1 Vatesalonike 2 - KITABU KITAKATIFU

¹ Avaamitu viitu, munyi aveene mumanyi ndi iliiza lietu ku munyi siliali lia vuzwa mba.

² Munyi mumanya kuli kwaali ni kusaliriziywi kandi ni konyegeywi mu Filipi nikukiri kuuza ku munyi mu resalonike. Kali niiva vuhing'ani vonene vwali ho, Nyasaye wiitu yakuha uvuluviliri kumuvolera Ivangeri yeeye.

³ Ligoonya lietu ku munyi si litulaa ku matava, anoho ku zing'anagani zindamanu, anoho sikugerizaa kugaada mundu vosi mba.

⁴ Navuzwa kuli wa Nyasaye yakuvugilira kokolwe avalindi vi Ivangeri yeeye, ku kovora ndio sikovoola kuyaanzizi avandu mba, navuzwa kuyaanzizi Nyasaye ugerizaa mioyo jietu.

⁵ Munyi mumanyi vulahi ndi sikwaza ku munyi na makuva guvugadi vwu kwiyizominya, anoho sikwatumikira amakuva gu kukinga vudamanu vwitu mba: Nyasaye aveeye muloli wiitu.

⁶ Sikwenyaa ilizominya kutura ku mundu woosi, kutura ku munyi, anoho ku vandu vandi mba. Kuli avatumwa va Kristo kwaali kunyala kumudwika musigo,

⁷ navuzwa kwamuyaanza, nikumukolera amalahi kuli mama adendaa avana veve umwene.

⁸ Kigira vuyanzi vwitu vonene ku munyi, kwaali avetegeku kusanga ni munyi; sigaveeye mu Ivangeri ya Nyasaye yenyine, navuzwa kali ni livamwoyo lietu, kigira mwamala kuva avayaanze viitu ligali.

⁹ Munyi mwizulizaa, avaamitu viitu, kuli kwayinzira vudinyu kandi nikunyang'ana! Kwayinzira vudiku na mbasu ku kunyangiza mundu kali mulala ku munyi lwa kwamwilwazira Ivangeri ya Nyasaye.

¹⁰ Munyi muveeye avalolekizi vitu, kandi Nyasaye ndio; miima jietu ku munyi vandu avasuuviraa jaali Mitakatifu, milungi kandi vugira imbara.

¹¹ Munyi Mumanyi ndi kwakolera mundu sa mulala kuli baba akoleraa avana veve, mwene.

¹² Kwa muluviriza nu komuleminya umwoyo muduuki kumenya nokogenda mu liiva liyaanziza Nyasaye, uwamulanga muduuki kusanga mu vwami nu vukumi vwivwe.

¹³ Keveeye ho ni kivuni kindi kigira kunyi nikusandiza Nyasaye kazozo. Lwa kwamuletera likuva lia Nyasaye lia mwahulira kutura ku kunyi, munyi si mwalivugula kuli liveeye likuva lia avandu mba, navuzwa kuli likuva lia Nyasaye, ilikolaa miyinzi mu munyi vandu avasuuviri.

¹⁴ Avaamitu viitu, vindu vilala viele viekoleka ku munyi kuli viekoleka ku makanisa ga Nyasaye agaveeye mu Vuyuda, ku avandu vaveeye yo avaveeye va Kristo Yeso. Munyi kandi mwadambizwa lidambizwa lilala liere kutura ku vandu vi kivala chiinyu aveene, kuli vadambizwa kutura ku Vayuda;

¹⁵ aviita Mwami Yeso kandi vaporofeti kandi nivadambiza kunyi. Sivayaanziza Nyasaye mba, kandi vaveeye avasigu ku avandu vosi.

¹⁶ Kali vageriza kukugaya kuvuli kwilwaza ku avandu vi Zihiiri likuva linyala kuvaletera ovohonyi. Munzira yiyi vavungizaa uvwoni vwavo vwa vakora kazozo kandi kalunu vutima vwa Nyasaye vuduuki kuvo ligali mu limaliriza.

Likayirwa lia Paolo kogeniha Tesalonike

¹⁷ Avaamitu viitu, lwa kwavukanywa kutura ku munyi ku ing'inga ngekeeke, mu muviri, sigali ndio mu mioyo jietu, navuzwa kwaali na mahooru kandi nuvuha vwosi kumulora moni na moni.

¹⁸ Kigira yaga, kwenya kuuza ku munyi, inzi Paolo mwene ndageriza kwirana kumugeniha lwu kutanga kandi lwa kaviri, navuzwa Setani ya kwigalira.

¹⁹ Nivwaha oveeye lisuuvirizwa lietu anoho uvusangari vwitu, anoho itaji yu kwiyizominya imbiri wu Mwami Yeso mu liza lilie? Simuveeye ni munyi!

²⁰ Yee munyi muveeye uvukumi vwitu ni lisangala lietu.