1 Vatesalonike 4 - KITABU KITAKATIFU

¹ Mu limaliriza, avaamitu, viitu, mwigi kutura ku kunyi kuli gamuduukira komenya kunangwa muduuki kuyaanziza Nyasaye. Nindio mwamenyangi kandi kalunu kumugoonya nu kumwiganihiza mu lieta liu Mwami Yeso mumeede kokora ndio ligali.

² Munyi mumanya lugano lwa malago ga kwamuha ku vunyali vwu Mwami Yeso.

³ Yivu nu vulaliri vwa Nyasaye, munyi muduuki kutakaswa; mwerehe kutura ko voheyi.

⁴ Mundu sa mulala ku munyi gamudukira amanye kuli amenyaa nu mukali weve mwene munzira yu vutakatifu, kandi yuluyali,

⁵ sigaveeye mu liegomba lidamanu liu muviri kuli avandu vi zihiiri, avatamanyi Nyasaye.

⁶ Mu makuva yaga, mundu atakolera Mukristayo wache uvudamanu. Umwami mwene alavaanza kisaalia ku yavo avakolaa vindu yivi viosi; kuli kwamuvolera, kandi ku mwiganihizaa nizinguru.

⁷ Nyasaye siyakulanga komenye mu voheyi, navuzwa uvutakatifu.

⁸ Kunangwa, uyu usuulanga amigizu yaga siasuraa mundu, navuzwa asuraa Nyasaye, uhaanaa kumunyi Roho weve Mutakatifu.

⁹ Sihaveeyeho nikivuni chu ku mung'oderaa ku liyaanza avamwavo vinyu mba munyi aveene mumali kwigizwa na Nyasaye kuli munyala kuyaanzana aveene naveene,

¹⁰ kigira mukoraa likuva yilio ndio, kuyaanza avamwavo vosi avaveeye mu Makedonia mwosi, avaamitu viitu kunyi kumuzuva mumeede kokora ndio ligali.

¹¹ Muve ni lienya lio komenya mu liiva lio kwehozeriza vuli mundu akole makuva geege mwene, kuganagani uvutumiki vwinyu aveene, kandikakole miyinzi namakono geege mwene kuli wa kwamuvolera maziambiri.

¹² Munzira yiyi mulanyola lizominywa kutura ku vandu avasuuviraa kandi muvuli kuva ni lienya kindu kutura ku mundu woosi.

Liza lio Mwami

¹³ Avaamitu, viitu kwenya munyi mumanye agiligali ga makuva ga yavo avamala kukuza. Mutaverera kuli yavo avataveeye nilisuuvirizwa.

¹⁴ Nikuva nikusuuvira ndi Yeso yakuza ma nasimuguka, kunangwa. Kusuuviri ndi Nyasaye alakavaleete harara na Yeso, yavo vosi avakuzaa nivasuuvira muye.

¹⁵ Yaga ga kumwigiza kalunu gaveeye amigizu gu Mwami. Kunyi avakoveeye mwoyo, ku lidiku liu Mwami aliiza, sikulimilira yovo avamala kukuza mba.

¹⁶ Gulakave ho nu mwoyo munene gwu kulanga, kandi nu mwoyo gwe engelosi Munene, kandi nugwi kisiriva cha Nyasaye, maku Mwami mwene aliika kutura mwigulu. Yavo vaakuza nivasuuvira mu Kristo valakasimuguki kutanga.

¹⁷ Kunangwa kunyi avakukiri mwoyo ing'inga yeyo kulakavungizwi harara navo mu malesi kwaganira mwami mu vwerefu; na ndio kulava harara nu Mwami mihiga ni mihiga.

¹⁸ Kunangwa mu leminyane mioyo munyi aveene naveene namakuva yaga.