1 Samweli 9 - KITABU KITAKATIFU

Saolo yagana na Samweli

¹ Yaali ho umundu mutugi kandi wizingulu walangwa Kishi; kutura mu ihiiri ya Benjamini. Yaali muyaayi wa Abieli na umwisukulu wa Zerori, kandi kesoni cha Bekorazi, mwiko wa himbi wi kiliango cha Afia.

² Yaali nu muyaayi walangwa Saolo, uwaali muyaayi wi ligondo. Yaali mutambi ligali kuvita vandu vandi vosi, kandi wi ligondo lilahi ligali kuvita.

³ Zibunda zindala zia Kishi ziali nizigoti, kunangwa yavolera Saolo, “Vugula mulala ku vatumikiri na uzie kwenya zibunda yizio.”

⁴ Vavitira mu kivala chi vigulu cha Efuraimu kandi kivala cha Shalisha, navuzwa sivazinyoola yo mba. Ma kandi vavitira mu kivala cha Benjamini, navuzwa sivazinyoola yo kandi mba.

⁵ Lwa vaza mu kivala cha Zufu, Saolo yavolera mutumikiri weve, “Genda kwirane yengo, gase baba wange alaleka kuganagana makuva gi zibunda zizie na atange kohendera kunyi mwoyo.”

⁶ Mutumikiri zana oyo yativura, “Lindi! Mu lidaala yili haveeye mu nu mundu mutakatifu uwa vandu vahaana lizominywa ligali kigira vindu viosi via voora viduukizwa kuva via giligali. Genda kuzie kuye, hawundi anyala kukovolera aha kunyala konyoora zibunda yizi.”

⁷ Saolo yavoola, “Niiva kuzia kuye, kulamuha ki? Chukulia sikitigaye ku mumisigo jietu mba, kandi sikoveeye ku ni kindu cha kunyala kumuha mba. Ukaveeye ku naki?”

⁸ Mutumikiri oyo yativulira Saolo, “Inzi mbeeye nekedonye chi ifeza kekekeeke. Nyara kumuha chene yiki, naye akovolere aha kunyala konyoora zibunda.”

⁹ Ku maziambiri mu kivala cha Isiraeli niiva umundu yaazizaa koteeva Nyasaye kindu, yaavolanga, “Hamba kuzie ku muloli.” Kigira muporofeti wa Kalunu yalangangwa muloli.

¹⁰ Saolo yavolera mutumikiri weve, “Vulahi, Hamba kuzie.” Kunangwa vatura kuzia mu lidaala wu mundu mutakatifu wa Nyasaye yaali.

¹¹ Lwa vaali nivaanigiraa mu kiguru kuduuka mu lidaala, vaagana na vakana vaali ni vaziiza mu kidaho. Vavateeva, “Muloli akaveeye mu lidaala linu naho?”

¹² Avakaana yavo vaativura, “Yee, aveeye mu. Aveeye vuzwa imbiri winyu. Nimugenda vwangu, mulamunyoola, umali kuuza vuzwa lwene yilu mu lidaala lietu kigira vandu vazizaa kuhaana kisiuviriru ku vwali lero ndi.

¹³ Nonoho lwa mwingira mu lidaala, mulamunyoola vwangu nakikiri kuzia ku vwali kulia. Avandu vagenihiziywi si valatanga kulia nakikiri kuuza mba, kigira kuduuka agaasizi kihanwa kutanga. Mwanigiri kalunu; mulamunyoola ing'inga yiyi.”

¹⁴ Kunangwa Saolo nu mutumikiri weve vazia mu lidaala, kandi lwa vaali ni vingira, valora Samweli niyazaa kuvaaganira, naaziizaa havundu hu kusigamira Yahova.

¹⁵ Lidiku lia Saolo yaali nakiri kuuza, Yahova yaali navuuliyi Samweli,

¹⁶ “Mugamba, ahimbi ing'inga kuli yiyi ndakutumira mundu musaza kutura mu ihiiri ya Benjamini; umuvake amaguta kuli mwami wa vandu vange va Isiraeli. Alavasoola kutura ku vandu va Filisitia. Mali kolola linyang'ana lia vandu vange kandi mali kuhulira lianira liavo nilienya vokonyi.”

¹⁷ Lwa Samweli yalora Saolo, Yahova yamuvolera, “Uyu niyie mundu wa ngovoleyange. Alamiiha avandu vange.”

¹⁸ Ahene yaho Saolo yazia ku Samweli, uwaali ahimbi ni kirivwa, namuteeva “Mwaza mbolera, umuloli amenyeraa hayi?”

¹⁹ Samweli yativura, “Inzi mbeeye muloli. Yimira imbiri wange kuzia havundu hukusigamira, mwombi mulalia na inzi kalunu. Mugamba zuri ndamutivulira mateeva ginyu goosi, ma naamuleke muzizagiliri nologendo lwinyu.

²⁰ Amakuva kigira zibunda ziagota madiku gavaga gaaviti, mutazihenderi mwoyo mba, zimali konyoleka. Navuzwa nivwaha wa vandu va Isiraeli venya nu mwoyo gwosi? Ni ivi harara na avinyumba ya baba woovo.”

²¹ Saolo yativura, “Inzi mbeeye wa ihiiri ya Benjamini, ihiiri engekeeke ligali mu Isiraeli kandi inyumba yange eveeye engekeeke ligali mu ihiiri. Kigira ki omoloma kuli ndi ku inzi?”

²² Ahene yaho Samweli yavugula Saolo numutumikiri weve navahira mu keng'oze kenene, kandi naavikaliza, ahimbi na vandu salasini viikara.

²³ Samweli yavolera umudeeki, “Leeta kidonye chi inyama cha ngoheye, cha ngovoleeye uviiki halovega.”

²⁴ Kunangwa mudeeki yaleeta inyama indahi zana yi kinama nagiviika imbiri wa Saolo. Samweli yavoola, “Henza, ngiki kidonye chi inyama ya uviikiywi. Nguviikiyi ugilie kalunu harara na vandu vangenihizi.” Kunangwa Saolo valia na Samweli lidiku yilio.

²⁵ Lwa vasulunguta kutura havundu hukusigamira Yahova kuzia mu lidaala, vaala vogono vwa Saolo kwigulu kwi inyumba.

²⁶ Kandi yagona yo. Mu mavwevwe, Samweli yalanga Saolo naveeye kwigulu kwinyumba, “Vuka na ndakusamuliza uzie.” Saolo yavuka kandi yavo harara na Samweli vatura ni vazia kunzira.

Samweli avakaa Saolo maguta kuli mwamihi

²⁷ Lwa vaduuka kundulu kwi lidaala, Samweli yavolera Saolo, “Volera mutumikiri woovo yimili imbiri wiitu.” Mutumikiri yazia kandi Samweli yavolera Saolo, “Tanga usingiri hano hakekeke, na ndakovolera cha Nyasaye avooye.”