1 Vakorintho 15 - KITABU KITAKATIFU

¹ Kalunu avaamitu vange, nyenya kumwizuliza ndi Ivangeri ya ndamwilwazira, na munyi nimugivugula kandi niyo yilisuuvira lienyu nilisingira ku vudinyu.

² Ivangeri yeyo, niyio makuva gamwilwazira. Mwahonywa kuvitira mu vangeli niiva mwakagigumira vudinyu. Nigataveeye ndio lisuuvira lienyu liveeye vuzwa.

³ Inzi ndaahana ku munyi makuva gandanyoola gaali manene kandi madukiru ligali, ndi Kristo yakuzira vwoni vwitu kuli gang'odwa mu Mang'oda Matakatifu;

⁴ ndi yayavirwa, kandi naasimugukizwa inyima wa madiku gavaga, kuli Mang'oda Matakatifu gavoora;

⁵ kandi ndi, yaloleka ku Petero, ma lwinyima naaloleka ku avatumwa likomi na vaviri.

⁶ Maku yaloleka kandi ku valondi veve avaari kuvita mia tano ku ing'inga ndala, avanyingi kuvo avakikiri mwoyo, kali niiva valala kuvo vamala kukuza.

⁷ Yaloleka kandi ku Yakobo, ma lwa inyima, naaloleka ku vatumwa vosi.

⁸ Mu limalirika, yaloleka kandi ku inzi kali niiva ndaaloleka kuva kuli mundu wi liivulwa liange liali lugano kutura ku vandu vandi vosi.

⁹ Inzi mbeeye mukekeke ligali ku vatumwa utadukanaa kulangwa mutumwa, kigira ndadambiza likanisa lia Nyasaye.

¹⁰ Navuzwa kigira zimbavasi zia Nyasaye mbeeye kuli mundolaa ndi, kandi zimbavasi zizie siziali zia vuzwa mba. Harara ni yago, ndaayinzira vudinyu kuvita avatumwa vandi vosi; nitali siliali likola liange ligali, navuzwa ziali zimbavasi zia Nyasaye ziayinziraa harara ninzi.

¹¹ Kunangwa, niiva ninzi wilwazaa Ivangeri ku munyi anoho nivava avatumwa vandi vakolaa ndio, yili nilio likuva lia kwilwazaa, kandi yili nilio likuva lia musuuviraa.

Lisimuguka Lietu

¹² Kalunu, niiva likuva lia kwilwazaa liveeye ndi Nyasaye umali kusimugukiza Kristo kutura mu likuza, kigira ki valala ku munyi vavoola ndi sihaveeye ho ni lisimuguka lia vakuzu?

¹³ Niiva lisimuguka lia vakuzu siliveeye ho, kunangwa Kristo naye siyasimugukizwa mba,

¹⁴ kandi, niiva Kristo siyasimugukizwa kutura mu likuza, ililwaza lietu liveeye lia vuzwa, kandi lisuuvira lienyu liveeye lia vuzwa.

¹⁵ Kuvita yaga goosi, kunyi kololeki kuli avavehi kigira makuva ga Nyasaye, lwakwavoola oyo yasimugukiza Kristo kutura mu likuza, navuzwa niiva gaveeye giligali ndi avakuzu sivasimugukizwa, gamanyia ndi Nyasaye siyasimugukiza Kristo mba.

¹⁶ Niiva avakuzu sivasimugizwaa mba, Kristo naye sianyala kuva niyasimuguka mba.

¹⁷ Niiva Kristo siyasimugukizwa, kunangwa lisuuvira lienyu liveeye lia vuzwa, kandi mukemenyi vuzwa muvwoni.

¹⁸ Yaga ganyala kuva ni kivuni ndi, vandu vasuuviraa mu Kristo yakuzaa, yavo vamala kudiva.

¹⁹ Niiva lisuuvirizwa lietu mu Kristo liveeye lilahi kigira livamwoyo lie ing'inga yiyi yenyine, kunangwa gakuduukiraa koveerwe zimbavasi ligali kuvita mundu wundi woosi mu lirova.

