2 Avami 19 - KITABU KITAKATIFU

Mwami Hezekia ateevaa Muporofeti Isaya zing'anagani

¹ Lwu mwami Hezekia yahulira amakuva yaga, yatandula zinguvu zizie mu vovereri vonene, ni yiviika zinguvu zia magunia ma nazia mu Litembeli lia Yahova.

² Yatuma Eliakimu, munene wasingilira inyumba yu vwami, Shebina, mung'odi wi kiyaalo, kandi avasaalisi vaduukiru kuzia ku muporofeti Isaya, muyaayi wa Amozi. Vaali kandi ni viviki zinguvu zia magunia.

³ Yili nilio likuva lia Hezekia yavavolera vahane ku Isaya: “Lero liveeye lidiku lio vovereri vonene ligali kunyi kohevwa amageri kandi koveeye mu zisoni zinene ligali. Koveeye kuli mukali oveeye ni inumwa, navuzwa siaveeye ni zinguru ziu kwekema umwana aduuki kwivulwa.

⁴ Mwami wa Asiria umali kutuma Rabishake, munene wa vanene veve kuuza konyega Nyasaye oveeye mwoyo. Yahova Nyasaye woovo ahuliri manyego yago nu kuhaana mageri ku yavo avagamolomaa. Kunangwa saali ku Nyasaye kigira avandu yavo avatigara mwoyo.”

⁵ Lwa Isaya yanyoora amakuva gu mwami Hezekia,

⁶ Isaya yatumira Hezekia makuva yaga: “Yahova akovoleraa uvuli koleka avandu va Asiria vamutihize na makuva gaavo ndi Yahova sianyala kumuhonyia.

⁷ Yahova alalomba mwami wa Asiria kuhulira amakuva agamulomba kwirana mu kivala chiche mwene, na Yahova alamwitira yo.”

Mwami wa Asiria atumaa litihiza lie litulira lindi

⁸ Munene wa Asiria Rabishake yahulira ndi, mwami umali kutura Lakishi na uziiyi kulwaana lidaala linene lia Libuna. Kunangwa yaaziayo kumuteeva chakola.

⁹ Makuva gaduukiraa vandu va Siria ndi, liihi lia Egebeti ni liemiliywi na Tirihaka mwami wa Ezopia liali ni lizaa kuvingilira. Lwu mwami yahulira makuva yaga, yatuma ibarwa ku mwami Hezekia, wi Ivuyuda navoora,

¹⁰ “Utaleka Nyasaye wa usuviraa akugaade nu kukulaga ndi, Jerusalemi lidaala linene sililagwa mu makono gange mba

¹¹ Henza, uhuliyi amakuva ga vami va Asiria vakora ku vivala viosi, ni vavidiviza ligali.

¹² Vaguuga vange vadiviza madaala manene ga Gozani, Harani, Rezefa, kandi ni yiita avandu va Bez-edeni, avamenyaa mu Telasari? Avanyasaye vi zihiiri yizio sivali vanyara kuvahonyia mba.

¹³ Avami va madaala manene ga Hamazi, Aripadi, Sefarivaimu, Hena na Ava vaveeye hayi?”

¹⁴ Mwami Hezekia yavugula ibarwa kutura ku vatumwa nagisoma. Maku yazia mu Litembeli, navambura ibarwa zana imbiri wa Yahova,

¹⁵ nasaara, “O, Yahova, Nyasaye wa Isiraeli, wikaye ku endeve yu vwami igulu wi vilombe vivio vie zimbaha, Ivi weng'ine oveeye Nyasaye, wamihaa uvwami vwosi vwi lirova. Walomba ligulu ni lirova.

¹⁶ Kalunu, O, Yahova, henza ku agekolekaa ku kunyi. Hulira ivindu yivi viosi viu mwami Senakeribu avoora kokonyega ivi, Nyasaye oveeye mwoyo.

¹⁷ Gaveeye agiligali, O, Yahova, ndi avami va Asiria vamala kudiviza zihiiri zinyingi, no kokora vivala viavo hazwa

¹⁸ kandi kusaamba avanyasaye vaavo, avatali vanyasaye ligali, navuzwa vifananyi vie misaala na magina agalombwa na makono ga vandu.

¹⁹ Kalunu, Yahova Nyasaye witu, ukosoole kutura ku Avasiria, kunangwa izihiiri ziosi zie lirova ziduuki kumanya ndi ivi weng'ine, O, Yahova, oveeye Nyasaye.”

