2 Avami 17 - KITABU KITAKATIFU

Mwami Hoshea wa Isiraeli

¹ Mu muhiga gwa komi na mbiri gwi liamiiha liu mwami Ahazi wi Ivuyuda, Hoshea muyaayi wa Ela yagwa mwami wa Isiraeli, kandi yamiha mu Samaria ku mihiga tisa.

² Yakola uvwoni imbiri wa Yahova, navuzwa sivwaali kuli vwa vami va Isiraeli avamiiha imbiri weve mba.

³ Mwami Shalimanaseri wa Asiria yalomba vulwani naye; Hoshea yihaana umwene ni yegehiza ku Shalimanaseri kuvugilira liguutwa, kandi natunga uvusuuru kuye vuli muhiga.

⁴ Navuzwa muhiga mulala, Hoshea yatuma makuva ku mwami So wa Egebeti, namuteeva ovokonyi vwivwe, ma kandi yalekera kutunga uvusuuru ku mwami wa Asiria vwa vuli muhiga. Lwa Shalimanaseri yamanya makuva yaga, yagumira Hoshea naamuvoha mu vuhambe.

Liguutwa kandi Ligumirwa lia Samaria

⁵ Maku mwami Shalimanaseri wa Asiria yingilira nu kulwaana kivala choosi cha Isiraeli kandi nakikumbiriza ku mihiga givaga.

⁶ Mu muhiga gwa tisa gwi liamiiha lia Hoshea, mwami wa Asiria yagumira Samaria, kandi yaahira Visiraeli mu kivala cha Asiria kuli vahambe. Yaavika valala kuvo vamenye mu lidaala lia Hala, kandi Gozani lidaala liali ahimbi ku Mugera gwa Habori, kandi vandi mu madaala manene ga Medesi.

⁷ Lidaala linene lia Samaria liaguutwa kandi ni ligumirwa kigira Visiraeli vakora vwoni ku Yahova Nyasaye wavo, uwavahonyia kutura ku mwami wa Egebeti kandi uwavatuliza mu kivala cha Egebeti. Vasigamira avanyasaye vandi,

⁸ ni valonda miima ja avandu ava Yahova yaali ni yakunga imbiri wa vandu va Isiraeli, no kolonda miima ja vami va Isiraeli vaali ni vatangizi.

⁹ Visiraeli vakora ivindu mu vuvisi ligali iviavula kuva vilungi ku Yahova Nyasaye wavo. Vumbaka havundu hu kusigamira misambwa mu madaala goosi, kutura ku lidaala likekeeke kuduuka ku lidaala linene kuvita goosi.

¹⁰ Ku vigulu viosi kandi isi wa sa mulala ku misaala josi mivisi, vumbaka minaara ja magina kandi vifananyi viu munyasaye Ashera.

¹¹ Vasamba kimuli ku vwali vwosi vwa vasigamira misambwa, ni valonda likora lia vandu va Yahova yakunga kutura mu kivala. Vavuukiza uvutima vwa Yahova ni vikolwa viavo vidamanu.

¹² Kandi ni vavura kuhulira Lilaga lia Yahova liu kuvula kusigamira vifananyi.

¹³ Yahova yiganihiza Ivuyuda na Isiraeli kuvitira ku vaporofeti na vatumwa navoora, “Girung'ani kutura kuzinzira zienyu zindamanu. Gumiri malago gange ni miima jange kolondekana ni Lilaga liosi lia ndalaga avaguuga vinyu vahuliri kandi lia ndaha munyi kuvitira ku vatumikiri vange avaporofeti.”

¹⁴ Navuzwa sivali vanyara kulihulira mba; vaali ava magoti madinyu kuli vaguuga vaavo, avavura kusuuvira Yahova, Nyasaye wavo.

¹⁵ Vasuura kuhulira amigizu geege, sivalinda lilagana lia Yahova yalomba na vaguuga vaavo mba, kandi vachaaya lieganihiza lilie. Vasigamira misambwa gitakonya kindu kandi ni vaagwa veene avatakonya kindu choosi, no kolonda likora lie zihiiri zia vakumbiriza, ni vavura kuhulira lilaga lia Yahova ndi vavuli kokora kuli vo.

¹⁶ Vandu va Isiraeli vavunanyia malago goosi ga Yahova Nyasaye, ni valomba zigiriki ziviri kutura ku kivia vaduuki kuzisigamira; valomba kandi kifananyi chu munyasaye Ashera; vasigamira zing'ereng'ani ziavo kandi munyasaye Baali.

¹⁷ Vahaana avayaayi vaavo ku vanyasaye kuli visiuviliru.

¹⁸ Yahova yavihilirizwa na vandu va Isiraeli, kandi navatuliza mu zimoni zizie, naleka vuzwa uvwami vwa Vayuda vweng'ine.

¹⁹ Kali avandu vi Ivuyuda sivahulira amalago ga Yahova Nyasaye wavo; navuzwa vakora miima ja vandu va Isiraeli.

