1 Vakorintho 7 - KITABU KITAKATIFU

¹ Kolondekana na makuva gamwang'odera, ni vulahi musaza avuli koleta mukali.

² Navuzwa kigira ligerizwa ku likora voheyi limeedeki ligali, gaduukiraa musaza sa mulala ave nu mukali weve mwene, kandi mukali sa mulala adukanaa ave nu musaza weve mwene.

³ Kuduuka musaza akolere umukali weve mu liiva harara kuli gamudukira, kandi mukali akolere musaza weve ndio.

⁴ Mukali siaveeye nu vunyali ku muviri gwigwe mwene mba, navuzwa musaza aveeye navwo. Gaveeye ndio kandi, musaza siaveeye nu vunyali ku muviri gwigwe mwene mba, navuzwa mukali aveeye navwo.

⁵ Mutasuulani aveene naveene ku likolerana agamuduukira mba, nigataveeye ku lihulirizana lia mulagani kutanga ku ing'inga ngekeeke, muduuki kuva nu vwiyangu vulahi vwu kusaala; ma inyima muve harara kandi, kunangwa Setani avuli kuva nu vwiyangu ku mugerizaa kigira livula kwilinda kwinyu.

⁶ Simunigaa mukore yaga mba, navuzwa mwigizaa mukore ndio niganyalika.

⁷ Ndakayaanziliyi ndi munyi vosi muve kuli inzi mbeeye. Navuzwa mundu sa mulala aveeye ni kihanwa chiche kidukiru umwene kutura ku Nyasaye, umundu mulala kihanwa yiki, na wundi kihanwa kila.

⁸ Ku yavo avakikiri koleetana kandi yavo avakunzakali, mboraa ndi: ni vulahi yavo vazizagiliri komenya vuzwa venyine, kuli inzi mbeeye.

⁹ Navuzwa, niiva sivanyala kwilinda aveene ku likayirwa kuduuka valeetane. Kigira ni vulahi ligali koleta mukali kuvita kwegomba.

¹⁰ Ku yavo vandu vamala koleetana, simbanaa lilago litaveeye liange mwene mba, navuzwa liu Mwami Yeso: Mukali atalekana nu musaza weve mba.

¹¹ Navuzwa niiva alatula ku musaza, nivulahi amenye vugira koleetwa kandi, anoho yirani kuhambanywa ku musaza weve. Musaza naye atakunga mukali weve mba.

¹² Ku vandu vandi vosi mboraa, Ku vwange vuzwa, sigaveeye gu Mwami mba: niiva musaza Mukristayo aveeye nu mukali utasuviraa, nu mukali oyo avugiliri kuzizagilira komenya naye, atamuleka mba.

¹³ Niiva umukali Mukristayo aleetwa nu musaza utasuviraa, nu umusaza oyo avugiliri kuzizagilira komenya naye, mukali oyo atamuleka mba.

¹⁴ Musaza utasuviraa agirung'anywaa na Nyasaye kuvitira mu mukali weve; kandi umukali utasuviraa agirung'anywaa kuvitira mu musaza weve. Kigira yaga avana vaavo sivakaveeye avatakase imbiri wa Nyasaye mba. Navuzwa kuli gaveeye kalunu, yavo vaveeye vatakatifu imbiri wa Nyasaye.

¹⁵ Navuzwa niiva mulala kuvo utaveeye musuuviri aleenya kolekana nu wache oveeye Mukristayo, leka akole ndio. Mu makuva kuli yaga, Mukristayo naava musaza anoho mukali, alava muvoholore kotovola. Nyasaye yamulanga mumenye mu mirembe.

¹⁶ Ivi mukali Mukristayo unyala kumanya ndi ulakahonyie musaza woovo? Anoho ivi musaza Mukristayo, unyala kumanya ndi ulakahonyie mukali woovo?

Omenye kuli Nyasaye yakulanga

¹⁷ Gaduukanaa vuli mundu amenye kolondekana ni kihanwa chu Mwami Yeso Kristo yamuha kandi kuli yaali lwa Nyasaye yamulanga. Yili nilio lilago liange lia nzigiza mu makanisa goosi.

¹⁸ Niiva Nyasaye yalanga mundu ni yakevwa, atageriza kutuliza zimbala zie likevwa mba. Kandi niiva yalangwa na Nyasaye nakikiri kokevwa, atakevwa mba.

¹⁹ Kigira likevwa anoho livula kokevwa siviveeye kindu mba; ekeveeye kenene ni kugumira no kolonda amalago ga Nyasaye.

²⁰ Vuli mundu amenye mu liiva kuli yaali lwa yaavugilira lilangwa lia Nyasaye.

²¹ Ivi waali mutugwa lwa Nyasaye yakulanga? Vulahi. Utahenda mwoyo mba. Navuzwa niiva wakanyoola vwiyangu kuva muvoholore, tumikira vulahi uvwiyangu yivwo.

