1 Vatesalonike 3 - KITABU KITAKATIFU

¹ Kunangwa, lwa kwaali sikunyala kwikuzira kali hakuzu kwatovola ndi ni vulahi kunyi kutigale inyima kwenyine mu Azene.

² Kwatuma Timateo, amiitu wiitu kandi muyinziri wache kigira Nyasaye mu Ivangeri ya Kristo, yaaze yaho kumudinyiriza nokumukoonya mu lisuuvira lienyu.

³ Kunangwa mundu kali mulala atilana inyima kigira lidambizwa yili mba. Munyi mumanyi ndi yivu nuvulaliri vwa Nyasaye.

⁴ Lwa kwaali nikukiri ni munyi, kwa muvooleraa nigakiri kwekoleka, ndi kuziiza konyoora lisalira kandi lidambizwa; kuli mumanyi vulahi yaga gamali kwekoleka.

⁵ Ku kivuni yiki, lwa ndaali si nyara, ndatuma Timateo, kunangwa nduuki kumanya kuli lisuuvira lienyu liveeye. Ndaali nuvuti, namusia mugerizi wamugeriza munzira yoosi, na miyinzi jietu ja kwa kola hagati hinyu jive ja vuzwa.

Amakuva malahi ga Timateo gu kudinyiriza

⁶ Kalunu Timateo amali kuuza, kutura ku munyi na akovooleeye amakuva malahi gilisuuvira, novuyaanzi vwinyu. Amali kokovoolera kuli mwizulira kunyi kazozo, nu kwekomba kolola kunyi, kuli kunyi kandi kwegomba kolola munyi.

⁷ Kigira yaga, avaamitu viitu, kwaleminywa mioyo mu kivi chietu choosi no mulidambizwa lietu kigira lisuuvira lienyu.

⁸ Kalunu koveeye mwoyo ligali kigira musingiyi vudinyu mu Mwami.

⁹ Kalunu kunyala kusandiza Nyasaye wiitu kigira munyi. Kumusandiza kigira vusangali vwa koveeye navwo imbiri wa Nyasaye wiitu kigira munyi.

¹⁰ Kusaala Nyasaye vudiku nu mbasu ligali numwoyo gwitu gwosi aleke kunyi kololane nimunyi moni namoni, kuduuki kumuha ekegeheraa mu lisuuvira lienyu.

¹¹ Kalunu, Nyasaye wiitu, kandi Baba wiitu, harara nu Mwami wiitu Yeso akwimiliri mu zinzira zietu kuduuki ku munyi.

¹² Umwami amukole muyaanzane aveene naveene; kandi vuyanzi vwinyu vuduuki komeedeka ku vandu vosi.

¹³ Munzira yiyi alamudinyiriza na munyi mulava avadukiru vatakatifu imbiri wa Nyasaye wiitu kandi Baba wiitu lwu Mwami wiitu Yeso yaza harara na vandu veve valungi vosi.