1 Vakorintho 8 - KITABU KITAKATIFU

¹ Kalunu, nyenya kong'oda kolondekana ni viukulia visalisirangwa vifananyi, gaveeye agiligali ndi, “Kunyi kwosi koveeye nilimanya,” kuli vavoola. Navuzwa limanya kuli yilio lilombaa mundu kuva ni liegingira, nitali uvuyanzi vokolaa kunyi kuviruka mu Roho.

² Mundu naava naganagana yamanya kindu, agiligali gaveeye ndi, akikiri kumanya kindu kuli gamudukira amanye.

³ Navuzwa umundu uyanzaa Nyasaye, oyo yamanyikana ligali naye.

⁴ Kunangwa, iliilia lie viukulia vihaaniywi ku vifananyi; kunyi Avakristayo kwamanya ndi vifananyi siviveeye vindu viveeye mwoyo mba; kwamanya vuzwa Nyasaye aveeye mulala yenyine.

⁵ Kali niiva viveeye ho vindu vilangangwa “avanyasaye” mwigulu anoho mu lirova kali vaveeye ho “avanyasaye” na “vami” vanyingi kuli yava;

⁶ navuzwa ku kunyi aveeye ho Nyasaye mulala yenyine vuzwa, Baba oveeye mulombi wi vindu viosi, wa koveeye mwoyo kigira oyo. Kandi haveeye ho vuzwa nu Mwami mulala Yeso Kristo, wi vindu viosi vialombwa kuvitira muye; kandi koveeye mwoyo kuvitira muye.

⁷ Navuzwa, sivaveeye vosi avamanya giligali yaga. Vaveeye ho avandu valala vaanala misambwa, kigira kuduuka kalunu lwa valizaa viukulia kuli yivi valora vikikiri vuzwa viukulia visalisirangwa misaambwa. Na kigira zing'anagani zie mioyo jaavo ziveeye zindedekere, kandi valora ndi zimali kwononywa ni viukulia.

⁸ Navuzwa iviukulia sivinyala kukuhira ahimbi ku Nyasaye mba. Ni koleka kulia sikulagotiza kindu choosi mba, kinga nikuva ni kulia sikulavoola kindu choosi mba.

⁹ Muhenze vulahi, mutaleka vovoholore vwinyu yivu vwi likora vove vwu kwikigitariza yavo avaveeye vadedekere mu lisuuvira, ma vagwi muvwoni mba.

¹⁰ Niiva mundu oveeye mudedekere mu lisuuvira alalola ivi oveeye mundu wi limanya nulizaa viukulia mu Litembeli lie vifananyi; sialaluvilira kulia viukulia visalisirangwa vifananyi?

¹¹ Kunangwa kigira limanya liilio, umundu mudedekere uyu, aminyu wa Kristo yakuzira aladiva mu Roho.

¹² Navuzwa niiva wonera avamwavo vovo niwononyia zing'anagani ziavo lwa ziveeye zindedekere, wonera Kristo kandi.

¹³ Kulwa yaga, niiva chukulia nicho kelombaa amwavo wange kokora vwoni, sindalia inyama kandi mba, gase ndakora amiitu kokora vwoni.