1 Vakorintho 16 - KITABU KITAKATIFU

¹ Kalunu, kolondekana na mateeva ginyu ga mwang'odera kigira mabese gi sadaka ivungizangwa kokonya avatakatifu vaveeye mu Vuyuda. Munyi kuduuka mukore kuli ndavolera amakanisa ga Vagalatia kokola.

² Vuli Jumapili umundu sa mulala aviiki halovega mabese kutura ku linyola lilie kunangwa lisolora livuli kuvaho lwa nziza yaho.

³ Lwa ndiduuka yaho, ndakatumi yavo avamulitovola hagati hinyu ni zibarwa ziu kwimanyikanyia, valahile kihaanwa chiinyu Jerusalemi.

⁴ Niiva galava malahi inzi kuzia, maku yavo vanyara kuzia harara ninzi.

Lilohiza lia Paolo

⁵ Ndakaaze ku munyi nindakamara kuvitira Makedonia, kigira nzetegekaa kuvitira yo.

⁶ Niganyalika ndakamenye ni munyi yaho ku ing'inga idukanaa; anoho niganyalika ndakamenye harara ni munyi mu ing'inga yoosi yuvukindu, kunangwa muduuki kongonya nzizagiliri no logendo lwange havundu hoosi handiva ninziizaa.

⁷ Sinyenyaa kumulora chihungu lwambitaa mba. Suuviraa ndakamenye ni munyi ku ing'inga iduuki Umwami nayanza.

⁸ Ndatanga komenya hano mu Efeso kuduuka lwi lidiku lia Pendekote liduka.

⁹ Mali kwigulirwa muliango munene gwi miyinzi miduukiru hano ja jihaane amativuli malahi, kali niiva avasigu vaveeye vanyingi.

¹⁰ Niiva Timateo alaza yaho, mulole ndi mumwingirizi vulahi hagati hinyu, kigira akolaa miyinzi ju Mwami, kuli inzi ngolaa.

¹¹ Kugene yago, umundu woosi atamulegiliza mba, navuzwa mumukonye azizagiliri no logendo lwilwe mu mirembe, aduuki kwirana ku inzi; kigira mulindiliraa yaaze harara na vaamitu vandi.

¹² Kalunu, ku makuva ga amwavo wiitu Apolo, ndaamuzuva ligali amuluuti harara na vamiitu vandi, navuzwa siliveeye lienya lia Nyasaye ligali yaaze ku ing'inga yiyi mba. Nitali alakaze lwaliva nu vwiyangu.

Amakuva gu kumaliriza

¹³ Mulindi, musingiri vudinyu mu lisuuvira lienyu, muve valuviriri, kandi muve ni zinguru.

¹⁴ Mukore choosi cha mukoraa mu vuyanzi.

¹⁵ Kalunu, avaamitu vange, mumanyi vulahi ndi vandu vinyumba ya Sitefano vaali avandu vukutanga ligali konyoora lisuuvira lie Kikristayo mu Akaya, na vayituliza kutumikira vandu va Nyasaye.

¹⁶ Mugoonyaa, avaamitu vange, mwegehizi kandi mulonde vwimiliri vwa vandu kuli yavo, nu vwimiliri vwa vuli mundu okolaa imiyinzi kandi utumikaa harara navo.

¹⁷ Inzi mbeeye nu vuyanzi vonene ligali ku liduka lia Sitefano, Foritunato na Akaiko kigira vatwekizi yicho chenyekangi lwa munyi mwaali nimutaveeye ho.

¹⁸ Vayaanzizi umwoyo gwange harara nu gwinyu. Kulwa yaga, genyekaa kuhaane luyali ku vandu vu lugano yilu.

¹⁹ Amakanisa goosi ga Asia gaamuchelizi. Akwila na Berisila, harara na vandu vosi vi likanisa lia Nyasaye avaveeye munyumba yaavo vamuchelizi mu Mwami nu mwoyo gwosi.

²⁰ Avaamitu vosi hano vamuchelizi. Na munyi muchelizane ni livuusana litakatifu liu vu Nyasaye.

²¹ Inzi Paolo mbachelizi ning'oda ibarwa yiyi nu mukono gwange mwene.

²² Ku vosi mundu natayaanza Umwami, alaamwe. Umwami wiitu hamba!

²³ Zimbavasi ziu Mwami Yeso zive ni munyi.

²⁴ Uvuyanzi vwange vove ni munyi mwosi mu Kristo Yeso. Amini.