1 Yohana 1 - KITABU KITAKATIFU

Likuva lie livamwoyo

¹ Kumung'oderaa munyi kolondekana ni Likuva lie livamwoyo iliali ho kutura mu litanga. Kwalihulira kandi kwalilora kunyi aveene, moni na moni; Yee, kwalilola kandi kwagumira kulio na amakono giitu.

² Lwi livamwoyo yili lialoleka, kwalilora kandi kwalilolekiza, kandi kumwilwazira kandi kwuvoolere livamwoyo litahera mba, iliali na Baba, kandi lialolekizwa ku kunyi.

³ Kunyi kumwilwaazira cha kwalola kandi cha kwahulira, kunangwa muduuki kuva mu lisanga ni kunyi, kandi lisanga lietu liveeye harara na Baba, nu umwana weve Yeso Kristo.

⁴ Kong'oda yaga, kunangwa uvusangari vwitu vuduuki kuduukizwa.

Nyasaye aveeye uvulavu

⁵ Yili nilio likuva lia kwahulira kutura ku Yeso Kristo, na nigo gakumwilwaziraa, Nyasaye aveeye uvulavu, kandi muye sihaveeye ni kisundi mba.

⁶ Nikuva ni kovora koveeye ni lisanga naye, na ni kogenda mu kisundi, kugaada kandi si komenyi kolondekana na giligali mba.

⁷ Navuzwa ni kogenda mu vulavu kuli mwene aveeye mu uvulavu, kunyi koveeye ni lisanga aveene na aveene; kandi amasahi ga Yeso Kristo mwana weve gakwogizaa uvwoni vwosi.

⁸ Ni kovora sikoveeye nu uvwoni, kwigaada kunyi aveene, na giligali sigaveeye mu kunyi mba.

⁹ Niiva kuliyama uvwoni vwitu, Nyasaye aveeye musuuvirifu kandi mulungi, na alakusamiiha uvwoni vwitu kandi alakutakasa kutura ku vuchamu vwosi.

¹⁰ Nikuva ni kovora sikwakola uvwoni, kokoraa Nyasaye ave mugaadi kandi likuva lilie siliveeye mu kunyi mba.