2 Avami 15 - KITABU KITAKATIFU

Mwami Azaria wi Vuyuda

¹ Mu muhiga gwa sirini na saba gwi liamiiha liu mwami Jeroboamu wa kaviri wa Isiraeli, Azaria muyaayi wa Amazia mwami wi Ivuyuda yaatanga kwamiiha.

² Yaali ni mihiga kumi na sita lwa yaatanga kwamiiha na yamiha mu Jerusalemi ku mihiga amusini na mbiri. Lieta lia mama weve liali Jekolia kutura Jerusalemi.

³ Nalondaa liiva lia baba weve, Amazia, yakola agaali gu kuyaanziza Yahova.

⁴ Navuzwa havundu hu kusigamira misambwa sihononywa mba, na vandu vazizagilira kuhaanira ho ivisiuviliru kandi kusamba vimuli.

⁵ Na Yahova yakuya mwami Azaria nu vulwaye vudamanu vwo vogere mu livamwoyo lilie liosi. Yamenya munyumba yeeye mwene, na muyaayi weve walangwa Jozamu yamiha nu kukalagira avandu vi Ivuyuda.

⁶ Vikolwa viosi via Azaria yakola viang'odwa mu kitabu cha makuva ga kale ga vami vi Vuyuda.

⁷ Azaria yakuza, ma nayavilwa mu vilindwa viu vwami mu Lidaala linene lia Daudi, na muyaayi weve Jozamu yavugula vogono vwivwe kuli mwami wi Ivuyuda.

Mwami Zakaria wa Isiraeli

⁸ Mu muhiga gwa salasini na nane gwi liamiiha liu mwami Azaria, wi Ivuyuda, Zakaria muyaayi wa Jeroboamu 2 yaatanga kwamiiha kuli mwami wa Isiraeli, na yamiha mu Samaria ku mieli sita.

⁹ Na yakola agaali madamanu mu zimoni zia Yahova, kuli avaguuga veve vakora. Siyeleha kutura ku vwoni vwa Jeroboamu muyaayi wa Nebati, uvwayakola Isiraeli ukwona imbiri wa Yahova.

¹⁰ Shalumu muyaayi wa Jabeshi yaazira mwami Zakaria haasi kandi na mwitira ha Ibuleamu, navugura ovogono vwivwe kuli mwami wa Isiraeli.

¹¹ Ivindu vindi viosi via Zakaria yakola, viang'odwa mu vitabu via makuva ga kale ga vami va Isiraeli.

¹² Kunangwa lilaga yili liadukizwa ilia Yahova yaali ni yalomba ku mwami Jehu: “Visukululwi vovo, kuduuka ku likula lia kane, valava avami va Isiraeli.”

Mwami Shalumu wa Isiraeli

¹³ Mu muhiga gwa salasini na tisa gwi liamiiha liu mwami Uzia wi Ivuyuda, Shalumu muyaayi wa Jabeshi yagwa mwami wa Isiraeli, kandi yamiha mu Samaria kulwu umweli mulala.

¹⁴ Menahemu muyaayi wa Gadi yatura Tiriza nazia Samaria, ni yita Shalumu, ma navugura ovogono vwivwe kuli mwami wa Isiraeli.

¹⁵ Ivindu vindi viosi via Shalumu yakola, harara ni livaala lie lilohiza kokora gu vuchamu viang'odwa mu vitabu via makuva ga kale ga vami va Isiraeli.

¹⁶ Menahemu yaali naturaa Tiriza, yononyia ligali lidaala linene lia Tapua, avandu vosi avamenyaa mulio, ni vivala viosi ivialikumberiza, kigira lidaala linene yili siliamwigulira yingiri mulio nu kuvugilira kuguutwa mba. Kali yatanyia zinda zia vakali vosi avaari ni vaveleka.

Mwami Menahemu wa Isiraeli

¹⁷ Mu muhiga gwa salasini na tisa gwi liamiiha liu mwami Uzia wi Ivuyuda, Manahemu muyaayi wa Gadi yagwa mwami wa Isiraeli; yamiha mu Samaria ku lwi mihiga likomi.

¹⁸ Yakola madamanu mu zimoni zia Yahova; mu madiku geege goosi, siyaleka kokora uvwoni vwosi vwa Jeroboamu muyaayi wa Nebati, wagira Isiraeli nikola uvwoni.

¹⁹ Tigilazi Pileseri, mwami wa Asiria yazia kulwana kivala cha Isiraeli, na Menahemu yamuha zikilo 34,000 zie ifeza konyoora ovokonyi mu lidinyiriza zinguru zia Menahemu ukwamiiha kivala cha Isiraeli.

