2 Avami 13 - KITABU KITAKATIFU

Mwami Jehoahazi wa Isiraeli

¹ Mu muhiga gwa sirini na tatu gwu vwamihi vwa Joashi muyaayi wa Ahazia kuli mwami wi Ivuyuda, Jehoahazi muyaayi wa Jehu yagwa mwami ku Isiraeli mu lidaala linene lia Samaria. Yamiha ku mihiga komi na Saba.

² Yakola agaali madamanu mu zimoni zia Yahova kuli mwami Jeroboamu uwaali imbiri weve, kandi nakora avandu va Isiraeli kokora uvwoni, kandi siyaleka zinzira zizie zindamanu mba.

³ Kunangwa Yahova yavihilirwa na Isiraeli ligali, kandi yaleka mwami Hazaeli wa Siria nu muyaayi weve Benihadadi kuguuta Isiraeli vuli ing'inga.

⁴ Maku Jehoahazi yasaala ku Yahova, na kigira Yahova yalora kuli mwami wa Siria yadambizaa Avaisiraeli nu vululu, yamutivulira lisaala lilie.

⁵ Yahova yatumira Isiraeli mwimiliri uwavavoholola kutura ku Vasiria, nandio Visiraeli vamenya mu mirembe kuli maziambiri.

⁶ Kali ndio sivalekela likora uvwoni vwa Jeroboamu yavalomba vakole, navuzwa vazizagilira kovokola; kandi kifananyi chu munyasaye wi kikali Ashera chatigara mu Samaria.

⁷ Jehoahazi siyaali na mahi gi viuma agatigala mba, ni vatali avasikari vu kunina ku zibarasi amusini, magare gu vulwani likomi kandi avasikari vo kogenda ku virenge zielefu likomi, kigira mwami wa Siria yaali ni yadiviza avandi vosi, navaduvagiraa haasi kuli luguchi.

⁸ Vindu vindi viosi viu mwami Jehoahazi yakola kandi vikolwa vivie viu vuluviliri viang'odwa mu vitabu via makuva ga kale ga vami va Isiraeli.

⁹ Yakuza kandi yayavirwa mu Samaria, kandi muyaayi weve Jehoashi yavugula vwiyangu vwivwe kuli mwami.

Mwami Jehoashi wa Isiraeli

¹⁰ Mu muhiga gwa salasini na saba muvwamihi vwu mwami Joashi wi Ivuyuda, Jehoashi muyaayi wa Jehoahazi yagwa mwami wa Isiraeli, kandi yamiha mu Samaria ku mihiga komi na sita.

¹¹ Naye kandi yona ku Yahova kandi nalonda umufano mudamanu gwu mwami Jeroboamu, uwakola Isiraeli kuduuka mu likora uvwoni.

¹² Ivindu vindi viosi via Jehoashi yakola, komeeda ku vuluviliri vwivwe mu vulwani vwa yalwana nu mwami Amazia wi Ivuyuda viang'odwa mu vitabu via makuva ga kale ga vami va Isiraeli.

¹³ Jehoashi yakuza na yavilwa mu vilindwa viu vwami vwa Samaria. Kandi muyaayi weve Jeroboamu wa kaviri yavugula ovogono vwivwe kuli mwami.

Likuza lia Elisha

¹⁴ Muporofeti Elisha yaali mulwaye ligali, kandi lwa yaali naguvaguvaa mwami Jehoashi wa Isiraeli yasulunguta kuzia ku muloraa. Yamulilira navoora, “Baba wange! Baba wange! Ivi waveeye mukingi wi zinguru wa Isiraeli! Ligali uziiyi!”

¹⁵ Elisha yamuvolera, “Vugula uvuta ni mivano.” Jehoashi yavuvugula,

¹⁶ na Elisha yamuvolera yetegeke kulasa. Mwami Jehoashi yakola ndio na Elisha yavika makono geege ku makono gu mwami.

¹⁷ Hene yaho, nalondaa malago gu muporofeti, mwami yigula lidirisha liahenza lovega lwa Siria. Elisha yavoola, “Lasa muvano!” Nonoho lwo mwami yalasa umbano, umuporofeti yahanzuka, “Ivi oveeye muvano gwa Yahova, gwa utumikira kuguutira Siria, umbano gwu vuguuti vwa yahova ku Siria. Ulalwana Vasiria ha Afeki na ulavaguuta.”

¹⁸ Maku Elisha yavolera mwami avuguli imivano gindi na agilase haasi. Mwami yagilasa hasi haali kavaga ma nalekela.

¹⁹ Yaga gagira Elisha nasinyika ligali kandi yavolera mwami, “Waali ulase haali katano anoho sita, maku waali ove nuguuti vuguuti vwosi ku Vasiria; navuzwa kalunu ulavaguuta haali kavaga keng'ine.”

²⁰ Elisha yakuza kandi nayavirwa. Vuli muhiga viduma via Vamoabu vingilira kivala cha Isiraeli.

²¹ Ing'inga ndala lwa Vaisiraeli valala vaali ni vatezaa mundu, nonoho valora kiduma cha Vamoabu yavo, kunangwa vasiuva muviri gwu mukuzu zana mu kilindwa cha Elisha. Lwu muviri yigwo gwadiira ku vigumba via Elisha, mundu oyo yasimuguka, kandi nasingira ku virenge vivie.

Vulwani hagati ha Isiraeli na Siria

²² Mwami Hazaeli wa Siria yadambiza Vaisiraeli ing'inga yoosi yu vwamihi vwa Jehoahazi.

²³ Navuzwa Yahova yaali mulahi kuvo kandi navavererera. Siyavaleka vadivizwi mba, navuzwa yavakonya kigira lisuuviriza lilie ku Aburahamu, Isaka na Yakobo. Akiri kwivilira avandu veve kali hakuzu.

²⁴ Lwu mwami Hazaeli wa Siria yakuza, muyaayi weve Benihadadi yagwa mwami.

²⁵ Hene yaho, mwami Jehoashi wa Isiraeli yaguuta Benihadadi haali kavaga. Kandi ni yirana kugumira madaala manene agaali ni gagumirwa na Benihadadi ing'inga yu vwamihi vwa Jehoahazi, baba wa Jehoashi.