1 Yohana 4 - KITABU KITAKATIFU

¹ Avalina avayaanze vange, mutasuuvira avandu vosi avevoora avaveeye na Roho, navuzwa muhenzerizi kandi mulole niiva mundu oyo yimilirwa na Roho wa Nyasaye. Yiki ni kigira avaporofeti vovovehi vanyingi vamali kuzia mu kivala choosi.

² Mulamanya niiva ni Roho wa Nyasaye kuli ndi: umundu woosi wiyama Yeso Kristo yaza kuli mundu, umundu oyo aveeye na Roho wa Nyasaye.

³ Navuzwa mundu woosi uvula kwiyama Yeso, siaveeye na Roho wa Nyasaye mba. Yigwo ni roho gwu musigu wa Kristo, gwa mwahulira guzaa; kali kalunu goveeye mu kivala.

⁴ Avana vange, munyi muveeye ava Nyasaye, kandi mwaguuta avaporofeti vovovehi kigira Roho oveeye mumunyi, aveeye munene kandi wizingulu kuvita roho oveeye mu vandu vikivala.

⁵ Avaporofeti vu vugadi yava vaveeye vu mu kivala; yaga vavoola agikivala, kandi avumukivala vavahulira.

⁶ Navuzwa kunyi koveeye ava Nyasaye, kandi umundu woosi umanyi Nyasaye ahuliraa kunyi, navuzwa oyo utaveeye wa Nyasaye sia kuhulira mba. Ku yaga kumanya Roho wa giligali na roho wu vugadi.

Nyasaye aveeye uvuyanzi

⁷ Avalina vange avayaanze, leki kuyaanzane, kigira uvuyanzi voveeye vwa Nyasaye. Umundu woosi uyanzaa aveeye mwana wa Nyasaye, kandi amanyi Nyasaye.

⁸ Umundu utaveeye nu vuyanzi siamanyi Nyasaye mba, kigira Nyasaye aveeye uvuyanzi.

⁹ Nyasaye yamanyia uvuyanzi vwivwe ku kunyi, kigira yatuma mwana weve muderwa mu kivala, kunyi kuduuki kuva mwoyo muye.

¹⁰ Yivu nivwo uvuyanzi: Sikwaali ni kunyi avakwayaanza Nyasaye, navuzwa niyie wakuyaanza, natuma mwana weve kuva ikisiuviliru chu kutakasa uvwoni vwitu.

¹¹ Avalina vange avayaanze, Nyasaye naava ni yakuyaanza kuli ndio, gakuduukiraa kunyi kuyaanzane.

¹² Siaveeyeho nu mundu kali mulala walola Nyasaye. Navuzwa niiva kunyi kuyaanzana, Nyasaye amenyaa mu kunyi, kandi uvuyanzi vwivwe voveeye vuduukiru mu kunyi.

¹³ Kigira yaga kumanyi ndi komenyi mu Nyasaye, naye amenyaa mu kunyi, kigira umali kukuha Roho weve.

¹⁴ Kunyi kumali kolola kandi kololekiza ndi, Baba yatuma umwana weve ave Muhonyi wa avumukivala.

¹⁵ Mundu woosi wiyama Yeso nu mwana wa Nyasaye, Nyasaye amenyaa muye, naye mu Nyasaye.

¹⁶ Kunyi aveene kumanya kandi kusuuvira uvuyanzi vwa Nyasaye aveeye navwo ku kunyi. Nyasaye aveeye uvuyanzi kandi oyo, Omenya mu vuyanzi amenyaa mu Nyasaye, kandi Nyasaye amenyaa muye.

¹⁷ Kigira yaga uvuyanzi vokoleywe uvudukiru mu kunyi kunangwa kuduuki konyoora uvuluviliri ku Lidiku lie Likalaga; na kulava nalio kigira livamwoyo lietu mu kivala yiki liveeye lilala liere kuli lia Kristo.

¹⁸ Sihaveeyeho nu vuti mu uvuyanzi; navuzwa uvuyanzi vwa agiligali vukungaa uvuti vwosi. Kigira uvuti voveeye na maduywa; mundu woosi utizaa akikiri kuva muduukiru mu vuyanzi.

¹⁹ Kunyi kuyaanza kigira Nyasaye yakuyaanza mu litanga.

²⁰ Niiva umundu woosi avoora, “Nyanza Nyasaye,” navuzwa adunyiraa amwavo weve, aveeye mugaadi. Niiva avula kuyaanza amwavo weve wa alolaa, anyala kuyaanza ndi Nyasaye wa atalolaa?

²¹ Lilaga lia Kristo amali kuha kunyi ni yili, “Mundu woosi uyanzaa Nyasaye kuduuka ayaanze amwavo weve kandi.”