²⁰ Menahemu yanyoora mabese kutura ku vandu vatugi va Isiraeli, na yaniga mundu sa mulala kosolola vidonye amusini viefeza kuhaana ku mwami wa Asiria. Kunangwa Tigilazi Pileseri yirana mu kivala chiche.

²¹ Vindu vindi viosi via Menahemu yakola viang'odwa mu vitabu via makuva ga kale ga vami va Isiraeli.

²² Menahemu yakuza ma nayavirwa, na muyaayi weve Pekahia yavugula ovogono vwivwe kuli mwami wa Isiraeli.

Mwami Pekahia wa Isiraeli

²³ Mu muhiga gwa amusini gwi liamiiha liu mwami Uzia wi Ivuyuda, Pekahia muyaayi wa Menahemu yaatanga kwamiiha kuli mwami wa Isiraeli. Yamiha mu Samaria ku mihiga giviri.

²⁴ Yakola uvwoni mu zimoni zia Yahova; siyagirung'ana kutura mu vwoni vwa Jeroboamu muyaayi wa Nebati mba. Yimilira Isiraeli mu likora uvwoni.

²⁵ Munene wi liihi lia Pekahia, Peka muyaayi wa Remalia, yamuzira haasi harara na vandu vasaza amusini kutura Gileadi, niyiitira Pekahia mu imbinga yu mugati yi inyumba yu mwami mu Samaria. Peka yavugula vogono vwivwe kuli mwami wa Isiraeli.

²⁶ Vindu vindi viosi via Pekahia yakola viang'odwa mu vitabu via makuva ga kale ga vami va Isiraeli.

Mwami Peka wa Isiraeli

²⁷ Mu muhiga gwa amusini na mbiri gwi liamiiha liu mwami Uzia wi Ivuyuda, Peka muyaayi wa Remalia yaatanga kwamiiha kuli mwami wa Isiraeli. Yamiha mu Samaria ku mihiga sirini.

²⁸ Peka yakolera Yahova uvwoni nalondaa liiva lidamanu lia Jeroboamu muyaayi wa Nebati. Yimilira vandu va Isiraeli mu likora uvwoni.

²⁹ Mu madiku gi liamiiha lia Peka mwami wa Isiraeli, Tigilazi Pileseri mwami wa Asiria, yaza nagumira madaala manene ga Ijoni, Abe-Bezi Maaka, Jonoa, Kedeshi, Hazori, Gileadi, kandi Galilaya, harara ni kivala choosi cha Nafutali; yahira avandu mu vuhambe mu kivala cha Asiria.

³⁰ Mu muhiga gwa sirini gwi liamiiha lia Jozamu muyaayi wa Uzia kuli mwami wi Vuyuda, Hoshea muyaayi wa Ela yaazira haasi mwami Peka, namwiita kandi navugura ovogono vwivwe kuli mwami wa Isiraeli.

³¹ Vindu vindi viosi viu mwami Peka yakola viang'odwa mu vitabu via makuva ga kale ga vami va Isiraeli.

Mwami Jozamu wi Vuyuda

³² Mu muhiga gwa kaviri gwi liamiiha liu mwami Peka, muyaayi wa Remalia kuli mwami wa Isiraeli, Jozamu muyaayi wa Uzia yagwa mwami wi Ivuyuda,

³³ naveeye ni mihiga sirini na tano. Jozamu yamiha mu Jerusalemi ku mihiga kumi na sita. Mama weve yaali Jerusa, mukaana wa Zadoku.

³⁴ Jozamu yakola malungi gukuyaanziza Yahova, nalondaa likora lilahi lia baba weve Uzia.

³⁵ Navuzwa havundu hu kusigamira misambwa sihononywa mba. Avandu vazizagilira kuhaana visiuviliru nu kusaamba vimuli ahene yaho. Yaali Jozamu uwaakola zinguru kwumbaka kirivwa cha ivaale chi Litembeli lia Yahova.

³⁶ Vindu vindi viosi via Jozamu yakola viang'odwa mu vitabu via makuva ga kale ga vami vi Ivuyuda.

³⁷ Mu madiku gene yago, Yahova yaatanga kutuma Rezini mwami wa Siria kandi Peka muyaayi wa Remalia kuzia kulwaana kivala chi Ivuyuda.

³⁸ Jozamu yakuza nayavirwa mu vilindwa viu vwami mu Lidaala linene lia Daudi. Muyaayi weve Ahazi yavugula vogono vwivwe kuli mwami wi Ivuyuda.