1 Vakorintho 3 - KITABU KITAKATIFU

¹ Avaamitu vange, inzi sindaali nyara komoloma ni munyi kuli molomaa ku vandu vaveeye na Roho mba; navuzwa ndaamoloma ni munyi kuli avandu vu mu lirova yili kuli vana vadoto mu lisuuvira liu Vukristayo.

² Inzi ndaamunwehiza maveere. Sindamulihiza chukulia kidinyu mba kigira mwali ni mukikiri kuduuka kukilia. Yee, kali kalunu, mukikiri kuduukira kulia chukulia kidinyu,

³ kigira mukemenyi kuli avandu vi lirova yili vamenya. Lwe embodoka ni lirembana vikikiri hagati hinyu, vindu yivi vimanyia ndi munyi mukikiri vandu vi kivala, kandi mumenyaa kuli avandu vatamanyi Nyasaye.

⁴ Lwa mulala ku munyi avoora, “Inzi nondaa Paolo”, na wundi, “Inzi nondaa Apolo,” yago sigamanyia vuzwa mukikiri kuli vandu vatamanyi Nyasaye?

⁵ Kunangwa Apolo nivwaha? Kandi Paolo nivwaha? Kunyi koveeye vuzwa avatumikiri va Nyasaye, ava mwanyoolera mu lisuuvira, kuli Mwami yahaana ku vuli mulala ku kunyi kokora muyinzi.

⁶ Inzi ndaataga uvuguza, na Apolo naasama amazi; navuzwa Nyasaye naavuvirukiza.

⁷ Kunangwa, oyo utagaa anoho usamaa mazi vombi sivaveeye kindu. Navuzwa Nyasaye uvirukiza niyie munene.

⁸ Uyu utaagaa kandi uyu usamaa mazi, vombi vaveeye kindu kilala. Nyasaye alahaana amadanyi geege kolondekana ni miyinzi jije mwene.

⁹ Kunyi koveeye avamwavo, avayinziri va Nyasaye; na munyi muveeye mulimi gwa Nyasaye, kandi muveeye kuli inyumba ya Nyasaye.

¹⁰ Nindumikiraa kihanwa cha Nyasaye yamba, ndaakola muyinzi gwu mwumbaki munene wo vogeri, kandi nimbika umusingi, na mundu wundi naye yumbaka kugwo. Navuzwa gaduukiraa mundu sa mulala aheenze vulahi kuli yumbaka kugwo.

¹¹ Siaveeye ho nu mundu unyala kolomba musingi gundi kuvita yigu, ugwamala kolombwa na Nyasaye, nagwo ni Yeso Kristo.

¹² Avalala valumbaka ku musingi yigu ni izahabu, anoho ifeza, anoho amagina guvuguli; avandi valatumikira misaala, anoho vunyasi, anoho uluvuva.

¹³ Uvulahi nuvuduukiru vwi miyinzi ja vuli mundu, vulaloleka lwi Lidiku lia Kristo liliduuka Lidiku yilio muliru gulakavuuli miyinzi ja vuli mundu; kandi muliru gulakagerizi vulahi vwi miyinzi ja vuli mulala yakola.

¹⁴ Niiva muyinzi gwu mundu yumbaka ku musingi yigu gulakahononoke mu muliru, umwumbaki alakanyoole madanyi geege.

¹⁵ Navuzwa niiva miyinzi ju mundu jilakahie, ahene yaho alagotiza madanyi geege; mwene alahonywa kuli ohonokoki kuvitira mu lomemo lwu muliru.

¹⁶ Munyi si mumanyi ndi muveeye Litembeli lia Nyasaye kandi Roho wa Nyasaye amenyaa mu munyi?

¹⁷ Mundu woosi wononyia Litembeli lia Nyasaye, Nyasaye alamudiviza. Litembeli lia Nyasaye liveeye litakatifu, kandi Litembeli yilio ni munyi.

¹⁸ Mundu atiigaada mwene mba! Mulala ku munyi niyiganagana umwene kuva mugeri mu lirova yili, vwakava vulahi oyo yeekole kuva musiru, kunangwa aduuki kuva mugeri.

¹⁹ Ichi lirova yili liganaganaa kuva vogeri, keveeye uvusiru imbiri wa Nyasaye. Amang'oda Matakatifu gavoora, “Nyasaye agumiliraa avageri mu vogeri vwavo.”

²⁰ Mang'oda Matakatifu kandi gavoora, “Mwami yamanya ndi zing'anagani zia avovogeri ziveeye vuzwa.”

²¹ Kunangwa, mundu woosi atiyizominya ku cha vandu vanyara kokora mba. Vindu viosi viveeye vienyu.

²² Naava naveeye Paolo, anoho Apolo, anoho Petero, lirova, yili anoho livamwoyo kandi likuza, vindu viveeyeho kalunu anoho vilivaho, yivi viosi viveeye vienyu,

²³ kandi munyi muveeye ava Kristo, na Kristo aveeye wa Nyasaye.