²⁰ Navuzwa agiligali gaveeye ndi Kristo umali kusimugukizwa kutura mu likuza, kandi aveeye kimanyiru ndi, yavo avagonaa mu likuza, kandi navo valakasimukizwi.

²¹ Kuli likuza liaduuka mu lirova kuvitira mu mundu mulala, kandi ndio lisimuguka kutura mu vakuzu nalio liduukaa kigira mundu mulala.

²² Kuli avandu vosi vaakuza mulihambana Adamu kandi ndio vosi valakasimugukizwi kuva mulihambana na Kristo.

²³ Navuzwa sa mulala alakasimugikizwi kuli gaalohizirwa mwene: Kristo wu kutanga ku vosi; maku yavo avaliva va Kristo ing'inga yi liza lilie.

²⁴ Maku ekeheri kilakaduuki; Kristo alakadivizi mademoni gamiihaa mu vwerefu goosi, vuvunyali vosi, harara na vizingulu vosi, kandi alakahaane uvwami ku Nyasaye Baba.

²⁵ Kigira gadukanaa Kristo yaamihi kuduuka lwa Nyasaye aguutaa vasigu vosi nukuvaviika hasi hi virenge vivie.

²⁶ Musigu wokohereriza kudivizwa alakave likuza.

²⁷ Amang'oda Matakatifu gavoora, “Nyasaye yavika vindu viosi hasi hi virenge vivie.” Gaveeye vuzwa havulavu ndi amakuva, “Ivindu viosi” sigavolaa ndi Nyasaye siaveeye mulala ku vindu viosi viayaviika hasi ha Kristo mba.

²⁸ Navuzwa lwi vindu viosi vimali kuvikwa hasi hu Vwamihi vwa Kristo, ahene yaho oyo mwene, Kristo, alava mwene hasi ha Nyasaye, wavika vindu viosi hasi hehe; ku Nyasaye aduuki kwamiiha ligali kuvio viosi.

²⁹ Niiva lisimuguka siliveeye ho, kigira ki vandu vabatizangwa kulwa vandu vakuzu? Vakora ndio kigira ki? Niiva gaveeye giligali ndi vakuzu sivasimugukizangwa, kigira ki avandu yavo vabatizangwa kulwa vakuzu vaali nivakikiri kubatizwa?

³⁰ Kulwa kunyi kigira ki kwiviikaa mu vuhiimwa vuli kazozo?

³¹ Avaamitu vange, Inzi ndolaa likuza vuli lidiku! Uvwelori vwambeeye navwo kigira munyi mu limenya lietu mu vuhambani vwitu na Kristo Yeso Umwami wiitu, voonombaa kovora yaga.

³² Niiva moloma kuli liiva liu mundu, ndaamara kulwaana “Izinyama zinduru ziu mumulitu,” mu Efeso kigira lienya lia vandu vuzwa, ndanyoora vukala ki? Navuzwa niiva vakuzu sivasimugukizwa, kuli lugano lovoolaa, “Leki kunyi kulie kandi kunwi kigira mugamba na kukuzi.”

³³ Mutagadwa mba. “Avalina vadamanu vononyiaa miima milahi.”

³⁴ Mwirane mu zing'anagani zienyu zinuungi kandi muleke kokora vwoni kazozo. Valala ku munyi simumanyi Nyasaye ligali mba. Mboraa yaga, ku muviika mu zisoni!

Lisimuguka liu muviri

³⁵ Navuzwa mulala alateeva, “Avakuzu vanyara kusimugukizwa ndi? Valava nu muviri gwa lugano ki?”

³⁶ Ivi musiru! Lwutaagaa vumwu mu marova, si vunyala komera nivutakuzi kutanga mba.

³⁷ Chutaagaa, nu lumwu vuzwa, lunyala kuva luguza lwingano anoho uluguza Lundi vuzwa, lumwu siloveezaa kitagwa chaviluka kale mba.

³⁸ Navuzwa Nyasaye aluheezaa umuviri kuli yenya umwene. Ahezaa vuli lumwu umuviri gwalwo lwene.

