1 Samweli 8 - KITABU KITAKATIFU

Avandu va Isiraeli Vateva Samweli avahe Umwami

¹ Lwa Samweli yasakula yakola avana veve kuva avakalagi mu kivala cha Isiraeli.

² Muyaayi weve wukutanga yalangangwa Joeli, na umuke yaali Abija; vaali avakalagi mu lidaala lia Beerisheba.

³ Navuzwa vayaayi veve sivalonda mwima gwigwe mba; vaali vuzwa nu mwoyo gwu kwenya mabese; kunangwa vavugura viambeti na sivakalaga viina nu vusuuvirifu mba.

⁴ Ahene yaho aviimiliri vosi va Isiraeli vavugana harara, ni vazia ku Samweli mu Rama,

⁵ kandi vamuvolera, “Henza, ivi usakulaa na vayaayi vovo sivalonda liiva liilio mba. Kunangwa tovola umwami akwamihi kove nu mwami kuli zihiiri zindi.”

⁶ Samweli si yayanzizwa ni liteeva liavo liu kwenya mwami mba; ku yasaala ku Yahova,

⁷ na Yahova yavoola, “Uhulirize ku vindu viosi via vandu vakovolera. Siaveeye ivi wa vamali kwambakana, navuzwa inzi niyie wa vamali kwambakana kuli Mwami wavo.

⁸ Kutura nimbatuliza mu kivala cha Egebeti vagirung'ana kutura ku inzi nukusigamira vanyasaye vandi; na kalunu vakora ku ivi aga vaangolera ma vakengoleraa.

⁹ Kulwa yaga, uvahulirize, navuzwa uviganihiza ligali ma uvivaaliri kuli avami vaavo vaza vavakolere.”

¹⁰ Samweli yavolera avandu vaali nivamuteeva avahe mwami vindu viosi via Yahova yaali namuvooleye.

¹¹ Samweli yivaara; “Mwami winyu alamukolera kuli ndi. Alakola vayaayi vinyu kugwa vasikari vu vulwani; valala kuvo valatumika mu magare geege gu vulwani, avandi valanina ku zibarasi zizie ziu vulwani, na vandi valanyagula imbiri wa magare geege gu vulwani.

¹² Kotovola valala kuvo kuva avanene vukulinda vasaza 1,000, na vandi avanene ku vasaza 50. Avayaayi vinyu valalima milimi jije, vagese viukulia vivie, kandi valombe viugi kandi viju via magare geege gu vulwani.

¹³ Avakaana vinyu valamulombera viukufunya mwayu mulahi kandi vayinziri kuli avadeki veve kandi avalombi vi migadi jije.

¹⁴ Alavugula milimi jinyu milahi ligali, milimi ji mizabibu kandi mizeituni, na alajihaana ku vanene veve.

¹⁵ Alavugula kidieli chi likomi chu vuswage vwinyu, kandi cha mazabibu ginyu na avihaane ku vanene va serekali veve na vanene vandi.

¹⁶ Alavugula vatumikiri vinyu vamuyinziliri kandi alavugula zing'ombe zienyu zindahi kandi zibunda zienyu.

¹⁷ Alavugula kidieli chi likomi chi viayo vienyu. Kandi munyi aveene mulagwa avatugwa veve.

¹⁸ Lwa ing'inga yeyo iduuka, mulililira vululu kigira mwami winyu, uwa munyi vene mwetovolera, navuzwa Yahova sialihuliriza ku lielilira lienyu mba.”

¹⁹ Navuzwa vandu yavo vasuura kuhulira Samweli. Vavoola, “Awa! Kwenyaa umwami,

²⁰ kunangwa nakove kuli zihiiri zindi, nikoveeye numwami wiitu aveene alakwamiiha kandi alakwimilira muvulwani.”

²¹ Samweli yahuliriza vindu viosi via vavoola ma nazia kovoolera Yahova.

²² Yahova yativura, “Kola cha venya ma avatovolere mwami.” Ahene yaho Samweli yavolera vasaza va Isiraeli viirane yengo wavo.