1 Yohana 5 - KITABU KITAKATIFU

¹ Mundu woosi usuviraa Yeso ni Kristo, uyu aveeye umwana wa Nyasaye, kandi mundu woosi uyanzaa Baba ayaanza umwana weve.

² Kunyi kumanyi kuyaanza avana va Nyasaye: ku ndi gaveeye ku liyaanza Nyasaye kandi ku liitia amalago geege.

³ Uvuyanzi vwitu ku Nyasaye voveeye kovora ukuhulira amalago geege. Kandi amalago geege sigaveeye amadinyu ku kunyi mba.

⁴ Umundu wivulwa kutura ku Nyasaye aveeye umwana wa Nyasaye na aguutaa kivala. Ni ndio kunyi kuguutaa kivala mu livuuvira lietu.

⁵ Kunangwa nivwaha unyala kuguuta kivala? Ni uyu usuviraa, Yeso aveeye umwana wa Nyasaye.

Lilolekiza kigira Yeso Kristo

⁶ Yeso Kristo niyie waza na amazi gi libatizwa lilie. Kandi namasahi gi likuza lilie. Siyaaza na amazi geng'ine, navuzwa na amazi kandi na masahi gilikuza lilie. Roho mwene niyie ololekizaa ndi yaga gaveeye agiligali kigira Roho aveeye giligali.

⁷ Kandi Roho niyie mulolekizi, kigira aveeye agiligali.

⁸ Vaveeye ho avalolekizi vavaga mu kivala, navo ni Roho, amazi, kandi amasahi. Kandi yava vavaga vavugirizana harara.

⁹ Nikuva nikuvugilira lilolekiza lia avandu, lilolekiza lia Nyasaye liveeye linene kuvita; umali kuhaana kololekiza ku umwana weve.

¹⁰ Mundu woosi usuviraa mu mwana wa Nyasaye aveeye ni lilolekiza yili mu mwoyo gwigwe. Mundu utasuviraa Nyasaye umali kumukola muvehi, kigira si yasuuvira lilolekiza lia Nyasaye amali kuhaana ku umwana weve mba.

¹¹ Lilolekiza ni yili: Nyasaye umali kukuha livamwoyo litahera mba, na livamwoyo yili liveeye nu vutangiliru vwalio mu mwana weve.

¹² Uyu oveeye nu mwana aveeye ni livamwoyo yili; uyu utaveeye nu mwana wa Nyasaye, siaveeye ni livamwoyo yili mba.

Livamwoyo litahera mba

¹³ Inzi ng'oderaa munyi vindu yivi, kunangwa muduuki kumanya muveeye ni livamwoyo litahera mba, munyi avasuuviraa mu mwana wa Nyasaye.

¹⁴ Yivu nu vuluviliri vwa koveeye navwo imbiri wa Nyasaye. Niiva kulamuteeva kindu choosi kolondekana nu vulaliri vwivwe akuhuliraa.

¹⁵ Niiva kumanya ndi akuhuliraa ku viosi via kusaala, koveeye ni limanya ndi kumali konyoora viosi via ku koteeva kuye.

¹⁶ Niiva mundu alolaa amwavo weve naakoraa uvwoni vutaveeye vumudukiza ku likuza, gamudukira amusaaliri ku Nyasaye, na Nyasaye alamuha livamwoyo litahera mba. Likuva yili mbolera yavo avakolaa uvwoni uvutavimiliraa kuduuka ku likuza. Navuzwa voveeye ho nu uvwoni vuhilaa vandu mu likuza. Simbolaa musaale Nyasaye ku vwene yivwo mba.

¹⁷ Likora liosi liu vudamanu liveeye uvwoni. Navuzwa voveeye ho uvwoni vutimiliraa umundu kuduuka mu likuza.

¹⁸ Kumanya vulahi ndi, umundu woosi wivulwa kutura ku Nyasaye kokora uvwoni mba, kigira mwana wa Nyasaye amukingaa na kandi Setani sia lamusaliriza mba.

¹⁹ Kumanya koveeye avana va Nyasaye, kali avumukivala vosi vaveeye hasi ho vunyali vwa Setani,

²⁰ kandi kumanyi vulahi Mwana wa Nyasaye umali kuuza kandi umali kukuha limanyiriza ku kuduuki kumanya Nyasaye wiligali. Kunyi komenyi muvuhambani na Nyasaye wiligali muvuhambani nu Mwana weve Yeso Kristo. Uyu niyie Nyasaye wiligali kandi yili nilio livamwoyo litahera mba.

²¹ Avana vange vayanze, mwerehe kandi mwilindi aveene ku avanyasaye vu vugadi.