1 Vakorintho 1 - KITABU KITAKATIFU

¹ Inzi Paolo, walangwa ku vulaliri vwa Nyasaye kuva mutumwa wa Kristo Yeso, na amiitu wiitu Sosizenesi -

² Kong'oderaa munyi avaveeye likanisa lia Nyasaye mu lidaala lia Korinzo, kandi ku vosi avalangwa kuva avandu vatakatifu va Nyasaye, avaveeye veeve mu lihambanywa harara na Kristo Yeso, harara na vandu vosi hoosi havundu hoosi vasigamira Mwami wiitu Yeso Kristo, Mwami wavo kandi mwami wiitu:

³ Nyasaye Baba wiitu kandi Mwami Yeso Kristo ahaane ku munyi zimbavasi.

Uvugasu mu Kristo

⁴ Sandizaa Nyasaye wange kazozo kigira zimbavasi ziamali kuhaana ku munyi kuvitira mu Kristo Yeso.

⁵ Kigira mu lihambanywa harara na Kristo, mumali kokolwa avatugi mu vindu viosi mu limoloma liosi kandi mu limanya liosi.

⁶ Lilolekiza lie likuva lia Kristo limali kudinyirizwa ligali mu kunyi

⁷ kunangwa muvuli kogehera kihanwa cha Roho lwa muva nimulindiliraa liloreka liu Mwami wiitu Yeso Kristo.

⁸ Oyo alamudinyiriza muve ni zinguru mu lisuuvira kuduuka ku keheri, muduuki konyooleka vugira imbara ku Lidiku lie likalagirwa liu Mwami wiitu Yeso Kristo.

⁹ Nyasaye aveeye musuuvirifu, wamulanga muve mu lisanga liu Mwana weve Yeso Kristo, Mwami wiitu.

Liavukana mu Likanisa

¹⁰ Avaamitu vange, mugoonyaa ligali mu lieta liu Mwami wiitu Yeso Kristo ndi, vosi muvugilirizane aveene naveene mu goosi ga muvooraa, muve kindu kilala vosi kunangwa muvuli kuva ni liavukana hagati hinyu. Muhambane muve kindu kilala ligali mu zing'anagani kandi mu likalaga lilala.

¹¹ Avaamitu vange, mali konyoora makuva ginyu kutura ku vandu valala ku avinyumba ya Kiloe, ndi lirembana liveeye hagati hinyu.

¹² Leka mbore ndi: sa mulala ku munyi avoora kindu lugano ku wundi. Mulala avoora, “Inzi nondaa Paolo”; wundi avoora, “Inzi nondaa Apolo”; wundi avoora, “Inzi nondaa Petero”; kandi wundi avoora, “Inzi nondaa Kristo.”

¹³ Kristo anyala kugavulanywa mu viduma? Paolo niye wamukuzira ku musalaba? Anoho munyi mwabatizwa mu lieta lia Paolo?

¹⁴ Sandizaa Nyasaye kigira sindabatiza mundu woosi ku munyi nivatali Krisipo na Gayu venyine.

¹⁵ Kunangwa avulaho nu mundu unyala kovora ndi, mwabatizwa mu lieta liange.

¹⁶ O, yee, ndaabatiza kandi Sitefano harara na vinyumba yeeye; navuzwa sinyala kwizuliza niiva ndaabatiza ku umundu wundi woosi mba.

¹⁷ Kristo siyaanduma kubatiza, mba. Yaanduma kwilwaza makuva malahi ga Nyasaye, kandi kugavoola vugira kutumikira makuva govogeri vwa vandu, gase likuza lia Kristo ku musalaba lilagotiza zinguru zialio.

Kristo aveeye zinguru kandi ovogeri vwa Nyasaye

¹⁸ Likuva lie likuza lia Kristo ku musalaba liveeye uvusiru ku yavo avadivaa, navuzwa ku kunyi avahonywa, liveeye zinguru zia Nyasaye.

¹⁹ Amang'oda Matakatifu gavoora, “Ndadiviza ovogeri vwa vageri, kandi ndaviika halovega limanyiriza lia yavo vi lisoma linyingi.”

²⁰ Aveeye haliha mundu mugeri? Aveeye haliha mung'odi wi Lilaga? Aveeye haliha wamanya vogeri vungingi? Nyasaye umali kumanyia ndi ovogeri vwi lirova yili voveeye uvusiru?

²¹ Kuvitira mu vogeri vwa Nyasaye yakola vandu vavuli kumumanya kuvitira mu vogeri vwavo aveene. Mu vogono yivwo, kuvitira mu vusiru vwi likuva lia kwilwazaa, Nyasaye yatovola kohonyia yavo avasuuviraa muye.

²² Avayuda venya vilolekizu ku vasuuviri, Avaguriki navo venya vogeri.

²³ Navuzwa kulwa kunyi, kwilwazaa Kristo wavambwa. Ku Avayuda, likuva yili liveeye chukwikigitaliza, na ku vizihiiri liveeye uvusiru,

²⁴ navuzwa ku yavo ava Nyasaye amali kulanga, vombi Avayuda na Avaguriki, likuva yili liveeye Kristo, oveeye zinguru zia Nyasaye kandi ovogeri vwa Nyasaye.

²⁵ Ekelolekaa kuva uvusiru vwa Nyasaye, keveeye chovogeri ligali kuvita ovogeri vwa vandu, kandi ekelolekaa kuva vodedekere vwa Nyasaye, keveeye ni zinguru ligali kuvita zinguru zia vandu.

²⁶ Avaamitu vange, kalunu mwizurizi kuli mwaali lwa Nyasaye yamulanga. Kolondekana ni zing'anagani zia vandu, ni vakekeeke ku munyi avamwali vageri, anoho, aviivulwa munyumba yu vwamihi.

²⁷ Navuzwa Nyasaye yatovola ivindu vie lirova liganaganaa kuva uvusiru, aduuki kuhaana zisoni ku vageri. Nyasaye yatovola ivindu vie lirova liganaganaa kuva videdekere aduuki koleganyia yavo avaveeye nizinguru.

²⁸ Nyasaye yatovola vindu vialegerizwa kandi viachaywa mu lirova aduuki kwononyia vindu via vandu vaganagana kuva vidukiru.

²⁹ Munzira yiyi sihaveeye nu mundu unyala kwigingira imbiri wa Nyasaye mba.

³⁰ Nyasaye aveeye uvutangiliru vwi livamwoyo lienyu mu Kristo Yeso; wa yakola kuva ovogeri vwitu, uvulungi vwitu, uvutakase vwitu, kandi ovohonyi vwitu.

³¹ Kunangwa Mang'oda Matakatifu gavoora, “Uyu wenyaa kwekonya, gamudukira yekonyere miyinzi ja Nyasaye amali kokora mu Kristo.”