1 Vakorintho 5 - KITABU KITAKATIFU

¹ Kalunu gamali kulanda ligali ndi muveeye ni kifavwi cho voheyi hagati hinyu. Voheyi voveeye vudamanu ligali kuvita kali uvundi vwosi vutaveeye ku hagati ha yavo avatamanyi Nyasaye. Mali kovoolerwa ndi, umundu aheyaa na mama weve wakaviri.

² Munyala ndi kwigingira! Simunyala kovelera kugo? Oyo wakola inguuva yeyo akuungwi kutura mu likanisa.

³ Kali niiva inzi mbeeye ihale mu muviri kutura ku munyi, mbeeye harara ni munyi mu Roho; na ndio, kuli mbeeye ho, mali kukalagira mundu wakola inguuva yiyi.

⁴ Lwa muvuganaa harara, mu lieta liu Mwami wiitu Yeso, umwoyo gwange nigoveeye harara ni munyi, nizinguru ziu Mwami Yeso niziveeye ho kandi,

⁵ gamudukira muhaane mundu uyu ku Setani. Na ndio iliiva lilie liu vwoni liduuki kwononywa, kandi umwoyo gwigwe guduuki kohonywa ku Lidiku lie likalagirwa liu Mwami wiitu Yeso.

⁶ Sivoveeye vulahi munyi kwigingira mba. Simwamanya livoora, “Amamera makekeeke galombaa lihumbi liu vusie vwosi kuvimba?”

⁷ Kuduuka mutulizi amamera makuulu gu vwoni, kunangwa muduuki kuva lihumbi lihia litaveeye na mamera kuli munyi muvezaa. Kristo mwene, mwana wi ligondi wi Lipasaka lietu, umali kuhaanwa kuli kisiuviriru kigira kunyi.

⁸ Kunangwa gendi kolombe lisavo lie Lipasaka. Sigali nu mugadi goveeye na mamera makuulu, amamera gu vwoni kandi gu vuchamu, navuzwa nu mugadi gutaveeye mu na mamera. Mugadi gwu vusuuvirifu kandi gwiligali.

⁹ Ndamwiganihiza mu ibarwa yange yukutanga ya ndamung'odera ndi mutahambani na vandu vaheyi mba.

¹⁰ Simbolaa avandu vosi vumukivala yiki vaveeye vaheyi, anoho vahuvali, anoho vanuuri kandi vasigamiraa vifananyi mba. Nigakaveeye ndio, ngano vwakaveeye vulahi munyi muturi mu kivala yiki ligali!

¹¹ Navuzwa kalunu mung'oderaa ndi: mutahambana nu mundu woosi wilangaa mwene aveeye amiitu mu Kristo, navuzwa aveeye muheyi, anoho muhuvaali anoho usigamiraa vifananyi, anoho mugaadi, anoho mu nyegani anoho muhambiki anoho munuuri. Mundu wu lugano yilwo, mutalia naye, kali hakuzu mba.

¹² Inzi mbeeye navunyaliki kukalagira avandu vaveeye ichova wi likanisa? Sivaveeye yavo mu likanisa ava munyi muduukana kukalagira?

¹³ Nyasaye mwene alakalagira avandu yavo avaveeye ichova wi likanisa. Kuli Mang'oda Matakatifu gavoora, “Mukungi umundu mudamanu wu vwoni kuli yivu atuli hagati hi livugana lienyu.”