³⁹ Miviri ji vilombe viosi sijifanana mba. Miviri ja vandu jiveeye ju lugano lulala. Izinyama ziveeye nu lugano Lundi; manyonyi gaveeye nu lugano Lundi, kandi zisuzi ziveeye ulugano Lundi

⁴⁰ Koveeye ho ni miviri ju muvwerefu, kandi ja hasi mu lirova. Uvukumi vwi miviri ju muvwerefu giveeye lugano lulala, kandi uvukumi vwi miviri ju mu lirova voveeye ulugano Lundi.

⁴¹ Haveeyeho nu vukumi vwi liuva, nu vundi vwu mweli, kandi vundi vwi zing'ereng'ani. Kali zing'ereng'ani ziveeye ni liavukana mu vukumi vwazio.

⁴² Ni ndio galakave mu lisimuguka lia vakuzu. Lwu muviri guyavirwa, goveeye gwi likuza. Lwa gusimugukizwa, goveeye gwi livamwoyo mihiga ni mihiga.

⁴³ Guyavirwa mu livula kwizominywa; gusimugukizwa mu lizominywa. Guyavirwa mu vodedekere; gusimugukizwa mu zinguru.

⁴⁴ Guyavirwa ni goveeye muviri gwi liiva lia kazozo; gusimugukizwa muviri gwa Roho. Niiva umuviri goveeye ho gwi liiva lia Kazozo, koveeyeho kandi nu muviri gwa Roho.

⁴⁵ Mang'oda Matakatifu gavoora, “Mundu wu kutanga, Adamu yalombwa kelombe chi livamwoyo.” Navuzwa Adamu wukumaliriza aveeye Roho uhaanaa livamwoyo litahera.

⁴⁶ Mundu wa Roho siaveeye niye wimbiri, navuzwa mundu wu muviri maku wa Roho.

⁴⁷ Mundu wu kutanga Adamu yalombwa kutura ku marova, aveeye wa marova; Adamu wa kaviri yatura mwigulu

⁴⁸ umundu walombwa kutura ku marova, vaveeye kuli oyo watura ku marova, umundu wu mwigulu aveeye, kuli oyo watura mwigulu.

⁴⁹ Kuli kwavugula ligondo lia uyu wa marova nindio kandi kulavugula ligondo lia oyo wu mwigulu.

⁵⁰ Kunangwa muvooleraa yaga avaamitu vange, inyama na masahi sivinyala konyoora vwami vwa Nyasaye mba; kandi vwoneku sivunyala konyoora vutaveeye uvwoneku mba.

⁵¹ Huliri muvooleraa makuva giligali gaviswa yaga: kunyi sikulakuza kwosi mba. Lwi kisiriva chukumaliriza kilikubwa, vosi kulagirung'anywa, vuzwa kuli mundu avunavunyia emoni.

⁵² Lwi kisiriva kilikubwa, avakuzu valakasimugukizwi, kandi sivalikuza kandi mba, na kunyi vosi kulakagilung'anywi.

⁵³ Gaduukanaa liiva liu vwoneku yili liviikwi umuviri gutonekaa; nu muviri gukuzaa yigu guviikwi umuviri gutakuzaa mba.

⁵⁴ Kunangwa lwayaga gakolekaa, nu muviri gukuzaa ni gwakagirunganywa kuva muviri gutakuzaa, Amang'oda Matakatifu galava ni gakatwekizwa: “Likuza limali kudivizwa; iliguuta lidukiziywi!”

⁵⁵ “Likuza; liguuta liilio liveeye haliha? Likuza; zingulu zizio ziveeye haliha kusaliliza?”

⁵⁶ Ilikuza linyola zingulu zialio kusaliriza kutura ku vwoni, na uvwoni vonyoolaa zingulu ziavwo kutura ku Lilaga.

⁵⁷ Navuzwa lisandiza live ku Nyasaye okohezaa liguuta kuvitira mu Mwami wiitu Yeso Kristo.

⁵⁸ Kunangwa, avaamitu vange, vayaanze, musingiri vudinyu. Kindu kitamusuunda mba. Mwihaane aveene kazozo mu likora miyinzi ju Mwami nu vugulu, kigira munyi mumanya ndi miyinzi jamukolaa mu vutumikiri vwu Mwami sijiveeye ja vuzwa mba.