²⁰ Yahova yasura avandu va Isiraeli vosi, navaha amageri, navaviika mu makono ga vasigu valulu vaavo kuduuka lwa yavatuliza mu zimoni zizie.

²¹ Inyima wa Yahova yaali ni yakavukanyia Isiraeli kutura ku Ivuyuda, avandu va Isiraeli vakora Jeroboamu muyaayi wa Nebati kuva mwami wavo. Jeroboamu yavakola koleka Yahova wavo kandi navimilira kuduuka ku likora uvwoni vudamanu.

²² Avandu va Isiraeli valonda mwami Jeroboamu ni vazizagilira kokora vwoni vwosi vwa yakola,

²³ kuduuka mu limala, Yahova yaatuliza avandu va Isiraeli mu zimoni zizie, kuli yaali ni yaviganihiza kuvitira ku vatumikiri veve avaporofeti kunangwa avandu va Isiraeli vaahirwa mu vuhambe mu kivala cha Asiria, uwavakemenyi kuduuka lero.

Avandu va Asiria vagumira no komenya mu Isiraeli

²⁴ Mwami wa Asiria yaleeta avandu kutura mu madaala manene ga Babiloni, Kuzi, Ava, Hamazi, Sefarivaimu, avamenye mu madaala manene ga Samaria, kuvugura vogono vwa vandu va Isiraeli avahilwa mu vuhambe. Vavugura Samaria kandi Ni vamenya mu madaala ga lio.

²⁵ Lwa vaali ni vakitangira komenya yo, sivasigamira Yahova mba, na ndio yavatumira Zisimba ni ziita valala kuvo.

²⁶ Mwami wa Asiria yavolerwa ndi avandu va yaali naahiri vamenye mu madaala manene ga Samaria sivamanyi lilaga liu munyasaye wi kivala chene yicho, nandio, umunyasaye wi kivala yicho yaali natumi zisimba ziviiti.

²⁷ Kunangwa, mwami yavoola: “Tuma mulala ku vasaalisi va kwatuliza yo kuli avahambe; mumukole yirane komenya yo aduuki kwigiza avandu lilaga lio munyasaye wi kivala yicho.”

²⁸ Kunangwa mulala ku vasaalisi Mwisiraeli uwaali ni yagimilwa kutura Samaria yazia namenya Bezeli, uwa yigizila avandu kusigamira Yahova.

²⁹ Navuzwa avandu vaza komenya mu Samaria velombera avanyasaye vaavo aveene, ni vavaviika hu kusigamira ha vandu va Isiraeli vaali ni vumbaka. Vuli muganda gwalomba vifananyi lugano mu madaala manene ga gwamenyaa.

³⁰ Avandu va Babiloni valomba vifananyi viu munyasaye Sukozi Benozi; avandu va Kuzi valomba vifananyi viu munyasaye Nerigali; avandu va Hamazi valomba vifananyi viu munyasaye Ashima;

³¹ Avandu va Ava valomba vifananyi via Nibuhazi na Taritaka; na avandu va Sefarivaimu vahaana avana vaavo kuli visiuviliru viu kusambwa ku vanyasaye vaavo Adurameleki na Anameleki.

³² Avandu yava vasigamira Yahova kandi ni vatovora hagati haavo veene avandu vi zing'ano ziosi kutumika kuli avasaalisi va havundu hu kusigamira misambwa, kandi kuvahaanira ivisiuviliru ahene yaho.

³³ Kunangwa vasigamira Yahova, navuzwa vasigamira kandi avanyasaye vaavo aveene kolondekana ni miima ji vivala via vaali ni vatura mu.

³⁴ Kuduuka lero vakizizagilira kokora miima jaavo mikulu. Sivasigamira Yahova, kinga kuhulira amalago ni miima ja Yahova yaaha visukululwi via Yakobo, avayagulika Isiraeli.

³⁵ Yahova yaali ni yalomba lilagana navo kandi yaali ni yalaga navoora: “Mutavinamiira avanyasaye vandi mba mutavinamiira anoho kuvatumikira, kinga kuhaana visiuviliru kuvo mba.

³⁶ Mulahulira inzi Yahova, nzieng'ine, uwamutuliza Egebeti ni zinguru zinene kandi nu vunyali; kuduuka mwinamiri inzi kandi muhaane ivisiuviliru ku inzi.

³⁷ Mulahulira kazozo amalago ni miima ja ndamung'odera. Simulahulira avanyasaye vandi,

³⁸ kandi simulivilira lilagana lia ndalomba ni munyi mba, kandi simulasigamira avanyasaye vandi mba.

³⁹ Mulahulira inzi, Yahova Nyasaye winyu, na ndamuhonyia kutura ku vasigu vinyu.”

⁴⁰ Navuzwa avandu yavo sivahulira mba kandi vazizagilira kokora miima jaavo ja kale.

⁴¹ Kunangwa avandu yavo vasigamira Yahova, navuzwa vasigamira kandi ivifananyi viavo; kandi kuduuka ku lidiku linu, visukululwi viavo vizizagilira kokora malala meere.