2 Avami 10 - KITABU KITAKATIFU

Visukululwi va Ahabu viitwa

¹ Kunangwa Ahabu yaali ni visukululwi sabwini avamenyaa mu lidaala linene lia Samaria. Jehu yang'oda zibarwa naazituma Samaria ku avanene va Jezireeli, ku avakulundu va madaala manene kandi avaleli na visukululwi va Ahabu; ibarwa yasoma nivoola,

² “Munyi muveeye avalindi va visukulurwi vu mwami na muveeye na magare gu vulwani, zibarasi, viugi kandi madaala manene gi zimbinga.

³ Kunangwa nonoho lwa munyoora ibarwa yiyi, tovoli mulala ku visukululwi vu mwami oveeye mulahi ligali kuvita vosi, mumukole ave mwami na mulwaane vudinyu kumukinga.”

⁴ Navuzwa avamihi va Samaria vatihizwa ligali. Vavoola, “Kunyala ndi kuhing'ana na Jehu, lwu mwami Joramu kinga Ahazia vaali sivanyala?”

⁵ Kunangwa munene wasingilira inyumba yu vwami kandi munene wasingilira lidaala linene, harara na vakulundu na valeli vatuma amakuva yaga ku Jehu ni vavoola, “Kunyi koveeye avatumikiri vovo na kwetegeki kokora kindu choosi cha avoora. Navuzwa sikulatovola mundu kuva mwami mba; kola icha uganaganaa kuva kilahi ligali kuvita viosi.”

⁶ Jehu yavang'odera ibarwa yindi na ibarwa zana yavoola: “Niiva muveeye harara ninzi, na mwetegeki kolonda malago gange, leeti imitwi ja visukululwi vu mwami Ahabu ku inzi ha Jezireeli ku ing'inga kuli yiyi mugamba.” Visukululwi sabwini vu mwami Ahabu, vaali hasi huvulindi vwa vakulundu vaduukiru va Samaria, avaari nivavavirukizaa.

⁷ Lwa vanyoola ibarwa ya Jehu, aviimiliri va Samaria vita visukululwi vosi sabwini va Ahabu; ni vaviika mitwi jaavo mu vihinda ma nivagihira ku Jehu ha Jezireeli.

⁸ Lwa Jehu yavolerwa ndi mitwi ja visukululwi va Ahabu gileeteywi, yalaga givungizwi mu vitumi viviri ha kirivwa chi lidaala linene, na gilekwe ho kuduuka mugumba gwalonda ku.

⁹ Mugambazuri, yazia kuduuka ha kirivwa navolera avandu vaali ho, “Inzi niyie uwaziira mwami Ahabu haasi ma ni mwitaa; navuzwa simuveeye nimbala kandi simunyala kudulwa ku yaga mba. Navuzwa nivwaha wita avandu yava vosi?

¹⁰ Yaga gamanyia ndi vindu viosi via Yahova yavoola ku visukululwi va Ahabu galava agiligali. Yahova umali kokora agayasuuviriza kuvitira ku muporofeti weve Elija.”

¹¹ Maku Jehu yita aviiko vandi vosi va Ahabu avamenyaa mu Jezireeli, avanene veve vosi, avalina va himbi na vasaalisi; sihaali ho nu mulala walekwa mwoyo mba.

Viko vu mwami Ahazia viitwa

¹² Maku Jehu yatura Jezireeli kuzia Samaria. Lwa yaali kunzira ha vundu halangwa “Hokososa ha vayi”,

¹³ Jehu yagana na viiko va himbi ligali va Ahazia mwami wi Ivuyuda kandi navateeva, “Munyi ni vanga vwaha?” Navo vativura, “Kunyi koveeye aviiko va Ahazia. Kuziiza Jezireeli kuhaana luyali lwiitu ku vana vu mwami wi kikali Jezebeli kandi ku vinyumba yu vwami vosi.”

¹⁴ Jehu yavoola, “Vavuguli ni vaveeye mwoyo!” Vavagumira ni vaveeye mwoyo kandi yaviitira ahimbi no vogo ahimbi ahokososa ha vayi vasosera vaali vosi avandu arubaini na mbili; na sihaali ho nu mulala uwalekwa mwoyo mba.

Aviiko va Ahabu vatigara vosi viitwa

¹⁵ Lwa Jehu yatura ho kandi, yagana na Jehonadabu, muyaayi wa Rekabu; uwaali ni yaazaa kumwaganira. Jehu yamucheliza navoora, “Ivi ninzi kuganaganaa kindu kilala ulanyunga umukono?” Jehonadabu yativura, “Yee, ndakora ndio.” Jehu yativura, “Niiva gaveeye ndio, mbe mukono gugwo.” Vaagumirana makono, na Jehu yamukonya kuniina mu ligare lilie,

¹⁶ navoora, “Hamba ninzi na welolere kuli mbeeye nu vugulu kigira Yahova.” Na vombi vanina mu ligare lie liihi ni vazia Samaria.

