1 Vatesalonike 5 - KITABU KITAKATIFU

¹ Sihaveeye ho kivuni komung'odera kunyi, avaamitu viitu, makuva gizing'inga gi mihiga, lwa Mwami alirana mba.

² Munyi aveene mumanya vulahi ndi Lidiku liu Mwami lilakaze kuli mwivi yaazaa vudiku.

³ Lwa vandu vava nivakevoola ndi, “Jiveeye mirembe kandi vindu viosi viveeye vulahi kandi liveeye lielemeriza,” nonoho kivi kilakaduuki kuvo vwangu kuli lilumwa liduka ku mukali oveeye inda, kandi avandu si vahononoka ligali mba.

⁴ Navuzwa munyi, avaamitu viitu, simuveeye mu kisundi mba, kandi Lidiku yilio litamugosa kuli mwivi mba.

⁵ Munyi mwosi muveeye avandu vuvulavu kandi avumbasu. Kunyi sikoveeye avuvudiku anoho avikisundi;

⁶ kunangwa kutagona kuli avandi vakora, navuzwa kulindi kazozo kandi kove novogeri.

⁷ Yavo avagonaa zindoolo, vagona vudiku, navo avahambikaa, vahambikaa vudiku.

⁸ Navuzwa, kunyi koveeye avumbasu, gakuduukiraa kove no vogeri. Kuduuka kwiviiki lisuuvira nu vuyanzi, kuli isalamba kandi lisuuvirizwa lietu lio vuhonyi kuli igudwa siyakotovola.

⁹ Nyasaye siyakuviika kusaliri kigira uvutima vwivwe mba, navuzwa konyoole uvohonyi kuvitira mu Mwami wiitu Yeso Kristo;

¹⁰ uwa kukuzira, kunangwa komenye harara naye kali nikuva mwoyo anoho ni kukuza lwa aliiza.

¹¹ Kunangwa, muzuvane munyi aveene naveene nokokonyana vene na vene, kuli mukolanga kazozo.

Amalago gu kumaliriza ni licheliza

¹² Avaamitu viitu, kogoonya munyi muhaane luyali luduukanaa ku yavo avayinziraa hagati hinyu, ava mwimiliraa nukwigiza mu liiva liu Vukristayo.

¹³ Mu vavugiliri ligali mu vuyanzi kigira miyinzi jaavo ja vakora. Mumenye ni mirembe hagati hinyu munyi aveene naveene.

¹⁴ Kumuzuvaa munyi avaamitu viitu, muliganihizi avagata, muluvirizi vati, mukoonye avadedekere, kandi mwikuziri ku avandu vosi.

¹⁵ Muhenze mundu kali mulala atatuunga wundi kali mulala uvudamanu ku vudamanu mba navuzwa vuli kazozo, mukolerane vulahi vene na vene kandi ku vandu vosi.

¹⁶ Musangare kazozo,

¹⁷ musaale Nyasaye vugira kolekera.

¹⁸ Musandizi Nyasaye ku vindu viosi kigira yivu voveeye uvulariri vwa Nyasaye ku munyi mu Kristo Yeso.

¹⁹ Mutigaliri Roho mba.

²⁰ Mutachaya amakuva go voporofeti mba,

²¹ mugerizi vindu viosi, mugumiri vudinyu ligali yiki ekeveeye kilahi:

²² Mwiyahuli ku vudamanu zing'ano ziosi.

²³ Nyasaye mwene ahaanaa mirembe ku kunyi amutakase ligali; kandi roho winyu, mioyo ni miviri jinyu jive milavu vugira imbara kuduuka ku liza liu Mwami wiitu Yeso Kristo.

²⁴ Uyu ulangaa munyi aveeye musuuvirifu alakola ndio kigira aveeye musuuvirifu.

²⁵ Avaamitu viitu, mukusaaliri kandi.

²⁶ Muchelizi avaamitu vosi ni livuusa litakatifu.

²⁷ Mugoonyaa mu vunyali vwu Mwami ndi, ibarwa yiyi esomerwe avaamitu vosi.

²⁸ Zimbavasi ziu Mwami wiitu Yeso Kristo zive ni munyi vosi.