2 Avami 12 - KITABU KITAKATIFU

Mwami Joashi wi Vuyuda

¹ Mu muhiga gwa saba gwi liamiiha liu mwami Jehu wa Isiraeli, Joashi yagwa mwami wi Ivuyuda, na Yamiha mu Jerusalemi ku mihiga arubaini. Mama weve yaali Zibia kutura mu lidaala linene lia Beerisheba.

² Mu livamwoyo lilie liosi yakola agayaanziza Yahova, kigira Jehoyada musaalisi yamwigiza.

³ Nitali, ha vundu hu kusigamira misambwa sihononywa mba na vandu vazizagilira kuhaanira ho ivisiuviliru kandi kusambira ho vimuli.

⁴ Joashi yavolera avasaalisi. “Muvungize amabese goosi agaleetangwa mu Litembeli kuli vihaanwa vitakatifu, amabese gasololwaa kuli mabese ga vuli mundu akalagirwa kutunga kuli vusuuru, kandi amabese goosi agahaanwa nu vwihaani vwu mwoyo gwosi mu Litembeli lia Yahova.”

⁵ Vuli musaalisi anyoore mabese kutura ku mulala ku vaviiki, na gatumikirwi kolomba hi litembeli liasasuguka.

⁶ Navuzwa kuduuka ku muhiga gwa sirini na tatu gwi liamiiha liu mwami Joashi, avasaalisi vaali ni vakikiri kolomba ahe Litembeli liali ni liasasuguka.

⁷ Kunangwa mwami Joashi yalanga Jehoyada harara na avasaalisi vandi navateeva, “Kigira ki mutalomba mwi Litembeli liasasuguka? Kutura kalunu kuzizagilira, simulaviika mabese goosi ga munyoora; mu livikiru mba. Kuduuka mugahaane gaduuki kolomba ahasasuguka mu Litembeli.”

⁸ Kunangwa avasaalisi vavugilira ndi kuvula kuvugura mabese kutura ku vandu, ma kandi vavuli kolomba ahasasuguka mu Litembeli.

⁹ Maku Jehoyada musaalisi yavugula lisandugu linene nafudula muluhu mu inguniku ya lio, ma naalivika ahimbi nu vwali, ku lovega lwu mukono mulungi lwa mulala yingiraa mu Litembeli. Vasaalisi avaari ku miyinzi ha vwingiliru vaviika mabese goosi aga vahevwa na vasigamiri mu lisandugu.

¹⁰ Lwa valora haali ho na mabese manyingi nigaveeye mu lisandugu, mung'odi wu mwami nu Musaalisi Munene vaza kandi vavaliza mabese agaali ni galeteywi mu Litembeli ma vagaviika mu misigo.

¹¹ Inyima wo kong'oda mu vitabu uvulitu vwa mabese gi ligali ganyoleki, vagahaana ku vasaza vukusingilira miyinzi mu Litembeli, kandi navo vaatunga avasiza vi zimbaho, avumbaki,

¹² avasiza vukwumbakira amagina, na vavaazi va magina, vaagura zimbaho na magina gatumika mu liumbaka umwasasuguka, nu kutunga uvutumiki vundi vwenyekaa vwosi.

¹³ Navuzwa mabese galeetwa mu Litembeli yaga, sigatumikilwa kolomba zibenzeni zie ifeza, amakasi gu kukala zindambi zie zitaya, zibakuli, vikombe vie ifeza, visiliva anoho viju vindi vie zahabu anoho viefeza mba.

¹⁴ Goosi gatumikirwa kutunga avayinziri kandi kugura ivindu vienyeka kutumikirwa mu lilomba umwe Litembeli liasasuguka.

¹⁵ Vasaza avasingilira miyinzi yigi, vaali avasuuvirifu ligali, na sihaali ho ni lienya kuvateeva vivaale kuli mabese ganyoleka nu kutumika mba.

¹⁶ Mabese kutura ku vihaanwa via mahiolo, kandi kutura ku vihaanwa viu vwoni, sigaviikwa mu lisandugu mba, gaali ga vasaalisi.

¹⁷ Ku ing'inga yeyo, mwami Hazaeli wa Siria yingilira lidaala linene lia Gazi kandi naliguuta; maku yatovola kutulira Jerusalemi.

¹⁸ Mwami Joashi wi Ivuyuda yavugula vihaanwa viosi via vami vosi avaari imbiri weve: Jehoshafati, Joramu, na Ahazia vaali ni vaviika ha lovega ku lwu vutumiki vwa Nyasaye, nameda ku vihaanwa vivie mwene, kandi izahabu yoosi kutura mu mavikiru gi Litembeli kandi gi inyumba yu vwami, ma navituma viosi kuli kihanwa ku mwami Hazaeli, uwamanya natuliza liihe lilie liosi kutura Jerusalemi.

¹⁹ Ivindu vindi viosi viu mwami Joashi yakola viang'odwa mu kitabu cha makuva ga kale ga vami vi Ivuyuda.

²⁰ Vanene veve vamuziila haasi ma ni vamwitira munyumba ha Bezimilo, kunzira isulungutaa kuzia Sila.

²¹ Vanene zana avamwita vaali Jozakari muyaayi wa Simeazi na Jehozabadi muyaayi wa Shomeri. Joashi yayavirwa mu vilindwa viu vwami mu Lidaala Linene lia Daudi, kandi muyaayi weve Amazia yavugula ovogono vwivwe kuli mwami wi Ivuyuda.