Makuva ga Isaya ku mwami

²⁰ Maku, Isaya muyaayi wa Amozi yatuma makuva ku Hezekia navoora, “Yahova, Nyasaye wa Isiraeli avoora ndi: Mali kuhulira lisaala liilio kigira Senakeribu mwami wa Asiria.”

²¹ Yili nilio likuva lia Yahova amali komoloma kigira oyo: “Lidaala linene lia Jerusalemi likosekelizaa kandi likuchayaa, ivi Senakeribu.

²² Nivwaha wa uganaganaa ogemehizaa no kolegeriza? Ivi umali kolegeriza nu kuvula kuhaana luyali ku inzi, Nyasaye, Mutakatifu wa Isiraeli.

²³ Watuma avatumwa vovo kunzingilira na magare googo gu vulwani gu watumikira kuguuta vigulu via Lebanoni. Wigingira kovora ndi uwene yeyo, watema nu kutuura haasi midaragwa mitambi milahi ligali, kandi waduuka mugati mwi militu.

²⁴ Wigingira ndi wayava vidaho nu kunwa amazi muvivala vigeni, kandi virenge via vasikari vovo viaduvaga migera josi ja Egebeti nu kujuminya.

²⁵ “Ukikiri kuhulira ndi ndalohiza kokora yaga mu maziambiri? Na kalunu mali kuduukiza makuva yaga. Ndakuha zinguru kugirung'anyia madaala manene gi zimbinga muduuki kugadiviza gave vitumi vie vianyi.

²⁶ Avandu vamenyaa mu madaala yago sivali ni zinguru; vatihizwa kandi vagenya. Vaali kuli vunyasi mu mulimi anoho kuli indiva emeraa ku inyumba igulu wi imbuza imbiu yi vugwi ivwuminyaa ni vukikiri kuviruka.

²⁷ “Navuzwa inzi manyi vindu viosi ku ivi, ichakolaa kandi ha uzizaa. Inzi manya kuli oveeye nu vutima vonene ku inzi.

²⁸ Kigira uvutima vwa uveeye navwo ku inzi, kandi ni liegingira liilio limali kuduuka mu matu gange, inzi ndaviika endoani yange mu liulu liilio, na lijamu liange mu munwa gugwo, kandi ndakwilanyira kunzira ya wazira ku.”

²⁹ Maku Isaya yavolera mwami Hezekia, “Yiki nicho kelolero ku agaliekoleka. Muhiga gunu, kandi muhiga guzaa, ulalia vuswage vwu mu vulimu vweng'ine navuzwa muhiga gwa kavaga mulataga vuswage, ma muvogese, kandi musimiki mizabibu nu kulia makuyu gajo.

³⁰ Na yavo vamenyi Ivuyuda valagasizwa mu vindu viosi, kuli misaala gihilaa imiri jajo haasi ligali mu malova nu kwama amakuyu.

³¹ Halava na avandu mu Jerusalemi kandi ku kiguru cha Ziyoni, avalihona kigira Yahova umali kotovola kokora makuva yaga gekoleke.

³² “Kunangwa yaga nigo ga Yahova amali kovora ku mwami wa Asiria: ‘Si ulingira mu lidaala linene yili, kinga kulasa mbano gwu vuta kali mulala kulio. Avasikari vaveeye ni zinguva si valisunda ahimbi ni lidaala linene, kandi sivalakumbiriza nu kwumbaka vitumi via malova na magina mu zimbega zie lidaala linene yili.

³³ Kunzira ya yaazira ku, kandi aliranira ku, vugira kwingira mu lidaala linene yili kali hakuzu. Inzi, Yahova, mali kovora.

³⁴ Ndakinga lidaala linene yili nu kulisoola liduuki kuhona, kigira uluyali lwange, inzi mwene, kandi kigira lisuuvirizwa liandalomba ku mutumikiri wange Daudi.’ ”

³⁵ Vudiku vwene yivwo, engelosi wa Yahova yazia hokososera ha vandu va Siria ni yita avasikari 185,000. Na lwa vandu vavuuka mugambazuri mumavwevwe, lidiku lialonda ku, henza, avandu yava vosi vaali ni vakuzi!

³⁶ Maku Senakeribu, mwami wa Asiria, yasambula hokososa hehe ni yirana yengo weve Nineve.

³⁷ Lidiku lilala, lwa yaali nasigamira munyasaye weve Nisiroki mu litembeli, avayaayi veve vaviri, Adurameleki na Sharezeri, vamwita ni kivavi, ma ni vilukira mu kivala cha Ararati. Muyaayi weve wundi Esarihadoni yavugula ovogono vwivwe kuli mwami wa Asiria.