1 Vakorintho 4 - KITABU KITAKATIFU

¹ Kunangwa gadukanaa avandu vakuvuguli kuli koveeye avatumikiri va Kristo, avahevwe vunyali vwu kwilwaza agaviswa giligali ga Nyasaye.

² Kindu kilala chenyekaa ku mutumikiri kuli uyu keveeye ndi, kuduuka ave umusuuvirifu ku munene weve.

³ Inzi simbendaa mwoyo ligali kali niiva mulangalagila, anoho vandu vi kivala kungaragira mu kiyaalo mba. Gaveeye giligali inzi mwene sinyala kwikalagira mba.

⁴ Zigangani ziange ziveeye zindahi, navuzwa yaga sigangolaa kuva vugira imbara mba. Mwami niyie uwaalagiraa.

⁵ Kunangwa mutakalagiri mundu wundi woosi ing'inga nikikiri kuduuka mba. Likalaga liu kumaliriza kuduuka lilindi lwu Mwami yaza. Alalang'aminya havulavu ivindu viaviswa viosi viu mu kisundi kandi alamanyia havulavu viaviswa mu zing'anagani zia vandu. Maku vandu vosi valakanyore lizoinywa lidukanaa navo kutura ku Nyasaye.

⁶ Avaamitu vange, inzi mali kokora yaga goosi ku inzi mwene, kandi ku Apolo kulwu vukala vwinyu, kunangwa muduuki kwiga kutura kukunyi kivuni chi livoora yili, “Mulonde amalago gadukanaa.” Kulwayago mulala ku munyi atava ni liegingira na achaye wundi mba.

⁷ Nivwaha wakokora kuva munene kuvita vandi? Siaveeye Nyasaye wakuha ivindu yivi viosi? Na niiva ivi waahevwa, kigira ki wigingira kuli kitaveeye kihanwa cha Nyasaye yakuha?

⁸ Kandi ndio, mwamala konyoora vindu viosi via mwenya? Mwamala kugwa avatugi? Mumali kuva vami? Kali niiva sikoveeye vulahi, ndakayanzi niiva mwakaveeye avami, kunangwa kove vami halala ni munyi.

⁹ Galoleka ku inzi ndi, Nyasaye umali kuha kunyi avatumwa vwiyangu vwukumaliriza ligali, kuli avandu vakalagiywi kwitirwa havulavu imbiri wa vandu, kuva kuli vukinu imbiri wi lirova liosi lie zingelosi kandi lia vandu.

¹⁰ Kunyi koveeye avasiru kigira Kristo, navuzwa munyi muveeye avageri mu lihambana na Kristo! Kunyi koveeye kolegerizwa navuzwa vadedekere, munyi muveeye ni zinguru! Munyi muheevangwa luyali!

¹¹ Ku ing'inga yene yiyi, kunyi koveeye ninzara kandi nu vuluhu; kwiviikaa amadali vuzwa. Kukuywa zinzasaya, kandi sikoveeye na hango hokomenya mba.

¹² Kuluhaa ligali ku likora miyinzi midinyu na makono giitu aveene. Lwa vandi vakulaamaa, kunyi kuvagasiza; lwa kudambizwa, kwikuziraa.

¹³ Lwa kuginangwa, kutivula vulahi novogoosi. Kuduuka lero, kokoleywe vuzwa kuli amandu gi lirova. Kufananyiywi kuli vandu vataveeye no vokonyi kandi avadamanu ligali.

¹⁴ Si ng'odi vindu yivi kigira kumuleganyia, navuzwa kumwiganihiza kuli avana vayaanze vange.

¹⁵ Kali niiva muveeye na vigizi zielefu likomi mu Kristo, simuveeye na vababa vanyingi mba, kigira ndaagwa baba winyu mu Kristo Yeso ku limwilwaazira Ivangeri.

¹⁶ Kunangwa, mugoonyaa ligali mwigi kutura ku inzi.

¹⁷ Yiki nicho kijiri nduma Timateo ku munyi. Aveeye umwana wange muyanze kandi musuuvirifu mu Mwami. Alamwizuliza zinzira ziange zie liiva liange mu Kristo zia inzi nzigiza havundu hoosi mu makanisa goosi.

¹⁸ Avalala ku munyi vatangi liegingira kigira hawundi muganaganaa ndi sindaaza nzizi ku munyi mba.

¹⁹ Navuzwa, Mwami nayanza, ndaaza nzizi kumugeniha vwangu. Na ulwene yilwo sindamanya limoloma lia vandu vigingiraa yavo lienyine mba, navuzwa kandi zinguru ziavo zia Roho wa Nyasaye.

²⁰ Kigira Uvwami vwa Nyasaye sivoveeye vwa makuva meere vuzwa, navuzwa vwe zinguru.

²¹ Muyanziliraa ki? Nzizi ku munyi ni mbimbu, anoho nu mwoyo gwu vuyanzi?