1 Vakorintho 11 - KITABU KITAKATIFU

¹ Muve aviigi ku inzi, kuli inzi mbeeye umwigi kutura ku Kristo.

Kwevoha ikitambaya mu lisigamira Nyasaye

² Kalunu nzizominyaa munyi kigira munzizulizaa kazozo mu vindu viosi, kandi mulonda ligali amigizu ga ndaamuha.

³ Navuzwa nyenya mumanye ndi Kristo aveeye mwimiliri wa vuli musaza, nu musaza aveeye mwimiliri wu mukali weve, kandi, Nyasaye naye aveeye umunene wa Kristo.

⁴ Kunangwa umundu musaza woosi usaala, anoho wilwazaa likuva lia Nyasaye imbiri wa vandu nakuniki umutwi gwigwe, oyo aleganyia Kristo oveeye mutwi gwigwe.

⁵ Umundu mukali usaala anoho wilwazaa likuva lia Nyasaye kandi naporofeta nateevohi ikitambaya ku mutwi gwigwe, aleganyia umusaza weve, oveeye mutwi gwigwe. Iliavukana siliveeye hagati hehe nu mukali ovegeywi liisu lilie mba.

⁶ Niiva umukali avula kwevoha ikitambaya ku mutwi gwigwe, ni vulahi avege liisu. Navuzwa kigira ziveeye zisoni ku mukali kovegwa, liisu lilie anoho kovegwa, voveeye vulahi yevohe kitambaya ku mutwi gwigwe.

⁷ Sigaduukana musaza akuniki mutwi gwigwe lwa asaalaa mba, kigira aveeye ligondo kandi vukumi vwa Nyasaye. Navuzwa umukali aveeye vuzwa vukumi vwu musaza weve.

⁸ Musaza siyalombwa kutura ku mukali weve, nitali umukali niyie walombwa kutula ku musaza.

⁹ Anoho umusaza siyalombwa kigira umukali, navuzwa umukali niyie walombwa kigira musaza.

¹⁰ Kuli zingelosi, umukali kuduuka yevohe kitambaya ku mutwi gwigwe keve kimanyiru ndi aveeye hasi hu vunyali vwu musaza.

¹¹ Kandi ndio, mu livamwoyo lietu mu Mwami, mukali sianyala kwemenyia ku vwivwe mwene vuzwa vugira mundu musaza mba. Anoho umundu musaza sianyala kwemenyia yenyine vugira mukali mba.

¹² Kuli umukali yalombwa kutura ku musaza, kandi nindio musaza yiivulwa nu mukali, kandi ni Nyasaye uhaanaa livamwoyo ku vindu viosi.

¹³ Mwikalagiri munyi aveene: nu mwima mulahi mukali kusaala Nyasaye mu livugana vugira kwevoha kitambaya ku mutwi gwigwe?

¹⁴ Kali iliiva lia Nyasaye yalombera mu vindu limwigizaa ndi umundu musaza kuva ni liisu litambi ku mutwi gwigwe ziveeye zisoni kuye,

¹⁵ navuzwa umukali naveeye ni liisu litambi, iliisu yilio liveeye uvukumi kuye. Nyasaye yaaha mukali liisu litambi liduuki kuva chukwikunika.

¹⁶ Niiva umundu yenya koleta mahangari ku geene yaga, gamudukira amanye ndi kunyi anoho amakanisa ga Nyasaye sikoveeye nu mwima gundi mu lisigamira Nyasaye mba.

Lisavo liu Mwami

¹⁷ Mu miigizu galonda ku yaga, inzi sinzizominyaa munyi mba, kigira lwa mwaganaa harara mu mavugana ginyu kusigamira Nyasaye, mumeedaa kokora vudamanu ligali kuvita kokora vugasu.

¹⁸ Mali kovolerwa ndi, ikindu chu kutanga lwa muvuganaa harara kuli avasangi, amahangari gaveeye hagati hinyu, inzi suuviraa malala kugo gaveeye agiligali.

¹⁹ Mu giligali, gaduukanaa liavukana live hagati hinyu kunangwa yavo avaveeye vasuuvirifu ku Nyasaye vaduuki kumanyikana havulavu.

²⁰ Lwa muvuganaa harara kuli muganda, siliveeye ni lilia liu Mwami lia mu liza mba!

²¹ Kivuni keveeye ndi, lwa mulizaa, vuli mundu azizagiliraa kulia chukulia chiche mwene, kali ganyoolekaa ndi valala ku munyi vaveeye ninzara lwa vandi avahambika!

²² Kigira ki? Simuveeye ni zinyumba zienyu zia muduukana kulia mu nu kunwa? Anoho muloraa ni vulahi ku munyi kolegeriza likanisa lia Nyasaye kandi koleganyia avataveeye navio? Kunangwa mwenya inzi muvoolere ndi? Nzizominyi munyi? Awa! Sindavugilira yaga mba.

²³ Inzi ndaanyoora amigizu kutura ku Mwami agambezaa munyi: ndi Mwami Yeso, mu vudiku yivwo vwa yazaamwa, yavugula mugadi,

²⁴ kandi lwa yamala kuhaana lisandiza ku Nyasaye, yameganyia navoora, “Yigu nu muviri gwange ogomeganyirwa munyi. Mukore ndi vuli Iwosi kunzizuliza.”

²⁵ Kandi ndio munzira ndala nzere, nivakamara lilia viukulia, yavugula kekombe navoora, “Yiki keveeye kekombe chi lilagana lihia lia Nyasaye mu masahi gange. Mukore ndi zing'inga ziosi lwa munwezaa kunzizuliza.”

²⁶ Yaga gaveeye kovora ndi, zing'inga ziosi lwa mu liizaa umugadi yigu kandi kunwa kutura mu kekombe yiki, mulandizaa likuza liu Mwami kuduuka lwa aliiza kandi.

²⁷ Kandi galava ndi, ku vosi ulia mugadi yigu anoho unwa kekombe chu Mwami munzira itaveeye nuluyali kuye, alava ni lihiolo liu kwononyia umuviri na masahi gu Mwami.

²⁸ Kulwayago, gaduukanaa vuli mundu yiganagane mwene kutanga, ma alie mugadi yigu kandi anwi kutura mu kekombe yiki.

²⁹ Ku vosi uliizaa mugadi nu kunwa kutura mu kekombe natamanyiriza kivuni chu muviri gwu Mwami, yeleeteraa likalagirwa kuye mwene.

³⁰ Yiki nicho ikigiraa avanyingi ku munyi muveeye avadedekere kandi avalwaye. Na valala vamali kukuza.

³¹ Navuzwa niiva kunyala kwiganagana kunyi aveene kutanga, si kunyala konyoora amaduywa gi likalagirwa lia Nyasaye mba.

³² Navuzwa kukalagirwa kandi koheevwa amageri kutura ku Mwami kunangwa kulavuli kukalagirwa harara na vandu vumulirova.

³³ Kunangwa, avaamitu vange, lwa muvuganaa harara ku lilia ilisavo liu Mwami, sa mulala alindi wache weve.

³⁴ Na niiva umundu woosi aveeye ninzara, gamudukira alie yengo weve gase livugana lienyu liladuuka ku likalagirwa na Nyasaye. Navuzwa kolondekana na makuva gandi gatigaye, ndakamwigizi lwa ndakaaze yaho.