1 Vatesalonike 1 - KITABU KITAKATIFU

¹ Inzi Paolo, harara na Sila na Timateo, kong'oderaa munyi avandu vi likanisa liveeye ha Tesalonike avaveeye ava Nyasaye Baba kandi avu Mwami wiitu Yeso Kristo: Zimbavasi ni mirembe vive ku munyi.

Liiva ni lisuuvira lia Avatesalonike

² Kusandizaa Nyasaye zing'inga ziosi kigira munyi mwosi, kumwizulizaa mu lisaala lietu vuli kazozo.

³ Kumwizulizaa mu lisaala lietu ku Nyasaye wiitu kandi Baba kuli muviika lisuuvira lienyu mu vikolwa, kuli vuyanzi vwinyu vomukolaa kuyinzira vudinyu ligali kandi kuli lisuuvirizwa lienyu mu Mwami wiitu Yeso Kristo liveeye lidinyu ligali.

⁴ Avaamitu viitu, kumanya ndi Nyasaye yamuyanza kandi yamalakumutovola muve vandu veve.

⁵ Ivangeri yitu siyaduuka ku munyi mu makuva ameere mba, navuzwa mu zinguru, kandi mu Roho Mutakatifu; kandi mu lisuuvira liveeye liagiligali. Munyi mumanyi vulahi liiva lie limenya lietu lwa kwaali ni munyi. Gaali kigira valahi vwinyu.

⁶ Mwiga ku kunyi kandi kutura ku Mwami, kali niiva mwasalirizwa ligali kuvita, mwanyoola likuva nu vusangali kutura ku Roho Mutakatifu.

⁷ Munyi mwamanya ni muva kelolero ku vandu avasuuviraa vosi mu Makedonia na Akaya.

⁸ Siliali kigira likuva liu Mwami lienyine kutura ku munyi ilialanda mu Makedonia na Akaya mba, navuzwa amakuva gi lisuuvira lienyu mu Nyasaye gamali kuhulirika havundu hoosi. Kunangwa sikunyala kuva ni kindu cha kovora mba.

⁹ Avandu yavo vosi vamoloma kuli mwakwingiriza hagati hinyu lwa kwamugeniha. Kandi kuli mwaleka vifananyi nukuzia ku Nyasaye, kandi kutumikira Nyasaye wa giligali oveeye mwoyo,

¹⁰ kandi kulindilira Mwana weve kutura mwigulu naye ni Yeso, wa yasimugukiza kutura mu vakuzu, ohonyia kunyi kutura mu vutima vwa Nyasaye vuzaa.