¹⁷ Lwa vaduuka yo, Jehu yita aviiko va Ahabu vatigara vosi vugira kutigaliza kali mulala mwoyo. Yaga nigo ga Yahova yaali ni yavolera Elija ndi galakekoleke.

Vasigamiri va Baali viitwa

¹⁸ Jehu yalanga avandu va Samaria harara navoora, “Mwami Ahabu yatumikira munyasaye Baali hake vuzwa, navuzwa inzi ndamutumikira hanene ligali.

¹⁹ Kulwayago, naangili harara avaporofeti va Baali vosi, vosi avamusigamiraa, kandi avasaalisi veve vosi, mulala atasuva kuva ho mba, kigira mbeeye ni kisiuviriru kenene ku Baali; ku vosi uvula kuva ho aliitwa.” Navuzwa Jehu yakola yaga no vogeri vwu vugadi aduuki kwiita avasigamiraa Baali.

²⁰ Maku Jehu yavoola, “Landizi lidiku lie Lisigamira lia Baali.” Kunangwa valandiza.

²¹ Na Jehu yatuma likuva mu kivala choosi cha Isiraeli. Vosi avasigamira Baali vaza; sihaali nu mulala kuvo uwavula kuuza mba. Vosi vazia mu litembeli lia Baali, ni vizura mu kutura lovega lulala kuduuka ku lundi.

²² Maku Jehu yalaga musaalisi walindaa ziganza zindakatifu azitulize ichova na azihaane ku avasigamiri va Baali.

²³ Inyima wa yaga, Jehu mwene harara na Jehonadabu muyaayi wa Rekabu vingira mu litembeli, navolera avandu vaali mu, “Mulole ndi avasigamiri va Baali veng'ine nivo vaveeye ho, na musigamiri wa Yahova siyingiyi muno mba.”

²⁴ Maku oyo na Jehonadabu vingira mu ukuhaana visiuviliru kandi ni vihaanwa viu kusambwa ku Baali. Yaali naviiki avasaza samanini ichova wi litembeli kandi yaali navaheeye malago ndi: “Gamudukira mwiti avandu yava vosi; ku woosi oleka mulala kuvo azonoke alatungaa ni livamwoyo lilie!”

²⁵ Nonoho lwa Jehu yaali ni yakamala kuhaana visiuviliru viu kusambwa, yalaga avasikari vu kulinda kandi avanene veve, “Mwingiri, na muviiti vosi; mutaleki mundu kali mulala azonoke mba.” Kunangwa vingira mu Litembeli ni vivavi, ni vavita vosi. Vasikari vu kulinda harara na avanene vakwesa miviri nivagivika ichova wi litembeli. Maku vazizagilira ni vingira havundu hatakatifu hu musi mwi litembeli lia Baali.

²⁶ Vatuliza ichova munara mutakatifu ugwali mu, kandi ni vagusamba.

²⁷ Kunangwa vononyia ligali munara mutakatifu gwa Baali nu kusambula litembeli nu kugirung'anyia litembeli zana kugwa icholoni kuduuka lero.

²⁸ Nandio Jehu yaatuliza ho lisigamira lia Baali mu Isiraeli.

²⁹ Navuzwa Jehu siyagirung'ana kutura mu vwoni vwa Jeroboamu muyaayi wa Nebati, uvwa yalomba avandu va Isiraeli kokora mba, lisigamira lie vifananyi vie vimoli vie zahabu ha Bezeli kandi ha Dani.

³⁰ Yahova yavolera Jehu, “Kigira umali kokora vulahi mu liduukiza agaveeye malahi mu zimoni ziange na okoli ku visukululwi va Ahabu viosi iviali mu mwoyo gwange, visukululwi vovo valikala ku endeve yu vwami vwa Isiraeli kuduuka ku likula lia kane.”

³¹ Navuzwa Jehu siyahulira lilaga lia Yahova Nyasaye wa Isiraeli nu mwoyo gwigwe gwosi mba. Mu vogono yivwo, yalonda liiva lia Jeroboamu, uwakola Isiraeli vakole vwoni.

Likuza lia Jehu

³² Mu madiku yago, Yahova yaatanga kogehiza ovonene vwi kivala cha Isiraeli. Mwami Hazaeli wa Siria yaguuta nu kugumira kivala choosi cha Isiraeli,

³³ ivugwi wu mugera gwa Jorodani kali kuduuka isavaalu wi lidaala lia Aroeri kandi mugera gwa Arinoni. Yiki chaali harara ni kivala cha Gileadi na Bashani, wi zihiiri zia Gadi na Rubeni, kandi na zihiiri zia Ivugwi wa Manase ziamenya.

³⁴ Vindu vindi viosi via Jehu yakola komeeda ku harara ni vikolwa vivie viu vuluviliri, viang'odwa mu vitabu via makuva ga kale ga vami va Isiraeli.

³⁵ Jehu yakuza kandi na yavilwa mu Samaria, na muyaayi weve Jehoazi yavugula vogono vwivwe kuli mwami.

³⁶ Jehu yamiha mu Samaria kuli mwami wa Isiraeli ku mihiga sirini na nane.