1 Vakorintho 12 - KITABU KITAKATIFU

¹ Kalunu avaamitu vange, kolondekana na mateeva ginyu ku vihaanwa via Roho; nyenya mumanye vulahi agiligali gavio.

² Mumanye vulahi ndi lwa mwaali nimukikiri kumanya Nyasaye, mwagotizwa mu zinzira zinyingi mu lisigamira vifananyi vitaveeye ni livamwoyo.

³ Nyenya mumanye ndi, umundu woosi wimilirwa na Roho wa Nyasaye sianyala kovora, “Yeso alaamwe mba!” Kandi sianyala kwiyama, “Yeso aveeye Mwami”, natimiliywi na Roho Mutakatifu.

⁴ Haveeye ho ni vihaanwa via Roho zing'ano zinyingi, navuzwa Roho uvihaanaa aveeye mulala.

⁵ Haveeye ho ni zing'ano zinyingi ziu vutumwa, navuzwa kwosi kutumikira Mwami mulala.

⁶ Haveeye ho ni zing'ano zinyingi zio kokora miyinzi, navuzwa Nyasaye aveeye mulala uhaanaa vunyali kuavandu vosi kokora miyinzi lugano lugano.

⁷ Liiva ho lia Roho limanywa mu zinzira lugano mu vuli mundu kuduuka vosi vanyoore uvugasu.

⁸ Roho ahaanaa ku mundu mulala livoora lio vogeri, na wundi ahevwa limanya kutura ku Roho mulala mwere.

⁹ Roho mulala mwere ahaanaa ku mulala lisuuvira, kandi ahaanaa ku wundi zingulu zio kohonyia.

¹⁰ Roho ahaanaa ku mundu mulala zingulu zio kokora vilolekizu viokogenyia; ku wundi kihaanwa chu vwilwazi; ku wundi ahaanaa vunyali vwu kwavukanyia hagati ha Roho ni miroho. Ku mulala kihaanwa cho komoloma mu zinimi lugano lugano; na ku wundi kihaanwa chu kugirung'anyia zinimi.

¹¹ Yiji josi jiveeye imiyinzi ja Roho mulala mwere; kandi ahaanaa ku mundu sa mulala kihaanwa kuli mwene atovoraa.

Umuviri mulala ni vivero vinyingi

¹² Kristo aveeye kuli muviri mulala goveeye ni vivero vinyingi. Kali niiva goveeye ni vivero vinyingi gukikiri vuzwa muviri mulala.

¹³ Munzira ndala nzere, kunyi kwosi nikuva nikoveeye Avayuda anoho vandu vizihiiri, avatugwa anoho vavoholore, kwabatizwa na Roho mulala ma ni kuva muviri mulala kandi Nyasaye yahaana ku kunyi vosi Roho mulala mu mioyo jitu.

¹⁴ Muviri gwene sigwalombwa ne kevero kilala chenyine mba, navuzwa, goveeye ni vivero vinyingi.

¹⁵ Niiva ekerenge kinyala kovora, “Kigira simbeeye mukono, inzi simbeeye mulala ku muviri mba,” yaga siganyala kokora kerenge kivuli kuva kilala ku vivero viu muviri mba;

¹⁶ Kandi niiva ugutu gunyala kovora, “Kigira simbeeye emoni, inzi simbeeye kilala ku vivero vu muviri mba,” yaga siganyala kokora emoni ivuli kuva ndala ku vivero viu muviri mba.

¹⁷ Niiva muviri gwosi gwakaveeye vuzwa emoni, gwakahulira ndi? Niiva umuviri gwosi gwakaveeye ugutu, gwakafunyirizi ndi?

¹⁸ Navuzwa kuli gaveeye, Nyasaye yalohiza vivero mu muviri sa kilala kuli mwene atovoraa.

¹⁹ Niiva vivero viosi via kaveeye kevero kilala, umuviri gwaali gove hayi?

²⁰ Agiligali gaveeye ndi vivero viu muviri viveeye vinyingi, navuzwa muviri goveeye mulala.

²¹ Kunangwa, emoni sinyala kovoolera mukono, “Sinyenyaa ivi mba!” Anoho mutwi kovolere virenge, “Si nyenya munyi mba!”

²² Sigaveeye ndio mba. Ivivero viu muviri vilolekaa kuva ndi nividedekere nivio vienyekaa ligali kuvita;

²³ kandi vivero viu muviri viakuganaganaa viagehera luyali ligali, nivio via kodendaa ligali. Vivero viu muviri vitalolekaa kuva vilahi ligali, nivio videndwa no kohenzerizwa ligali,

²⁴ lwi vivero vindi viu muviri viveeye vilahi siviveeye ni lienya kulindwa mba navuzwa, Nyasaye mwene yalohiza vivero viu muviri kandi yahaana luyali lonene ligali ku vivero viageherwa luyali yilwo.

²⁵ Kulwayago iliavukana mu muviri litavaho mba, navuzwa ivivero viagwo viosi viduuki kohendera vivero vindi viene.

²⁶ Niiva kevero kilala chu muviri kisalira, vivero vindi viosi visaliraa harara nacho. Niiva kevero kilala kilizominywa, vivero vindi viosi vihambanaa mu lisangala harara nacho.

²⁷ Munyi mwosi muveeye muviri gwa Kristo, kandi sa mulala ku munyi aveeye kevero chu muviri yigwo.

²⁸ Nyasaye yatovola mundu sa mulala mu likanisa mu vwiyangu vwivwe. Mu vwiyangu vwukutanga, yatovola avatumwa, mu vwiyangu vwakaviri na vaporofeti vakavaga na avigizi; maku nalondiza ku vayinziri vi kihanwa chu kokora vilolekizu; kandi yalondiza ku yavo vahevwa izingulu zio kohonyia, anoho kokoonya vandi na viimiliri, kandi yavo vamoloma mu zinimi zing'eni.

²⁹ Vosi sivaveeye avatumwa, anoho avaporofeti, anoho avigizi, anoho avikihaanwa cho kokora vilolekizu mba.

³⁰ Vosi sivaveeye ni kihanwa chu kohonyia avalwaye, anoho cho komoloma mu zinimi zing'eni, kandi sivagirung'anyia zinimi vosi mba.

³¹ Kunangwa mwenye vihaanwa vinene ligali kuvita. Kalunu ndamumanyia inzira eveeye indahi ligali kuvita.