1 Samweli 7 - KITABU KITAKATIFU

¹ Kunangwa avandu va Kiriazi-Jearimu vavugura lisandugu lie Lilagana lia Yahova kandi nivalihila munyumba yu mundu ulangwa Abinadabu, uwamenyaa ku kiguru. Vasaalisa muyaayi weve Elieza ave mulindi walio.

Samweli Yamiha Isiraeli

² Lisandugu lie Lilagana lia Yahova liamenya mu Kiriazi-Jearimu ku ing'inga indambi, ahimbi mihiga sirini. Ing'inga yiyi yoosi, Avaisiraeli vosi vanira ku Yahova avakonye.

³ Samweli yavolera avandu va Isiraeli, “Niiva mulirana ku Yahova ni mioyo jinyu josi, kuduuka mwononyie avanyasaye vageni vosi kandi vifananyi via Asitarite, munyasaye mukali. Mwihaane aveene ligali ku Yahova kandi mumusigamiri, kandi alamuhonyia munyi kutura kuzinguru zia vandu va Filisitia.”

⁴ Kunangwa Avaisiraeli vononyia vifananyi viavo viosi via Baali na Asitarite, kandi nivasigamira Yahova yeng'ine.

⁵ Maku Samweli yalanga vandu va Isiraeli vosi vavugane ha Mizipa navavolera, “Ndasaalira munyi ku Yahova uwene yeyo.”

⁶ Kunangwa vosi vavugana harara ha Mizipa vadaha amazi kandi nivagasundula ichova kuli kihanwa ku Yahova kandi ni vahonga lilia lidiku liosi. Vavoola; “Kumali kwonera Yahova.” Haali ha Mizipa ha Samweli yahuliriza lisolana lia vandu va Isiraeli nokoleta mirembe hagati haavo kandi kuvakalagira.

⁷ Lwa vandu va Filisitia vahulira ndi avandu va Isiraeli vamali kuvunga ha Mizipa, avami vanene vatano vandu va Filisitia harara na vasaza vaavo vuvulwani vatanga kuuza kuvingilira. Avandu va Isiraeli vahulira makuva yaga na vaali nuvuti,

⁸ kandi vavoolera Samweli, “Zizagilira kwanira ku Yahova Nyasaye wiitu aduuki kukohonyia kutura ku vandu va Filisitia.”

⁹ Samweli yita kememe chiligondi ma naakisaamba kigima kuli kisiuviriru ku Yahova. Maku yasaala ku Yahova akoonye Isiraeli, kandi Yahova yamutivulira lisaala lilie.

¹⁰ Lwa Samweli yaali naahaanaa kisiuviriru chukusambwa zana, Avafilisitia visunda imbiri kuvingilira nukuvalwana; navuzwa ahene yaho vuzwa, Yahova yaahirigana kutura mwigulu ku vandu va Filisitia. Vadandana ligali ma niviruka mu lihenda mwoyo nokodegera.

¹¹ Avandu va Isiraeli vaatura Mizipa nivalondelera avandu va Filisitia kali kuduuka Bezi Kari, nivavitira kunzira.

¹² Maku Samweli yavugula ligina, naalisingiriza hagati ha Mizipa na Sheni, navoora, “Yahova amali kokokonya munzira yoosi,” kandi yaaligulika “Ebeneza.”

¹³ Kunangwa Avafilisitia vaaguutwa, kandi Yahova yaavigalira kwingilira vandu va Isiraeli, ku madiku goosi ga Samweli yaali mwoyo.

¹⁴ Amadara manene goosi aga vandu va Filisitia vaali nivavugura kandi vanuraa Avandu va Isiraeli hagati ha Ekironi na Gazu gilanyirwa vandu va Isiraeli, nandio avandu va Isiraeli virana kuvugura kivala chavo choosi na haali ni mirembe hagati ha Isiraeli na vandu va Kanaani.

¹⁵ Samweli yamiha madiku goosi gi livamwoyo lilie.

¹⁶ Vuli muhiga yaali anyala kovodong'ana mu madaala ga Bezeli, Giligali, Mizipa, naakilinganyaa ovosooro hagati ha vandu va Isiraeli.

¹⁷ Maku yiranaa yengo weve mu lidaala lia Rama, uwa yatumika kuli mukalagi. Mu Rama, yumbakira Yahova uvwali.