, via yavula kuvamanyia mba.

¹⁴ Hene yaho muporofeti Isaya yazia ku mwami Hezekia nateeva, “Avandu yava vatuli hayi kandi vakovoleye ki?” Hezekia yativura, “Vatuli mu kivala chi ihale, vatuli Babiloni.”

¹⁵ Isaya yateeva, “Valoli ki munyumba yu vwami?” Hezekia yativura, “Valoli vindu viosi. Sikiveeye ho ni kindu mu zinyumba zia mavikiru icha mburi kuvamanyia mba.”

¹⁶ Hene yaho Isaya yavolera mwami Hezekia, “Yahova wanyala viosi avoora ndi

¹⁷ ing'inga yiza lwi vindu viosi munyumba yooyo yu vwami, vindu viosi via vaguuga vovo vaali ni vamala kuviika kuduuka lero, vilagingwa nu kuhilwa Babiloni. Si halava ni kilitigala mba.

¹⁸ Valala ku visukululwi vovo vene va wiivula, valahirwa ihale kandi kokolwa viziri vukutumika munyumba yu mwami wa Babiloni.”

¹⁹ Mwami Hezekia yamanya yaga gavoora ndi halava ho ni mirembe kandi ovososi kutura ku vulwani mu livamwoyo lilie, kunangwa yativura navoora, “Amakuva ga ombeeye gaveeye kutura ku Yahova, gaveeye malahi.”

Keheri chu vwamihi vwa Hezekia

²⁰ Vindu vindi viosi viu mwami Hezekia yakola, vikolwa vivie viu vuluviliri, kandi livaala kandi livaliza kuli yumbaka lidavalia lia mazi kandi nalima mugera gwingirizaa amazi mu lidaala linene viang'odwa mu kitabu cha makuva ga kale ga vami vi Ivuyuda.

²¹ Hezekia yakuza, na muyaayi weve Manase yavugula ovogono vwivwe kuli mwami.