1 Samweli 5 - KITABU KITAKATIFU

Lisandugu lie Lilagana Liveeye na vandu va Filisitia

¹ Lwa vandu va Filisitia vaali ni vakavugula Lisandugu lie Lilagana valiginga kutura Ebeneza kuduuka mu lidaala linene liavo lia Ashidodi.

² Valihila mu litembeli lia nyasaye wavo Dagoni nivalisingiliza ahimbi ni kifananyi chiche.

³ Mugambazuri gwi lidiku lialonda ku vandu va Ashidodi valora ndi kifananyi cha Dagoni chaali nikimali kugwa mam'mama imbiri wi Lisandugu lie Lilagana lia Yahova Wuvunyali. Kunangwa vakivukiza nivakiviika mu vwiyangu vwacho.

⁴ Mugambazuri gwi lidiku lialonda ku, valora kifananyi zana nikigwiyi kandi mam'mama imbiri wi Lisandugu lie Lilagana lia Yahova Wanyala Viosi. Ing'inga yiyi, mutwi gwacho na makono gacho gombi gaali nigavuniki kutura kucho kandi gaali hasi mu kiliango, muviri gweng'ine gwalekwa lidudu.

⁵ Yiki nicho kivuni kigiraa avasaalisi va Dagoni kandi avingiraa mu litembeli lilie kumusigamira vosi mu Ashidodi, vasiiraa havundu zana yaho na sivagenda ho mba.

⁶ Yahova yahaana amageri malulu ku avandu va Ashidodi kandi naavatihiza ligali muno. Yavaha amageri kandi avandu vi vivala via kumbiriza lidaala yilio, ku livakola vave na amiihi.

⁷ Lwa valora chekoleka, vavoola, “Nyasaye wa Isiraeli akohezaa amageri kandi ahezaa nyasaye wiitu Dagoni, amageri. Sikunyala koleka Lisandugu lie Lilagana limenye hano kandi mba.”

⁸ Kunangwa vatuma vatumwa kulanga avami vatano va vandu va Filisitia nivavateeva; “Kulakola ki ni Lisandugu lie Lilagana lia Nyasaye wa vandu va Isiraeli?” Vaativura, “Mulihili Gazi,” kunangwa vaahira Gazi, lidaala linene lindi lia vandu va Filisitia.

⁹ Navuzwa lwa liali niliakaduuka ho, Yahova yahaana mageri ku lidaala linene yilio kandi nalikora live nuvuti vonene ligali. Yavaha mageri na miihi agaalia vandu vosi avang'erere na vakulundu.

¹⁰ Kunangwa vatuma Lisandugu lie Lilagana kuduuka Ekironi, lidaala linene lindi lia vandu va Felisitia; navuzwa lwa liaduuka yo, avandu vaalira nu mwoyo munene nivavoora, “Vamali koleta Lisandugu lie Lilagana lia Nyasaye wa Isiraeli hano, vakwiti kwosi!”

¹¹ Kunangwa vatumana avami va Filisitia nivavoora, “Yiiranyi Lisandugu lie Lilagana lia Nyasaye wa Isiraeli mu lidaala lialio liene, kunangwa livuli kukwita harara na vizinyumba viitu.” Haali ni lidegera mu lidaala linene liosi kigira Nyasaye yaali navaheezaa amageri malulu ligali.

¹² Kali yavo avavura kukuza valwala miihi, kandi lianira liavo liaduuka mwigulu.