1 Vakorintho 9 - KITABU KITAKATIFU

¹ Inzi mbeeye muvoholore ligali, kandi mbeeye mutumwa. Inzi ndaalora Yeso Mwami wiitu, munyi muveeye mativuli gi miyinzi jange kigira ndilwaza Ivangeri.

² Kali niiva avandi sivambugilira kuli mutumwa, munyi mumbugiliraa kigira munyi muveeye muhuri gwu vutumwa vwange mu Mwami.

³ Litivula liange liu kwikinga ku yavo avenyaa kunzigalira ni yili:

⁴ Gaduukiraa koheevwa chulia ni chukunwa kigira miyinzi jange.

⁵ Mbeeye nu vunyali ligali kuvugura mukali Mukristayo wache kuzia naye mu zing'endo ziange, kuli avatumwa vandi vakora, kandi vamiitu vu Mwami harara na Petero.

⁶ Anoho ninzi nzienyine vuzwa harara na Baranaba avagaduukiraa kuyinzira kunangwa konyoole iliekoonya aveene.

⁷ Siaveeyeho musikari utumikaa vuzwa vugira mituungu mba. Mulimi gamudukira kulia amakuyu gi mizabibu ja vasimika. Mwayi gamudukira kunwa ku maveere gi mitugu jije.

⁸ Simbolanga yaga ku vunyali vwu mundu vuzwa, navuzwa lilaga nalio kandi livoora ndio.

⁹ Gang'odwa mu Lilaga lia Musa, “Utavoha eng'ombe umunwa ulwa ugitumikiraa kuhuura uvuswage mba.” Nyasaye siadidikanira zigiriki mba.

¹⁰ Si yaali naganagana kigira kunyi ligali lwa yavoola yaga? Yee, yaga gaang'oderwa kunyi. Uyu ulimaa, kandi uyu ogesaa gavadukiraa vakole imiyinzi jaavo ni lisuuvira ndi valanyora kegero ku viamo vie vitagwa zana.

¹¹ Kunyi kwatanga vumwu vwa Roho hagati sikeveeye kindu kenene niiva kwakanyooye vindu vie kivala kutura ku munyi mba.

¹² Niiva avandi vaveeye nuvunyari konyoora ivindu yivi kutura ku munyi kali kunyi koveeye nuvunyari konyoora ivindu vinene ligali. Navuzwa kunyi kukiri kutumikira vunyali yivu. Mu vogono vwene yivwo kumali kwikuzira ku zing'ano ziosi zie kivi kunangwa kuvuli kuviika kindu chu kwigalira Ivangeri ya Kristo kulanda havundu hoosi vwangu.

¹³ Suuviraa mwamanya ndi vandu vayinziraa mu Litembeli vanyoola viukulia viavo kutura mu Litembeli; Kandi yavo avatumikaa kuhaana visiuviliru ku vwali vanyoola kidieli chavo kutura ku visiuviliru zana.

¹⁴ Munzira ndala nzere, Mwami umali kulaga ndi, yavo aviilwaazaa Ivangeri ya Nyasaye, kuduuka vanyoore liekoonya liavo kuturana ku Ivangeri.

¹⁵ Navuzwa inzi ngikiri kutumikira vindu via gandukira nyoore; kandi sing'odaa ulwene yilu kunangwa mumbe vindu zana mba. Vwakaveeye vulahi inzi nguzi kutanga! Siaveeyeho mundu unyala kunyaga lizominywa liange na amakuva ameere vuzwa mba.

¹⁶ Inzi simbeeye nu vunyali kwiyizominya vuzwa kigira nzilwazaa Ivangeri mba. Kali ndio, inzi mbeeye hasi ha malago kokora ndio. Kivi kenyoole niiva sindiilwaza Ivangeri!

¹⁷ Niiva ngoli miyinzi jange kuli liehaana liange, kuduuka ndungwi; ngolaa ndio kigira gandukira nyinziri, kigira Nyasaye yamala kuhaana ku inzi uvwilwazi vwi Ivangeri.

¹⁸ Umutungu gwange goveeye ki? Mutungu gwange goveeye uvwiyangu vulahi vwu kwilwaza Ivangeri vugira mituungu. Ngolaa ndio vugira koteeva via gaduukanaa nyoore viosi kigira miyinzi ji Ivangeri yanzilwazaa.

¹⁹ Kali nimbeeye umuvoholore kutura ku vandu vosi, inzi ndayekola umutugwa kunangwa nduuki konyolera Kristo avandu vanyingi kuli ganyalika.

²⁰ Ku Avayuda, ndaamenya kuli Muyuda kunangwa nduuki kohonyia Avayuda. Ku yavo avaveeye hasi hi Lilaga, ndaamenya kuli yavo avaveeye hasi hi Lilaga, kunangwa nduuki kohonyia yavo avaveeye hasi hi Lilaga, kali inzi mwene ni ndaavura kuva hasi hi Lilaga.

²¹ Munzira ndala nzere, lwa nyinziraa harara na vandu vizihiiri, menyaa kuli vandu vizihiiri, vugira kolonda Lilaga lia Vayuda. Ngolaa ndio kunangwa nduuki konyoora vandu vizihiiri vaze ku Kristo. Yaga sigamanyia ndi inzi menyaa ichova wi Lilaga lia Nyasaye mba; inzi nondaa ligali Lilaga lia Kristo.

²² Inzi ndaamenya kuli mudedekere hagati ha yavo avaari vadedekere mu lisuuvira, kunangwa nduuki kuvaleeta ku Yeso. Kulwayago, ndaamenya kuli liiva lia vandu vosi, kunangwa nduuki koleta valala ku Yeso munzira yoosi inyalika.

²³ Ngolaa yaga goosi kigira nyenya Ivangeri ilaande kunangwa nduuki kusanga mu vugasu vwayo.

²⁴ Mumanyi vulahi ndi mu ligerana lie zimbiru, avanyaguli vosi vageranaa, navuzwa mulala kuvo niyie onyoora kihaanwa. Kunangwa kuduuka munyaguli muduuki konyoora kihaanwa.

²⁵ Vuli munyaguli naveeye mu miigizu gi zimbiru yinalizaa kugaduukanaa akole mu vindu viosi, kunangwa aduuki konyoora itaji yonekaa. Navuzwa kunyi kokoraa ndio kuduuki konyoora itaji ihindiraa mihiga ni mihiga.

²⁶ Yiki nicho kigira ninyagula vulungi kuduuka hukumalirizira; yiki nicho kigira nimbeeye kuli mulwaani, utagotizaa zinguru zizie ku liduyaduya mwika vuzwa.

²⁷ Nombaa umuviri gwange kuva mudukiru ligali ku liduywa kunangwa inzi mwene kandi ndanyooleke nimbeeye harara na yavo avandaamara kulanga mu ligerana yili.