2 Avami 14 - KITABU KITAKATIFU

Mwami Amazia wi Ivuyuda

¹ Mu muhiga gwa kaviri gwi liamiiha lia Jehoashi muyaayi wa Jehoahazi kuli mwami wa Isiraeli, Amazia muyaayi wa Joashi yagwa mwami wi Ivuyuda.

² Yaali naveeye ni mihiga sirini na tano, na yamiha mu Jerusalemi ku mihiga sirini na tisa. Mama weve yaali Jehoadini, kutura Jerusalemi.

³ Yakola agaali gu kuyanziza Yahova, navuzwa siyali kuli guuga weve mwami Daudi mba. Muvogono yivwo yakola aga baba weve Joashi yaali naakori.

⁴ Navuzwa siyasambula havundu hu kusigamira misambwa, na avandu vazizagilira kuhaanira ho visiuviliru nu kusamba kimuli.

⁵ Nonoho lwa Amazia yaali ni yakava ni zinguru mu vwami yagumira nukwita avanene vaali ni vita mwami baba weve.

⁶ Navuzwa siyiita avana va valumindi yavo mba, navuzwa kolondekana na agang'odwa mu kitabu chi Lilaga lia Musa, umwa Yahova yavoola, “Vivuli si valitwa kigira uvwoni vwa vana vaakora mba; kandi avana sivaliitwa kigira vwoni vwa vivuli vakora mba. Mundu aliitswa vuzwa kigira uvwoni vwa oyo mwene amali kokora.”

⁷ Amazia yita avasikari vi liihi zielefu likomi va Edomu mu livona liu munyu. Yagumira lidaala linene lia Sela mu vulwani kandi nalilanga Jokizeeli, ilieta lia likikiri nalio kuduuka lero.

⁸ Maku Amazia yatuma avatumwa ku mwami Jehoashi wa Isiraeli namutangiza uvutindi mbula valwaane naye.

⁹ Navuzwa mwami Jehoashi wa Isiraeli yamwiranyia amativuli yaga: “Ing'inga ndala litagalu ku kiguru cha Lebanoni liatuma makuva ku mudaragwa: ‘Haana mukaana woovo Ave mukali wu muyaayi wange.’ Inyama yu mbulimu yaviitira ahene yaho niduvagira litagalu zana haasi.

¹⁰ Kalunu Amazia, ivi umali kuguuta Vaedomu, ma wizuyi liigingira. Yaanza wigutizwi nu luyali lulwo kandi omenye hango hoho. Kigira ki utangizi vudinyu no kweretera kivi ku ivi mwene na vandu vovo?”

¹¹ Navuzwa Amazia yasura kuhuliriza amakuva yaga, nandio mwami Jehoashi yatura kuzia harara na vandu veve kandi ni valwaana naye ha Bezi-shemeshi mu Ivuyuda.

¹² Liihi lia Amazia liaguutwa na avasikari vi liihe veve vosi virukira sa mulala yengo weve.

¹³ Jehoashi yavugula Amazia kuli muhambe, nazia naye kuduuka Jerusalemi, kandi nasambura lidigi lie lidaala linene kutura mu kirivwa cha Efuraimu kuduuka ku kirivwa cha Korine, uvutambi vwi zimita ahimbi zimia ziviri.

¹⁴ Yavugula ifeza ni zahabu yoosi ya yaali anyala konyoora, viju viosi viu mu Litembeli kandi mavikiru goosi gu munyumba yu vwami ma navigiinga viosi ukwirana navio Samaria. Yavugula kandi avahambe ni yirana navo.

¹⁵ Vindu vindi viosi via Jehoashi yakola komeeda ku uvuluviliri vwivwe mu vulwani nu mwami Amazia wi Ivuyuda, viang'odwa mu vitabu via makuva ga kale ga avami va Isiraeli.

¹⁶ Jehoashi yakuza ma nayavirwa mu vilindwa viu vwami via Samaria, na muyaayi weve Jeroboamu yavugula ovogono vwivwe kuli mwami.

Likuza liu mwami Amazia wi Ivuyuda

¹⁷ Mwami Amazia wi Ivuyuda yamenya mihiga komi na tano inyima wi likuza liu mwami Jehoashi wa Isiraeli.

¹⁸ Vindu vindi viosi via Amazia yakola, viang'odwa mu vitabu via makuva ga kale ga Vami vi Ivuyuda.

¹⁹ Haali ho ni lilohiza lie imbisu mu Jerusalemi ukwita mwami Amazia kunangwa yirukira mu Lidaala lia Lakishi, kunangwa avasigu veve vamulondelera yo ni vamwita.

²⁰ Muviri gwigwe gwagingirwa ku barasi nu kwilanywa mu Jerusalemi, na yayavirwa mu vilindwa viu vwami mu Lidaala linene lia Daudi.

²¹ Maku avandu vi Ivuyuda vaviika muyaayi weve Uzia, uwaali ni mihiga komi na sita, itaji kuli mwami.

²² Uzia yirana kuguuta Elazi, kandi ni yirana kuliumbaka lidaala yilio inyima wi likuza lia baba weve.

Mwami 2 Jeroboamu wa Isiraeli

²³ Mu muhiga gwa komi na tano gwi iliamiiha lia Amazia kuli mwami wi Ivuyuda, Jeroboamu wa kaviri muyaayi wa Jehoashi yagwa mwami wa Isiraeli na, yamiha mu Samaria ku mihiga arubaini na moja.

²⁴ Yoona ku Yahova nalonda liiva lidamanu liu mwami waali imbiri weve Jeroboamu muyaayi wa Nebati wagira vandu va Isiraeli ni vakora vwoni.

²⁵ Yirana kuguuta kivala choosi ichalange haasi hu vwamihi vwa Isiraeli kutura Kivitiru cha Hamazi mu lovega lwi ivaale kuduuka ku Inyanza yi ijumbi mu lovega lwi Isavaalu. Yaga nigo ga Yahova, Nyasaye wa Isiraeli yaali ni yasuuviriza kuvitira ku mutumikiri weve muporofeti Jona, muyaayi wa Amitai kutura Gazi-Hefa.

²⁶ Yahova yalora uvusaliri vululu vwa Visiraeli; sihaali ho nu mundu wu kuvakonya kali hakuzu.

²⁷ Navuzwa sivwaali vulaliri vwa Yahova kudiviza Isiraeli ligali kandi mihiga ni mihiga, kunangwa yavahonyia kuvitira mu mwami Jeroboamu wa kaviri.

²⁸ Vindu vindi viosi viu mwami Jeroboamu wa kaviri yakola, vulwani vwivwe vwu vuluviliri, kandi kuli yiranyira Isiraeli amadara ga Hamazi na Damasiko, viang'odwa mu vitabu via makuva ga kale ga vami va Isiraeli.

²⁹ Jeroboamu wa kaviri yakuza kandi nayavirwa mu vilindwa viu vwami, na muyaayi weve Zakaria yavugula ovogono vwivwe kuli mwami wa Isiraeli.