1 Vakorintho 13 - KITABU KITAKATIFU

¹ Kali nimba nimoloma mu zinimi zia vandu kandi zie zingelosi, navuzwa nindaveeye nu vuyanzi, mbeeye vuzwa kuli umugasa gulangiliraa anoho vikuli visaara vuzwa.

² Niiva ndakaveeye ni kihanwa chu kwilwaza; kandi kihanwa chu kumanyiriza agaviswa goosi kandi limanya liosi; kandi niiva ndakaveeye nilisuvira liosi linyala kusunda vigulu; navuzwa nindaveeye nu vuyanzi, simbeeye kindu mba.

³ Kandi niiva ndakahaani ivindu viosi viambeeye navio ku vadaka, kandi niiva ndakahaani umuviri gwange gusaambwe, navuzwa nindaveeye nu vuyanzi, sivingoonya kali hakuzu mba.

⁴ Vuyanzi vwikuziraa, kandi voveeye no vohoma; sivoveeye ne embodoka, anoho ni liegingira mba.

⁵ Uvuyanzi sivoveeye ni miima midamanu, anoho nu vwimani anoho uvutima vwa vwangu mba; sivusangaliraa vudamanu mba.

⁶ Uvuyanzi sivusangaliraa vudamanu mba, navuzwa vusangaliraa agiligali.

⁷ Uvuyanzi vukunikaa vindu viosi vusuuviraa vindu viosi, vusuuvirizwa vindu viosi. Vwikuzira ku vindu viosi.

⁸ Uvuyanzi sivoveeye ne keheri mba. Navuzwa voporofeti nivoveeyeho vulakahere, vihaanwa viokomoloma mu zinimi zing'eni, niviveeyeho, vilakahere; limanya niliveeyeho lilakahere.

⁹ Ivihaanwa vietu vie limanya kandi vio voporofeti siviveeye vidukiru mba,

¹⁰ navuzwa lwa yicho keveeye kidukiru kiliduuka, maku viosi vitaveeye vidukiru vilakahere.

¹¹ Lwa ndaali mwana, ndamoloma kuli mwana, ndaaganagana kuli mwana, kandi ndamanyiriza kuli mwana. Navuzwa lwa ndaduuka mundu muhindira, ndaaleka miima josi ju lwana.

¹² Icha kololaa kalunu keveeye kuli kololera mu chelolero iligondo litalolekaa vulahi, navuzwa inyima wayaga kulakalole moni namoni. Icha inzi manyi kalunu sikeveeye kidukiru mba, navuzwa inyima kilakave kiduukilu kuli limanya lia Nyasaye, liveeye liduukilu ku inzi

¹³ Kulwa kalunu viveeye ho vindu vivaga vihindiraa: ilisuuvira, lisuuvirizwa, kandi uvuyanzi; navuzwa ekenene kuvita viosi keveeye uvuyanzi.