²² Uyu walangwa nu Mwami naveeye mutugwa, aveeye muvoholore mu Mwami. Munzira ndala nzere, umundu walangwa naveeye muvoholore, aveeye umutugwa wa Kristo.

²³ Nyasaye yaagula munyi vosi ku vuguli vonene; na mutagwa kandi avatugwa va vandu mba.

²⁴ Avamitu vange, umundu sa mulala ku munyi amenye mu liiva harara na Nyasaye kuli lwa yaali ing'inga ya yalangwa.

Amateeva ku avakikiri koleetana kandi Vakunzakali

²⁵ Kolondekana na mateeva ginyu ku vandu vakikiri koleetana, kandi vakunzakali, simbeeye ni lilago kutura ku Mwami Yeso Kristo mba. Navuzwa mbana lilola lie zing'anagani ziange kuli mulala oheveywi zimbavasi ziu Mwami, kandi udukana asuuvirwi.

²⁶ Kunangwa, kolondekana nu vudinyu voveeye ho kalunu, inzi ng'anagana ndi vwa kaveeye vulahi mundu amenye vuzwa kuli aveeza kazozo.

²⁷ Waleeta umukali? Utageriza koleka mukali woovo mba. Ivi ukikiri koleta mukali? Uteenya oleete mukali mba.

²⁸ Niiva ulaleeta mukali si ulava nokoli vwoni mba. Na niiva umukana mugima azia lukali, sialava naakori vwoni mba. Navuzwa yavo avaleetanaa vanyoola vudinyu vunyingi mu liiva lia kalunu, ninzi nyenya kumuhonyia mu gene yaga.

²⁹ Avaamitu, aganyenyaa kovora ni yaga: keheri keveeye ahimbi. Kutura kalunu yavo avaleetaa vakali vamenye kuli vakikiri koleta.

³⁰ Yavo avasioma vave kuli vatasiomaa. Yavo avasangalaa, vave kuli yavo vatasangalaa. Yavo avagulaa vave kuli yavo vataveeye ni kindu chavaguli.

³¹ Yavo avadidikanaa kutumikira vindu vie lirova yili, vave kuli avatatumikiraa vindu vie lirova ligali. Liiva lie lirova yili, kuli kumanyi, livitaa.

³² Ndakayanzi munyi muvuli kuva ne kehenda mwoyo. Mundu utaveeye nu mukali anyang'aniraa miyinzi ju Mwami, kigira agerizaa kuyaanziza Mwami.

³³ Navuzwa umundu oveeye nu mukali ahenderaa vindu vie lirova umwoyo, kigira yenya kuli anyala kuyaanziza mukali weve,

³⁴ Liyaanzilira lilie ligavulwa haali kaviri. Mukali ukikiri koselerwa anoho mukana mugima ahenderaa mwoyo miyinzi ju Mwami, kigira aveeye mutakatifu mu liiva liu mu muviri harara ni liu mu Roho. Navuzwa umukali waazia lukali anyang'aniraa vindu vie kivala yiki aduuki kuyaanziza musaza weve.

³⁵ Muvooleraa yaga kigira nyenya kumukoonya. Singerizaa kumwigalira mba. Nyenya kumukoonya vuzwa muduuki kokora agaveeye malungi kandi malahi mu liehaana ligali ku vutumiki vwu Mwami nu mwoyo gwosi.

³⁶ Niiva umundu aganagana siakoleraa vulahi mukaana mugima weve wa yateeva ku livula kumuleeta vwangu, na niiva mukana amenyaa mihiga minyingi ma naye alolaa ndi kuduuka aleetwe, gamudukira akole kuli yenya, valeetane vuzwa, siava naakori vwoni mba.

³⁷ Navuzwa niiva umusaza ukalagi mu mwoyo mwimwe avuli koleta mukali, na niiva anyala kwilinda mu likayirwa lilie lie lienya kuva harara numukali kandi natovora chakola vugira kunigwa, akolaa vulahi ligali kuvula koleta mukaana mugima oyo.

³⁸ Kunangwa musaza vugilira koleta mukaana mugima weve wa yateeva, akolaa vulahi. Navuzwa umusaza uvula koleta mukali, akolaa vulahi ligali kuvita.

³⁹ Mukali waletwa siaveeye muvoholore kuzia lukali lundi ing'inga yoosi yu musaza weve aveeye mwoyo mba. Navuzwa niiva musaza weve alakuza, aveeye muvoholore koleetwa nu musaza wundi woosi wu mwene ayaanza; navuzwa niiva musaza zana aveeye Mukristayo

⁴⁰ mu likalaga liange inzi ndolaa ndi: alava nu vugasu ligali niiva alamenya kuli aveeye ndio. Yizi niziganagani ziange, na ng'anagana inzi kandi nzimilirwa na Roho wa Nyasaye.