2 Avami 16 - KITABU KITAKATIFU

Mwami Ahazi wi Ivuyuda

¹ Mu muhiga gwa komi na saba gwa Peka muyaayi wa Remalia yaali kuli mwami wa Isiraeli, Ahazi muyaayi wa Jozamu yagwa mwami wi Ivuyuda.

² Ahazi yaali ni mihiga sirini lwa yaatanga kwamiiha, na yamiha ku mihiga komi na sita mu Jerusalemi. Siyakola agaali malungi mu zimoni zia Yahova, Nyasaye weve, kuli guuga weve Daudi yakola mba,

³ navuzwa yalonda liiva lia vami va Isiraeli. Kali yasamba muyaayi weve mwene kuli kisiuviriru chu kusambwa, kolondekana ni likora liu kuvihiliriza lia avizihiiri, ava Yahova yakunga imbiri wa vandu va Isiraeli.

⁴ Vuli havundu hu kusigamira misambwa, ku vigulu, kandi isi wi misaala mivisi ni ja matu manyingi, Ahazi yahaana visiuviliru kandi navuyiza vimuli.

⁵ Maku mwami Rezini wa Siria kandi mwami Peka muyaayi wa Remalia wa Isiraeli vingilira Jerusalemi kandi Ni valikumbiriza, navuzwa sivali vanyara kuguuta Ahazi mba.

⁶ Ku ing'inga ndala nzere, mwami wa Edomu yirana kugumira lidaala lia Elazi, nakunga avandu vi Ivuyuda vosi avamenyaa yo. Vaedomu vazia Elazi komenya yo kuduuka lero.

⁷ Kunangwa Ahazi yatuma avatumwa ku mwami Tigilazi Pileseri wa Asiria navoora, “Inzi mbeeye mutumikiri woovo kandi muyaayi woovo. Hamba yinu ombonyie kutura kuzinguru ziu mwami wa Siria kandi wa Isiraeli avamali kuuza kunzingilira.”

⁸ Ahazi yavugula ifeza ni zahabu kutura mu Litembeli kandi mu livikiru lie inyumba yu vwami ma nagituma kuli kihanwa ku mwami wa Asiria.

⁹ Tigilazi Pileseri, mu lihaana mativuli ku lianira lia Ahazi, yanigira kuzia kulwaana lidaala lia Damasiko, naligumira kandi yaahira avandu valio kuduuka Kiri kuli avatugwa kandi ni yita Rezini.

¹⁰ Lwu mwami Ahazi yazia Damasiko ukwagaana nu mwami Tigilazi Pileseri, yalora yo uvwali ma natumira musaalisi Uria lifana lie ligali liavwo, kali kuduuka ku livaala likekeeke ligali liavwo.

¹¹ Kunangwa musaalisi Uria yumbaka uvwali vwafana vuzwa kuli uvwene yivu, kandi namala kuvwumbaka Ahazi nakikiri kwirana.

¹² Ku lidiku lie lirana lilie kutura Damasiko, Ahazi yalora ndi uvwali vumali kwumbakwa. Hene yaho mwami yisunda himbi ku vwali, kandi naniina ku vika.

¹³ Kunangwa yasambira ku visiuviliru vie zinyama kandi vihaanwa viu vuswage, ma kandi naazuka ku kihanwa chiche chu kunwevwa kuli iwaini, kandi ni yuuha ku masahi gi vihaanwa vie mirembe.

¹⁴ Uvwali vwu mugasa uvwaviikwa halovega kigira uvutumiki vwa Yahova vwali hagati hu vwali vuhia ni Litembeli, kunangwa Ahazi yavusunda ku lovega lwa ivaale wu vwali vwivwe vuhia.

¹⁵ Maku yalanga Uria namuvolera, “Tumikira uvwali vonene vwange yivu kigira vihaanwa viu kusambwa via mugamba kandi vihaanwa viu vuswage via ha mugolova viu mwami na vandu, kandi kigira vihaanwa vie waini ya vandu. Zuka ku amasahi gi zinyama ziosi zie visiuviliru. Navuzwa undokere uvwali vwu mugasa ndumikiri kulwokoteeva amakuva kutura ku Nyasaye.”

¹⁶ Uria yakola kuli mwami yalaga.

¹⁷ Mwami Ahazi yakalaga magare gi zing'ombe gu mugasa agatumikaa mu Litembeli kandi natuliza vwikaliru vwizibenzeni ziali kuvwo; yavugula kandi lidangi liu mugasa kutura ku migongo ji zigiriki komi na mbili, naalivika ku musingi gwa magina.

¹⁸ Kandi kulwukuyaanziza mwami wa Asiria, Ahazi kandi yaatuliza mu Litembeli ahadiguluku ahumbakirwa endeve yu vwami kuvikwa ku kandi nahana inzira yu mwami yingiliraa mu Litembeli.

¹⁹ Vindu vindi viosi viu mwami Ahazi yakola viang'odwa mu vitabu via makuva ga kale ga avami vi Ivuyuda.

²⁰ Ahazi yakuza kandi nayavirwa mu vilindwa viu vwami mu Lidaala linene lia Daudi, na umuyaayi weve Hezekia yavugula ovogono vwivwe kuli mwami.