1 Samweli 6 - KITABU KITAKATIFU

Liirana lie Lisandugu lie Lilagana

¹ Inyima wi Lisandugu lie Lilagana lia Yahova liali ni limaliyi mieli saba mu kivala cha va Filisitia,

² Avafilisitia valanga avasaalisi na vasigitiri nivavateeva, “Kulakola ki ni Lisandugu lie Lilagana lia Yahova? Niiva kulalituma lirane havundu ha lialange, kulaliiranyia naki?”

³ Vativura, “Niiva mwiranyia Lisandugu lie Lilagana lia Nyasaye wa Isiraeli, kuduuka mulitumi ni kihanwa kuye kutungira uvwoni vwinyu. Lisandugu lie Lilagana litiirana vugira kihanwa mba. Munzira yiyi mulahonywa, kandi; mulamanya kivuni kigiraa nazizagilira kumuha amageri.”

⁴ Avandu zana vateva, “Kulatuma kihanwa ki chi lihiola kuye?” Avandu zana vateva. Avasaalisi na vasigitiri vavativulira, “Vifananyie viezahabu via amiihi vitano kandi vivundu vitano vie izahabu, kilala kucho ku vuli Mwami wa Avafilisitia. Liduywa lilala liere liatumwa ku munyi mwosi kandi ku avami vatano.

⁵ Kuduuka mulombe vifananyi via miihi ginyu kandi vivundu viononyiaa kivala chienyu, kandi kuduuka muhaane luyali ku Nyasaye wa Isiraeli. Hawundi alalekera kuha munyi amageri, avanyasaye vinyu ni kivala chiinyu.

⁶ Kigira ki muve ni mioyo midinyu kuli mwami na vandu va Egebeti? Mutivilira kuli Nyasaye yavakola vasiru kuduuka lwa valeka avandu va Isiraeli vatule vazie.

⁷ Kunangwa yetegekizi ligare liezing'ombe lihia ni zing'ombe ziviri zikerangwa ni zikikiri kovofa ku iniira. Muzivohe ku ligare zana, navuzwa mukome vimoli viazio viirane mukego.

⁸ Vuguli Lisandugu lie Lilagana lia Yahova, muliviiki ku ligare kandi muviiki akasandugu kunyasi kwalio aki vifananyi viezahabu via amiihi nivivudu viveeye mu, ivia mutumaa kuye kuli kihanwa chukutungira uvwoni vwinyu. Sugumi ligare zana litange kogenda ku nzira yalio, ma muleke liene lizie.

⁹ Kunangwa muhenze kuli lilazia. Niiva lizia lovega loheenza lidaala lia Bezi-shemeshi, yaga gaveeye kovora ndi, ni Nyasaye wa vandu va Isiraeli umali kutuma amaduywa gukutihiza yaga ku kunyi. Navuzwa nilitazia yo, ahene yaho kulamanya ndi siyatuma maduywa yaga mba. Gaali vuzwa ameegendera.”

¹⁰ Avandu va Filisitia vaakora icha vavolerwa: vavugura zing'ombe zidwasi ziviri, nivazivoha ku ligare, kandi nivahanira vimoli viazio mu kego.

¹¹ Vaviika Lisandugu lie Lilagana lia Yohana mu ligare harara na kasandugu akaali mu nivifananyi vie zahabu vie vivudu na miihi.

¹² Zing'ombe ziatanga logendo kuzia ku nzira izizaa Bezi-shemeshi kandi ziazia vulungi mu lidaala zana; vugira kweveta kutura kunzira. Ziazia ni zianaa. Avami vanene vatano va Avafilisitia vazilonda kuduuka ku lwako lwa Bezi-shemeshi.

¹³ Avandu va Bezi-shemeshi vaali nivagesaa ingano mu livona; kandi lwa vaginga zimoni ziavo, nonoho valora Lisandugu lie Lilagana. Vaali nuvusangali ligali ku lilola.

¹⁴ Ligare liazia mu mulimi gwu mundu ulangwa Joshua uwamenyanga mu Bezi-shemeshi, kandi nilisingira yo ahimbi ni ligina linene ligali. Avandu vatemanyia ligare liezimbaho zana kandi niviita zing'ombe yizio, ni vazihaana kuli kisiuviriru chukusambwa ku Yahova.

¹⁵ Vandu va Levi, avasaalisi vaginga Lisandugu lie Lilagana lia Yahova kandi akasandugu akaali mu nivifananyi vie zahabu, nivaviviika ku ligina linene zana. Maku vandu va Bezi-shemeshi vahaana visiuviliru viukusambwa kandi visiuviliru vindi ku Yahova.

¹⁶ Avami vanene vatano va vandu va Filisitia vaveelola ni vakora ndio, ma kandi nivirana Ekironi lidiku liene yilio.

¹⁷ Avandu va Filisitia vaatuma vifananyi via miihi gatano gizahabu yago kuli kihanwa ku Yahova, kutungira uvwoni vwavo, kigira madaala manene: Ashidodi, Gaza, Ashikeloni, Gazi, na Ekironi.

¹⁸ Vaatuma kandi vifananyi vie vivundu vie zahabu, sa kilala kuvuli lidaala ku madaala manene agamiihangwa na vami vanene vatano va vandu va Filisitia, goosi gakumberizwa ni zingaga zindinyu nutudaala tutali namadiji. Ligina linene mu mulimi gwa Joshua wa Bezi-shemeshi, ukwa vaviika Lisandugu lie Lilagana lia Yahova, likikiri ho na lero kuli lilolekiza ku agekoleka.

¹⁹ Yahova yita avasaza sabwini ku vandu va Bezi-shemeshi, kigira vahenza mu Lisandugu lie Lilagana lia Yahova. Kandi avandu vasioma kigira Yahova yaali naleti likuza linene hagati haavo.

Lisandugu lie Lilagana ha Kiriazi-Jearimu

²⁰ Kunangwa avasaza va Bezi-shemeshi vavoola, “Ni vwaha unyala kusingira imbiri wa Yahova, Nyasaye Mutakatifu uyu? Kunyala kumuhila hayi atuli ku kunyi?”

²¹ Vaatuma avatumwa ku vandu va Kiriazi-Jearimu kovora, “Avafilisitia vamali kwilanyia Lisandugu lie Lilagana lia Yahova. Hambi yinu mulivuguli.”