1 Vakorintho 6 - KITABU KITAKATIFU

¹ Niiva mulala ku munyi aveeye ni likuva liu kwigana ku Mukristayo wache, anyala ndi kuluvilira kumuyaara imbiri wa vakalagi vatamanyi Nyasaye, mu vogono vwu kumuyaara imbiri wa vatakatifu vanyala kumala amakuva zana?

² Si mumanyi ndi avatakatifu valakakalagiri lirova? Niiva vumulirova valakakalagirwi ni munyi, kigira ki simuduukana kukalaga kali mu makuva makekeeke?

³ Si mumanyi ndi kulakakalagiri zingelosi? Niiva gaveeye ndio, kunyala kuvula kukalagira ndi ivindu via kazozo?

⁴ Niiva muveeye na makuva go vosoolo ku vindu vie livamwoyo lia kazozo kuli yivi, kigira ki mugahilaa gakalagwi na vandu vataveeye nu luyali mu likanisa?

⁵ Zisoni zive ku munyi! Ganyala kuva ndi siaveeye nu mundu kali mulala ku munyi wo vogeri, unyala kukalaga lisolana hagati ha vamwavo vasangi veve?

⁶ Mu vogono yivwo, Mukristayo mulala ayaara Mukristayo wache mu kiyaalo nokoleka avatasuuvira vakalage makuva gi kiyaalo.

⁷ Agiligali gaveeye ndi: kuva ni miyaalo hagati hinyu kumanyia ndi mwamala kugwa ligali; sivwakaveeye vulahi ligali ku munyi kwikuzira ku likolerwa uvudamanu mba? Si vwakaveeye vulahi ligali kuvita munyi kunuurwa mba?

⁸ Navuzwa munyi aveene naveene mukoleranaa uvudamanu kandi munuulanaa, kali avamwavo vinyu mu Kristo!

⁹ Si mumanyi ndi vandu vachamu sivalinyoola vwami vwa Nyasaye? Mutagadwa mba! Avandu vamenyaa mu kifavwi cho voheyi, avasigamiraa misaambwa, anoho avaheyi, malaya masaaza anoho avasaza vagonaa avasaza vache,

¹⁰ anoho avanuuri, anoho avahuvali, anoho avahambiki, anoho yavehi, anoho aviivi; yava vosi sivalinyoola Uvwami vwa Nyasaye mba.

¹¹ Valala ku munyi mwaali kuli ndio. Navuzwa kalunu mwanihizwa kutura muvwoni. Mwakolwa avatakatifu ku Nyasaye, mwakolwa avalungi imbiri wa Nyasaye ku lieta liu Mwami wiitu Yeso Kristo kandi ku Roho wa Nyasaye wiitu.

Mutumikiri imiviri jinyu kulwu vukumi vwa Nyasaye

¹² Mundu mulala anyala kovora, “Mbugilirwaa kokora kindu choosi.” Yee, vulahi; navuzwa vindu viosi siviveeye vilahi ku ivi mba. Nyara kovora ndi, mbugilirwaa kokora kindu choosi, navuzwa sinzizaa koleka kindu choosi kongola mutugwa wi kindu yicho mba.

¹³ Mundu wundi anyala kovora, “Chukulia keveeye kulwi inda, na inda eveeye kulwi chukulia.” Vulahi; navuzwa Nyasaye alakadiviza viombi viviri. Muviri sigunyala kutumikirwa ku kifavwi chovoheyi mba, navuzwa kutumikira Mwami; Mwami alindaa miviri jietu.

¹⁴ Nyasaye wasimugukiza Mwami kutura mu likuza, kandi alakasimugukizi kunyi ni zinguru zizie.

¹⁵ Simumanyi miviri jinyu jiveeye vivero viu muviri gwa Kristo? Nyara ndi kuvugura kevero kilala chu muviri gwa Kristo, ngekole kuva kevero chu muviri gwu muheyi? Awa, gatava ndio kali hakuzu mba!

¹⁶ Anoho, si mumanyi ndi mundu uhambanyia muviri gwigwe nu muheyi agwiyi muviri mulala naye? Mang'oda Matakatifu gavoora havulavu ndi, “Vombi vaviri valagwa umuviri mulala.”

¹⁷ Navuzwa oyo wihambanyia umwene ku Mwami aveeye mulala mu Roho naye.

¹⁸ Mwerehe ligali ku voheyi. Uvwoni vundi vwosi vwu mundu akolaa voveeye ichova wu muviri gwigwe; navuzwa mundu okolaa vwoni vwo voheyi, yoona ku muviri gwigwe umwene.

¹⁹ Sumanyi muviri gugwo goveeye Litembeli lia Roho Mutakatifu omenya mu ivi, kandi wa mwanyoola kutura ku Nyasaye? Muviri gugwo sigoveeye gugwo mwene mba, navuzwa goveeye gwa Nyasaye.

²⁰ Yaagula ivi nu vuguli vonene. Kulwayago, mutumikiri miviri jinyu kulwu vukumi vwa Nyasaye.