1 Vakorintho 2 - KITABU KITAKATIFU

¹ Avaamitu vange, lwa ndaaza ku munyi, kumwilwazira agaviswa giligali ga Nyasaye, sindatumikira makuva malahi anoho govogeri vutambi vwa vandu mba.

² Lwa ndaali ni munyi ndatovora mburi kumanya kindu choosi hagati hinyu nitali Yeso Kristo mbitilira likuza lilie ku musalaba.

³ Kunangwa lwa ndaaza ku munyi ndaali mudedekere, kandi nendegera muviri gwosi nu vuti vonene;

⁴ liegiza liange nililwaza liange siliali na makuva govogeri vutambi vwa vandu, navuzwa namakuva gi zinguru zia Roho wa Nyasaye.

⁵ Ndakora ndio kunangwa lisuuvira lienyu livuli kuva kigira vogeri vwa vandu, navuzwa mu zinguru zia Nyasaye.

Ovogeri vwa Nyasaye

⁶ Kali ndio, nzilwazaa likuva lio vogeri ku yavo avaveeye vadukiru mu Roho. Navuzwa vogeri yivu sivoveeye vwi lirova yili liegiza, anoho vwa vami avamiiha lirova yili, avaveeye kunzira yu kudiva mba.

⁷ Vogeri vwa nzilwazaa voveeye vwa agaviswa ga Nyasaye, ovogeri vwaviswa ku vandu navuzwa vwa Nyasaye yatovola kigira uvukumi vwitu kali lirova ni likikiri kolombwa.

⁸ Siaveeye ho nu mulala ku vamihi vi lirova yili wamanya ovogeri yivu mba. Niiva vaali nivavunamyi, sivali vakavambi Mwami wu vukumi mba.

⁹ Navuzwa kuli Mang'oda Matakatifu gavoora, “Kindu chu mundu yavula kolola anoho kuhulira, kindu chu mundu yavula kuganagana kilekoleka, nicho kindu zana cha Nyasaye, yeetegekizira yavo ava muyanzaa.”

¹⁰ Nyasaye umali kuvulira kunyi agaviswa geege kuvitira mu Roho weve. Roho yenyeleriza vindu viosi kali viaviswa ligali mu luliva lwa Nyasaye.

¹¹ Nivwaha unyala kumanya zing'anagani ziu musi ziu mundu nataveeye roho wu mundu oveeye muye? Munzira ndala nzere, siaveeyeho nu mundu umanya zing'anagani zia Nyasaye nataveeye Roho wa Nyasaye mba.

¹² Kunyi sikwanyoola roho wi lirova yili, navuzwa kwanyoora Roho watumwa kutura ku Nyasaye, kuduuki kumanyiriza vihaanwa viosi via Nyasaye amali kuhaana ku kunyi.

¹³ Kunangwa kunyi sikomolomaa mu makuva no vogeri vwa vandu, navuzwa mumakuva gigizwa na Roho Mutakatifu, kuli kwivaala agiligali gu vutakatifu ku yavo avaveeye na Roho.

¹⁴ Ku vosi, utaveeye na Roho sianyala konyoora vihaanwa vituraa ku Roho wa Nyasaye mba. Umundu kuli uyu sianyala kuvimanyiriza mba, viveeye uvusiru kuye, kigira uvulahi vwavio vunyala kuvurwa na Roho.

¹⁵ Mundu oveeye na Roho aveeye ni likalaga lirungi ku vindu viosi, navuzwa oyo mwene sianyala kukalagirwa nu mundu wundi utaveeye na Roho mba.

¹⁶ Kuli Mang'oda Matakatifu gavoora, “Nivwaha unyala kumanya zing'anagani ziu Mwami? Nivwaha unyala kuhaana kuye zing'anagani?” Navuzwa, kunyi kuveeye ni zing'anagani zia Kristo.