2 Avami 1 - KITABU KITAKATIFU

Elija nu mwami Ahazia

¹ Inyima wi likuza liu mwami Ahabu wa Isiraeli, avandu vi kivala cha Moabu vibaara kutura ku Isiraeli.

² Mwami Ahazia wa Isiraeli yaaguluka kutura munyumba yeeye yigulu yu vwami mu Samaria, ma naasalira vudamanu ligali. Kunangwa yatuma avatumwa valala kuzia koteeva Baalizebubu, munyasaye wi lidaala linene lia vandu va Filisitia, lia Ekironi niiva alahona anoho mba.

³ Navuzwa engelosi wa Yahova yavolera Elija muporofeti kutura Tishibe, azie kwaganira avatumwa kutura ku mwami Ahazia na avateeve, “Kigira ki muzizaa koteeva Baalizebubu, munyasaye wa Ekironi amakuva? Gaveeye kigira muganaganaa ndi sihali na Nyasaye mu kivala cha Isiraeli?

⁴ Volera umwami Yahova avoora ndi, ‘Siulahona kutura mu lisalira liilio lidamanu yilio mba; ivi ulakuza ligali!’ ” Elija yakola kuli Yahova yalaga,

⁵ na avatumwa zana viirana ku mwami. Mwami yavateva, “Kigira ki ni mwirana?”

⁶ Vaativura, “Kwaganiywi nu mundu mulala umanyi nakovoolera kwirane na kokovoolere ndi Yahova akovoleraa ivi ndi, ‘Kigira ki utumaa avatumwa koteeva Baalizebubu, munyasaye wa Ekironi, amakuva? Gakaveeye kigira uganaganaa ndi Sihali na Nyasaye mu kivala cha Isiraeli? Siulahona kutura mu lilwaala liilio mba; ligali ulakuza!’ ”

⁷ Mwami yavateva, “Mundu oyo afaanaa ndi?”

⁸ Vaativura, “Yaali niyiviiki likoti lialombwa ku visero vie zinyama, niyevohi musibi gwo lokova mu kekenge chiche.” Mwami yavoola, “Ni Elija kutura Tishibe!”

⁹ Maku Mwami yatuma munene mulala na vasaza 50. Kugumira Elija. Munene zana yamunyola niyikaye ku kiguru kandi yamuvolera, “Mundu wa Nyasaye, mwami akulangaa uzie kuye, na umolome naye.”

¹⁰ Elija yativulira munene oyo navoora, “Niiva inzi mbeeye mundu wa Nyasaye, leka muliru gwiki kutura mwigulu na gukwiiti harara na vasaza vovo va oveeye navo!” Nonoho muliru gwika nigwiita munene oyo na vasaza veve.

¹¹ Mwami yatuma munene wundi na avasaza veve 50, avanigira nivavolera Elija, “Mundu wa Nyasaye, mwami alaangaa ivi wiki vwangu!”

¹² Navuzwa Elija yativura, “Niiva mbeeye mundu wa Nyasaye, leka muliru gwiiki kutura mwigulu na gukwiiti, ivi harara na avasaza vovo va oveeye navo!” Nonoho muliru gwiika haasi ma nigwiita munene zana na vasaza veve.

¹³ Mwami yatuma kandi munene wundi wa kavaga na vasaza veve amusini. Yanigira ku kiguru naagwa mamumama ku maru geege imbiri wa Elija namugoonya, “O, mundu wa Nyasaye, omberere, inzi na avandu vange. Honyia livamwoyo lietu!

¹⁴ Vanene vandi vaviri na vasaza va vaali navo viitwa nu muliru kutura mwigulu; navuzwa, mwaza yaanza ombere zimbavasi!”

¹⁵ Maku Engelosi wa Yahova yavolera Elija, “Yika haasi uzie naye, na utatia mba.” Kunangwa Elija yazia nu munene oyo ku mwami

¹⁶ namuvolera, “Yiki nicho cha Yahova avoora: ‘Kigira utumi avatumwa koteeva amakuva ku Baalizebubu, munyasaye wa Ekironi kuli sihali na Nyasaye mu Isiraeli wa uteeva makuva, siulahona ligali mba; ivi ligali ulakuza!’ ”

¹⁷ Kunangwa Ahazia yakuza kuli Yahova yaali navooye kuvitira ku Elija. Ahazia siyaali ku nu mwana muyaayi mba. Kunangwa Joramu amwavo weve yavugula ovogono vwivwe kuli mwami mu muhiga gwa kaviri gwi liamiiha lia Joramu, muyaayi wa Jahoshafati, mwami wi Ivuyuda.

¹⁸ Vindu vindi viosi vio mwami Ahazia yakola viang'odwa mu vitabu via makuva ga kale ga avami va Isiraeli.